Sajeeva Vahini - Bible AI - Beta

1. అందుకు యెహోవా ఫరోకు నేను చేయబోవుచున్న దానిని నీవు నిశ్చయముగా చూచెదవు; బలమైన హస్తముచేత అతడు వారిని పోనిచ్చును, బలమైన హస్తము చేతనే అతడు తన దేశములోనుండి వారిని తోలివేయునని మోషేతో అనెను.
అపో. కార్యములు 13:17

పోరాటం ప్రారంభం కాక ముందే దేవుడు తన ప్రజల విజయ వార్తను ప్రకటిస్తున్నాడు (యోహాను 16:33 రోమీయులకు 8:37 1 కోరింథీయులకు 15:58 చూడండి).

2. మరియు దేవుడు మోషేతో ఇట్లనెను - నేనే యెహోవాను;

3. నేను సర్వశక్తిగల దేవుడను పేరున అబ్రాహాము ఇస్సాకు యాకోబులకు ప్రత్యక్షమైతిని కాని, యెహోవా అను నా నామమున నేను వారికి తెలియబడలేదు.

ఈ వచనంలో చివరి భాగాన్ని ఈ విధంగా కూడా అనువదించవచ్చు – “నన్ను నేను యెహోవాగా వారికి వెల్లడించుకో లేదా?” ఆదికాండం గ్రంథంలో యెహోవా అనే మాట ప్రారంభంలోనే కనిపిస్తూ ఉంది (నిర్గమకాండము 2:5). ఆ పుస్తకమంతటిలోనూ చాలా చోట్ల కనిపిస్తుంది. అబ్రాహాము, ఇస్సాకు, యాకోబులకు ఈ పేరు తెలుసు అనడంలో సందేహం లేదు. ఈ వచనాన్ని ప్రశ్నార్థకంగా కాక ఈ అనువాదంలో ఉన్నట్టుగానే ఉంచి చూస్తే దీని అర్థం ఇది – దేవుడు తన గురించి తాను క్రమ క్రమంగా కొంచెం కొంచెంగా బైబిల్లో వెల్లడి చేసుకున్నాడు. క్రొత్త ఒడంబడిక గ్రంథం వరకూ దేవుని స్వభావం కొంచెం కొంచెంగా తెలుస్తూ వచ్చి క్రొత్త ఒడంబడిక కాలంలో పూర్తిగా వెల్లడైంది. ఆదికాండం గ్రంథంలో దేవుని గురించి ముఖ్యంగా వెల్లడయ్యేది ఆయన సర్వశక్తి, ఆయన ప్రజల అవసరాలన్నిటినీ తీర్చగలిగే ఆయన ప్రభావం (ఆదికాండము 17:1 ఆదికాండము 35:11 ఆదికాండము 48:3). యెహోవా అనే పేరు మనుషులకు అప్పటికే తెలిసినా ఆయన దాని అర్థం వారికి తెలియజేయలేదు. కాలక్రమేణా ఈ పేరు వారి విషయంలో ఏవిధంగా అర్థమౌతుందో వారికి తెలియదు. ఇక్కడ నిర్గమకాండం గ్రంథంలో యెహోవా అనే మహత్తరమైన తన పేరుకు ఉన్న సంపూర్ణ అర్థాన్ని ప్రజలకు వెల్లడి చేయడం ఆరంభించాడు దేవుడు (నిర్గమకాండము 3:14-15 నోట్ చూడండి; నిర్గమకాండము 33:19 నిర్గమకాండము 34:5-7). ముఖ్యంగా యెహోవా అనే పేరుకూ తన ప్రజల దాస్య విముక్తికీ ఉన్న సంబంధాన్ని ఆయన బయలుపరిచాడు (6-8 వచనాలు). యెహోవా తన వాగ్దానాలను నమ్మకంగా నెరవేర్చేవాడు అని వారికి తెలియజేశాడు.

4. మరియు వారు పరవాసము చేసిన దేశమగు కనాను దేశమును వారికిచ్చుటకు నా నిబంధనను వారితో స్థిరపరచితిని.

ఆదికాండము 15:18 1ఆదికాండము 7:3-8 ఆదికాండము 26:3 ఆదికాండము 28:13.

5. ఐగుప్తీయులు దాసత్వమునకు లోపరచియున్న ఇశ్రాయేలీయుల మూలుగును విని నా నిబంధనను జ్ఞాపకముచేసికొని యున్నాను.

నిర్గమకాండము 2:24 చూడండి.

