1. లేవి వంశస్థుడొకడు వెళ్లి లేవి కుమార్తెను వివాహము చేసికొనెను.

ఆదికాండము 6:16 ఆదికాండము 6:18 ఆదికాండము 6:20.

2. ఆ స్త్రీ గర్భవతియై కుమారుని కని, వాడు సుందరుడై యుండుట చూచి మూడునెలలు వానిని దాచెను.
అపో. కార్యములు 7:20, హెబ్రీయులకు 11:23

“అందగాడు”– అపో. కార్యములు 7:20 హెబ్రీయులకు 11:23. పురాతనకాలం వారందరిలోకి గొప్ప వ్యక్తుల్లో ఒకడి చరిత్ర ఇక్కడ ఆరంభమౌతూవుంది. ఇతని పేరు – మోషే – బైబిల్లో 800 కంటే ఎక్కువ సార్లు కనిపిస్తుంది. బైబిల్లోని మొదటి 5 పుస్తకాలనూ మోషే రాశాడని యూదులు నమ్మారు. ఇందుకు బైబిల్లోనే కొన్ని రుజువులు కనిపిస్తాయి (ద్వితీయోపదేశకాండము 31:9 ద్వితీయోపదేశకాండము 31:22 మార్కు 12:19 మార్కు 12:26 లూకా 24:27 యోహాను 1:45 యోహాను 5:45-47 2 కోరింథీయులకు 3:15). ఈ మొదటి ఐదు పుస్తకాలను మోషే ధర్మశాస్త్ర గ్రంథం అని పిలిచారు. దేవుడు ధర్మశాస్త్రాన్ని మోషే ద్వారా ఇచ్చాడు. బైబిలంతటిలోనూ దేవుని ధర్మశాస్త్రానికి మోషే ప్రతినిధి (లూకా 2:22 లూకా 16:29 యోహాను 1:17 అపో. కార్యములు 28:23).

3. తరువాత ఆమె వాని దాచలేక వాని కొరకు ఒక జమ్ముపెట్టె తీసికొని, దానికి జిగటమన్నును కీలును పూసి, అందులో ఆ పిల్లవానిని పెట్టియేటి యొడ్డున జమ్ములో దానిని ఉంచగా,

4. వానికేమి సంభవించునో తెలిసికొనుటకు వాని అక్క దూరముగా నిలిచియుండెను.

ఈమె పేరు మిర్యాం – ఆదికాండము 15:20.

5. ఫరో కుమార్తె స్నానము చేయుటకు ఏటికి వచ్చెను. ఆమె పనికత్తెలు ఏటియొడ్డున నడుచుచుండగా ఆమె నాచులోని ఆ పెట్టెను చూచి, తన పనికత్తె నొకతెను పంపి దాని తెప్పించి
అపో. కార్యములు 7:21

6. తెరచి ఆ పిల్లవాని చూచినప్పుడు ఆ పిల్లవాడు ఏడ్చుచుండగా చూచి వానియందు కనికరించి వీడు హెబ్రీయుల పిల్లలలో నొకడనెను.

7. అప్పుడు వాని అక్క ఫరో కుమార్తెతో నీకొరకు ఈ పిల్లవాని పెంచుటకు నేను వెళ్లి హెబ్రీ స్త్రీలలో ఒక దాదిని పిలుచుకొని వత్తునా అనెను.

8. అందుకు ఫరో కుమార్తె వెళ్లుమని చెప్పగా ఆ చిన్నది వెళ్లి ఆ బిడ్డ తల్లిని పిలుచుకొని వచ్చెను.

9. ఫరో కుమార్తె ఆమెతో ఈ బిడ్డను తీసికొని పోయి నాకొరకు వానికి పాలిచ్చి పెంచుము, నేను నీకు జీతమిచ్చెదనని చెప్పగా, ఆ స్త్రీ ఆ బిడ్డను తీసికొని పోయి పాలిచ్చి పెంచెను.

10. ఆ బిడ్డ పెద్దవాడైన తరువాత ఆమె ఫరో కుమార్తె యొద్దకు అతని తీసికొని వచ్చెను, అతడు ఆమెకు కుమారుడాయెను. ఆమె నీటిలోనుండి ఇతని తీసితినని చెప్పి అతనికి మోషే అను పేరు పెట్టెను.
అపో. కార్యములు 7:21

మోషే అంటే “బయటికి తీయడం” అని అర్థం కావచ్చు – ఇది ఈ అర్థమిచ్చే హీబ్రూ పదాన్ని పోలి ఉంది.

11. ఆ దినములలో మోషే పెద్దవాడై తన జనులయొద్దకు పోయి వారి భారములను చూచెను. అప్పుడతడు తన జనులలో ఒక హెబ్రీయుని ఒక ఐగుప్తీయుడు కొట్టగా చూచెను.
అపో. కార్యములు 7:23, హెబ్రీయులకు 11:24

అపో. కార్యములు 7:23-25 హెబ్రీయులకు 11:24-26. దేవుడూ దేవుని ప్రజలూ కావాలా లేక ఈ లోక భోగభాగ్యాలు కావాలా అని మోషే తేల్చుకోవలసిన సమయం ఇదే. మోషేలాగే ఈ రెండు విషయాలలో ఏదో ఒకదాన్ని ఎన్నుకోవలసిన బాధ్యత మనందరికీ ఉంది – మత్తయి 6:19-21 లూకా 14:33 1 యోహాను 2:15-17.

12. అతడు ఇటు అటు తిరిగి చూచి యెవడును లేకపోగా ఆ ఐగుప్తీయుని చంపి యిసుకలో వాని కప్పి పెట్టెను.
అపో. కార్యములు 7:24

అపో. కార్యములు 7:24-28.

13. మరునాడు అతడు బయట నడిచి వెళ్లుచుండగా హెబ్రీయులైన మనుష్యులిద్దరు పోట్లాడుచుండిరి.
అపో. కార్యములు 7:27-28

14. అప్పుడతడు అన్యాయము చేసినవాని చూచి నీ వేల నీ పొరుగు వాని కొట్టుచున్నావని అడుగగా అతడు - మామీద నిన్ను అధికారినిగాను తీర్పరినిగాను నియమించినవాడెవడు? నీవు ఆ ఐగుప్తీయుని చంపినట్లు నన్నును చంపవలెనని అనుకొనుచున్నావా అనెను. అందుకు మోషే - నిశ్యముగా ఈ సంగతి బయలు పాడెననుకొని భయపడెను.
లూకా 12:14, అపో. కార్యములు 7:35, అపో. కార్యములు 7:27-28

15. ఫరో ఆ సంగతి విని మోషేను చంపచూచెను గాని, మోషే ఫరో యెదుటనుండి పారిపోయి మిద్యాను దేశములో నిలిచిపోయి యొక బావియొద్ద కూర్చుండెను.
హెబ్రీయులకు 11:27, అపో. కార్యములు 7:29

అతను నమ్మకంవల్ల పారిపోయాడు, భయపడి కాదు (హెబ్రీయులకు 11:27). మిద్యాను సీనాయి ప్రదేశంలో ఉంది.

16. మిద్యాను యాజకునికి ఏడుగురు కుమార్తెలుండిరి. వారు వచ్చి తమ తండ్రి మందకు పెట్టుటకు నీళ్లు చేది తొట్లను నింపుచుండగా

17. మందకాపరులు వచ్చి వారిని తోలివేసిరి. అప్పుడు మోషే లేచి వారికి సహాయము చేసి మందకు నీళ్లు పెట్టెను.

ఆదికాండము 29:3 ఆదికాండము 29:10.

18. వారు తమ తండ్రియైన రగూయేలు నొద్దకు వచ్చినప్పుడు అతడు నేడు మీరింత త్వరగా ఎట్లు వచ్చితిరనెను.

మిద్యాను యాజికి రెండు పేర్లు – రగూయేలు, యిత్రో. యిత్రో అనేది బహుశా ఒక బిరుదు కావచ్చు. రగూయేలు అంటే “దేవుని స్నేహితుడు” అని అర్థం. యిత్రో అంటే “శ్రేష్ఠం” అని అర్థం. మిద్యానువాళ్ళు అబ్రాహాము సంతతే (ఆదికాండము 25:2). ఈ మనిషి బహుశా అబ్రాహాము సేవించే ఏకైక నిజ దేవుడైన యెహోవాను ఆరాధించేవాడై ఉండవచ్చు.

19. అందుకు వారు ఐగుప్తీయుడొకడు మందకాపరుల చేతిలోనుండి మమ్మును తప్పించి వడిగా నీళ్లు చేది మన మందకు పెట్టెననగా

20. అతడు తన కుమార్తెలతో - అతడెక్కడ? ఆ మనుష్యుని ఏల విడిచి వచ్చితిరి? భోజనమునకు అతని పిలుచుకొని రండనెను.

21. మోషే ఆ మనుష్యునితో నివసించుటకు సమ్మతించెను. అతడు తన కుమార్తెయైన సిప్పోరాను మోషే కిచ్చెను.

22. ఆమె ఒక కుమారుని కనినప్పుడు మోషే నేను అన్యదేశములో పరదేశినై యుంటిననుకొని వానికి గెర్షోము అనుపేరు పెట్టెను.
అపో. కార్యములు 7:6

గెర్షోం అంటే “అక్కడ నేను పరాయి మనిషిని” అని అర్థం.

23. ఆలాగున అనేక దినములు జరిగినమీదట ఐగుప్తు రాజు చనిపోయెను. ఇశ్రాయేలీయులు తాము చేయుచున్న వెట్టి పనులనుబట్టి నిట్టూర్పులు విడుచుచు మొరపెట్టు చుండగా, తమ వెట్టి పనులనుబట్టి వారుపెట్టిన మొర దేవునియొద్దకు చేరెను.

24. కాగా దేవుడు వారి మూలుగును విని, అబ్రాహాము ఇస్సాకు యాకోబులతో తాను చేసిన నిబంధనను జ్ఞాపకము చేసికొనెను.
అపో. కార్యములు 7:34

“ఒడంబడిక”– ఆదికాండము 12:1-3 ఆదికాండము 22:16-18 ఆదికాండము 26:2-5 ఆదికాండము 28:13-15 ఆదికాండము 33:18-19 కీర్తనల గ్రంథము 105:8 కీర్తనల గ్రంథము 105:42.

25. దేవుడు ఇశ్రాయేలీయులను చూచెను; దేవుడు వారియందు లక్ష్యముంచెను.

“సానుభూతి”– దేవుడు తన ప్రజల మూలుగులను వింటాడు. వారి విషయం జాలిపడతాడు (ఆదికాండము 6:5 ఆదికాండము 34:6-7 న్యాయాధిపతులు 2:18 కీర్తనల గ్రంథము 6:6-9 కీర్తనల గ్రంథము 38:9 కీర్తనల గ్రంథము 102:19-20 రోమీయులకు 8:23 రోమీయులకు 8:26).