6. కాబట్టి నీవు ఇశ్రాయేలీయులతో ఈలాగు చెప్పుము. నేనే యెహోవాను; నేను ఐగుప్తీయులు మోయించు బరువుల క్రింద నుండి మిమ్మును వెలుపలికి రప్పించి, వారి దాసత్వములో నుండి మిమ్మును విడిపించి, నా బాహువు చాపి గొప్ప తీర్పులుతీర్చి మిమ్మును విడిపించి,
అపో. కార్యములు 13:17

నిర్గమకాండము 15:13 ద్వితీయోపదేశకాండము 7:8 1 దినవృత్తాంతములు 17:21 యోహాను 8:31-36 గలతియులకు 1:3-4.

7. మిమ్మును నాకు ప్రజలుగా చేర్చుకొని మీకు దేవుడనై యుందును. అప్పుడు ఐగుప్తీయుల బరువు క్రిందనుండి మిమ్మును వెలుపలికి రప్పించిన మీ దేవుడనైన యెహోవాను నేనే అని మీరు తెలిసికొందురు.

“నా ప్రజ”– నిర్గమకాండము 19:5 ద్వితీయోపదేశకాండము 4:20 ద్వితీయోపదేశకాండము 7:6 2 సమూయేలు 7:24 1 పేతురు 2:9-10. “మీ దేవుడు”– ఆదికాండము 17:7 నిర్గమకాండము 2945:1 లేవీయకాండము 11:45 ద్వితీయోపదేశకాండము 29:13 2 కోరింథీయులకు 6:17-18 ప్రకటన గ్రంథం 21:3. “మీరు తెలుసుకొంటారు”– నిర్గమకాండము 7:5 నిర్గమకాండము 7:17 నిర్గమకాండము 8:10 నిర్గమకాండము 8:22 నిర్గమకాండము 9:14 నిర్గమకాండము 10:2 నిర్గమకాండము 16:12 ద్వితీయోపదేశకాండము 4:35 యెషయా 41:20 యెషయా 49:23 యెషయా 49:26 యెషయా 60:16 యోహాను 7:17 ఎఫెసీయులకు 1:17-19 Phi 3:7-11. తన చర్యలు, తన వాక్కు ద్వారా తనను తాను వెల్లడి చేసుకోవడంలో దేవునికున్న గొప్ప ఉద్దేశం ఇదే.

8. నేను అబ్రాహాము ఇస్సాకు యాకోబులకు ఇచ్చెదనని చెయ్యి యెత్తి ప్రమాణముచేసిన దేశములోనికి మిమ్మును రప్పించి దాని మీకు స్వాస్థ్యముగా ఇచ్చెదను; నేను యెహోవానని చెప్పుమనగా

ఆదికాండము 15:18 ఆదికాండము 26:3. 6-8 వచనాల్లోనూ ఇంకా ఈ పుస్తకంలో ఇలాంటివే ఇతర వచనాల్లోనూ ఈజిప్ట్‌లో దేవుడు తన అమిత శక్తిని ప్రదర్శించడానికి 5 కారణాలు కనిపిస్తున్నాయి. మొదటిది, తన ప్రజలను దాస్యంనుంచి విడిపించడం. రెండు, దేవుడంటే భయభక్తులు లేని ఈజిప్ట్‌ప్రజలమీదా వారి అబద్ధ దేవతలమీదా తీర్పు తీర్చడం. మూడు, తాను చేసిన ఒడంబడికనూ తన మాటనూ నెరవేర్చే దేవుడినని నిరూపించుకోవడం. నాలుగు, తానొక్కడే అన్నిటికీ పైగా ఉన్న ఏకైక దేవుడనీ, ఇతర దేవుళ్ళూ ప్రభువులూ మనుషులూ ఎవరూ తనకు సాటి రారనీ ఒక్కసారే అందరికీ తెలియజేయడం (నిర్గమకాండము 7:5 నిర్గమకాండము 10:1-2 నిర్గమకాండము 12:12). ఐదు, దేవుడు తన ప్రజల పక్షంగా మనుషుల వ్యవహారాల్లో పాల్గొంటూ తన ప్రజలకోసం పని చేస్తూ ఉంటాడని చూపించడం (8:22-23). ఎక్కడో దూరాన ఉండి మనుషులను పట్టించుకోని దేవుడు కాదాయన. దేవుడు ప్రపంచాన్ని పరిపాలించే అధినేత (కీర్తనల గ్రంథము 47:2 చూడండి).

9. మోషే ఇశ్రాయేలీయులతో ఆలాగు చెప్పెను. అయితే వారు మనోవ్యాకులమునుబట్టియు కఠిన దాసత్వమును బట్టియు మోషే మాట వినరైరి.

నిర్గమకాండము 5:21-23.

10. మరియు యెహోవా మోషేతో నీవు లోపలికి వెళ్లి,

11. ఐగుప్తు రాజైన ఫరోతో ఇశ్రాయేలీయులను తన దేశములోనుండి వెలుపలికి పోనియ్యవలెనని అతనితో చెప్పుమనెను.

12. అప్పుడు మోషే చిత్తగించుము, ఇశ్రాయేలీయులే నా మాట వినలేదు; మాటమాంద్యము గలవాడనగు నా మాట ఫరో యెట్లు వినునని యెహోవా సన్నిధిని పలికెను.

నిర్గమకాండము 4:10 నిర్గమకాండము 6:30 యిర్మియా 1:6.

13. మరియు యెహోవా మోషే అహరోనులతో నిట్లనెను ఇశ్రాయేలీయులను ఐగుప్తు దేశములోనుండి తాము వెలుపలికి రప్పించుటకై ఇశ్రాయేలీయుల యొద్దకును ఫరో యొద్దకును వెళ్లవలెనని వారి కాజ్ఞాపించెను.

14. వారి పితరుల కుటుంబముల మూలపురుషులు ఎవరనగా, ఇశ్రాయేలు జ్యేష్ఠ కుమారుడైన రూబేను కుమారులు హనోకు పల్లు హెస్రోను కర్మీ; వీరు రూబేను కుటుంబములు.

15. షిమ్యోను కుమారులు యెమూయేలు యామీను ఓహదు యాకీను సోహరు కనాను స్త్రీకి కుమారుడైన షావూలు; వీరు షిమ్యోను కుటుంబములు.

16. లేవి కుమారుల పేరులు వారి వారి వంశావళుల చొప్పున ఏవేవనగా, గెర్షోను కహాతు మెరారి. లేవి నూట ముప్పది యేడేండ్లు బ్రదికెను.

17. గెర్షోను కుమారులు వారి వారి వంశావళుల చొప్పున లిబ్నీ షిమీ.

18. కహాతు కుమారులు అమ్రాము ఇస్హారు హెబ్రోను ఉజ్జీయేలు. కహాతు నూట ముప్పది మూడేండ్లు బ్రదికెను.

19. మెరారి కుమారులు మహలి మూషి; వీరు తమ తమ వంశావళుల చొప్పున లేవి కుటుంబములు.

20. అమ్రాము తన మేనత్తయైన యోకెబెదును పెండ్లి చేసికొనెను; ఆమె అతనికి అహరోనును మోషేను కనెను. అమ్రాము నూట ముప్పది యేడేండ్లు బ్రదికెను.

21. ఇస్హారు కుమారులు కోరహు నెపెగు జిఖ్రీ

22. ఉజ్జీయేలు కుమారులు మిషాయేలు ఎల్సాఫాను సిత్రీ.

23. అహరోను అమ్మినాదాబు కుమార్తెయు నయస్సోను సహోదరియునైన ఎలీషెబను పెండ్లిచేసికొనెను. ఆమె అతనికి నాదాబును అబీహును ఎలియాజరును ఈతామారును కనెను.

24. కోరహు కుమారులు అస్సీరు ఎల్కానా అబీయా సాపు; వీరు కోరహీయుల కుటుంబములు.

25. అహరోను కుమారుడైన ఎలియాజరు పూతీయేలు కుమార్తెలలో ఒకతెను పెండ్లిచేసికొనెను. ఆమె అతనికి ఫీనెహాసును కనెను; వీరు తమ తమ కుటుంబముల చొప్పున లేవీయుల పితరుల మూల పురుషులు.

26. ఇశ్రాయేలీయులను వారి సేనల చొప్పున ఐగుప్తు దేశములోనుండి వెలుపలికి రప్పించుడని యెహోవా ఆజ్ఞాపించిన అహరోను మోషేలు వీరు.

27. ఇశ్రాయేలీయలను ఐగుప్తులోనుండి వెలుపలికి రప్పించవలెనని ఐగుప్తు రాజైన ఫరోతో మాటలాడిన వారు వీరు; ఆ మోషే అహరోనులు వీరే.

28. ఐగుప్తు దేశములో యెహోవా మోషేతో మాటలాడిన దినమున

29. యెహోవా నేను యెహోవాను; నేను నీతో చెప్పునది యావత్తు నీవు ఐగుప్తు రాజైన ఫరోతో పలుకుమని మోషేతో చెప్పగా

30. మోషే చిత్తగించుము; నేను మాట మాంద్యము గలవాడను, ఫరో నా మాట యెట్లు వినునని యెహోవా సన్నిధిని పలికెను.