1. మరియు ధూపము వేయుటకు నీవు ఒక వేదికను చేయవలెను తుమ్మకఱ్ఱతో దాని చేయవలెను.
ప్రకటన గ్రంథం 8:3, ప్రకటన గ్రంథం 9:13, హెబ్రీయులకు 9:4

“వేదిక”– నిర్గమకాండము 37:25-29.

2. దాని పొడుగు ఒక మూర దాని వెడల్పు ఒక మూర. అది చచ్చౌకముగా నుండవలెను. దాని యెత్తు రెండు మూరలు దాని కొమ్ములు దానితో ఏకాండమై యుండవలెను.

3. దాని పైభాగమునకును దాని నాలుగు ప్రక్కలకును దాని కొమ్ములకును మేలిమి బంగారు రేకులు పొదిగించి దానికి చుట్టు బంగారు జవను చేయవలెను.

4. దాని జవకు దిగువను దానికి రెండు బంగారు ఉంగరములు చేయవలెను; దాని రెండు ప్రక్కలయందలి దాని రెండు మూలలమీద వాటిని ఉంచవలెను.

5. అవి దాని మోయు మోతకఱ్ఱలకు స్థలములు. ఆ మోతకఱ్ఱలను తుమ్మకఱ్ఱతో చేసి వాటికి బంగారురేకు పొదిగింపవలెను.

6. సాక్ష్యపు మందసము నొద్దనుండు అడ్డతెర యెదుట, అనగా శాసనములమీది కరుణాపీఠము నెదుట నీవు దానిని ఉంచవలెను; అక్కడ నేను నిన్ను కలిసికొందును.

నిర్గమకాండము 26:31 నిర్గమకాండము 26:33 చూడండి. కొన్నిసార్లు ధూపవేదిక అతి పవిత్ర స్థలాన్ని మూసి ఉంచే తెర బయట ఉంది. మరి కొన్నిసార్లు లోపల ఉంది (హెబ్రీయులకు 9:3-4). ఈ వేదిక, దానిపై పరిమళ ద్రవ్యం మనుషుల పక్షాన దేవుణ్ణి వేడుకునే మధ్యవర్తిగా యేసుక్రీస్తును సూచిస్తున్నది (రోమీయులకు 8:34 హెబ్రీయులకు 7:25 హెబ్రీయులకు 9:24 యోహాను 17:1-26). మధ్యవర్తి అయిన క్రీస్తు ద్వారానే దేవుని ప్రజల స్తుతులూ ప్రార్థనలూ దేవుణ్ణి చేరుకుంటాయి. (హెబ్రీయులకు 13:15 ప్రకటన గ్రంథం 8:3-4).

7. అహరోను ప్రతిదినము ప్రొద్దున దానిమీద పరిమళద్రవ్యముల ధూపము వేయవలెను. అతడు ప్రదీపములను చక్కపరచునప్పుడు దానిమీద ఆ ధూపము వేయవలెను.
లూకా 1:9

పరిమళ ధూపం క్రీస్తు చేసే ప్రార్థనలకు సూచన.

8. మరియు సాయంకాలమందు అహరోను ప్రదీపములను వెలిగించునప్పుడు దానిమీద ధూపము వేయవలెను. అది మీ తరతరములకు యెహోవా సన్నిధిని నిత్యమైన ధూపము.

హెబ్రీయులకు 7:25 చూడండి.

9. మీరు దానిమీద అన్యధూపమునైనను దహనబలి సంబంధమైన ద్రవ్యమునైనను నైవేద్యమునైనను అర్పింపకూడదు; పానీయమునైనను దానిమీద పోయకూడదు.

తన ప్రజల పక్షంగా దేవునికి విన్నపాలు చేసేవాడుగా క్రీస్తును ఈ ధూపవేదిక, పరిమళం సూచిస్తున్నాయి. పరలోకంలో క్రీస్తు గాక మధ్యవర్తి మరింకెవరూ లేరు (1 తిమోతికి 2:5). కాబట్టి మరి ఏ ఇతర పరిమళమూ వేయకూడదని దేవుడు ఆదేశించాడు. హోమబలి మొదలైనవి ఈ వేదిక మీద వెయ్యకూడదు. ఆవరణలో ఉన్న బలిపీఠం మీదే ఇది జరగాలి. చిహ్నంగా ఉన్న ప్రతిదీ దేని స్థానంలో అది ఉండాలి. చిందరవందరగా ఉండకూడదు. లేవీయకాండము 10:1-2 నోట్ చూడండి.

10. మరియు అహరోను సంవత్సరమునకొకసారి ప్రాయశ్చిత్తార్థమైన పాప పరిహారార్థబలి రక్తమువలన దాని కొమ్ముల నిమిత్తము ప్రాయశ్చిత్తము చేయవలెను. మీ తరతరములకు సంవత్సరమునకు ఒకసారి అతడు దాని నిమిత్తము ప్రాయశ్చిత్తము చేయవలెను. అది యెహోవాకు అతి పరిశుద్ధమైనది.
హెబ్రీయులకు 9:7

లేవీయకాండము 16:18.

11. మరియు యెహోవా మోషేతో ఇట్లనెను నీవు ఇశ్రాయేలీయులను లెక్కింపవలెను.

12. వారు లెక్కింపబడు వేళకు ప్రతివాడు యెహోవాకు తన ప్రాణపరిక్రయ ధనము నిచ్చుకొనవలెను. ఆలాగు చేసినయెడల నీవు వారిని లెక్కించునప్పుడు వారిలో ఏ తెగులును పుట్టదు.

నిర్గమకాండము 38:25-26 సంఖ్యాకాండము 1:2 సంఖ్యాకాండము 26:2.

13. వారు ఇయ్యవలసినది ఏమనగా, లెక్కింపబడినవారిలో చేరు ప్రతివాడును పరిశుద్ధస్థలముయొక్క తులమునుబట్టి అరతులము ఇయ్యవలెను. ఆ తులము యిరువది చిన్నములు. ఆ అరతులము యెహోవాకు ప్రతిష్ఠార్పణ.
మత్తయి 17:24

14. ఇరువది సంవత్సరములు గాని అంతకంటె యెక్కువ వయస్సు గాని గలవారై లెక్కింపబడినవారిలో చేరు ప్రతివాడును యెహోవాకు అర్పణ నియ్యవలెను.

15. అది మీ ప్రాణములకు పరిక్రయధనముగా నుండునట్లు యెహోవాకు అర్పణ ఇచ్చునప్పుడు ధనవంతుడు అర తులముకంటె ఎక్కువ ఇయ్యకూడదు. బీదవాడు తక్కువ ఇయ్యకూడదు.

16. నీవు ఇశ్రాయేలీయుల యొద్దనుండి ప్రాయశ్చిత్తార్థమైన వెండి తీసికొని ప్రత్యక్షపు గుడారముయొక్క సేవనిమిత్తము దాని నియమింపవలెను. మీకు ప్రాయశ్చిత్తము కలుగునట్లు అది యెహోవా సన్నిధిని ఇశ్రాయేలీయులకు జ్ఞాపకార్థముగా నుండును.

17. మరియు యెహోవా మోషేతో ఇట్లనెను కడుగు కొనుటకు నీవు ఇత్తడితో దానికొక గంగాళమును ఇత్తడి పీటనుచేసి

18. ప్రత్యక్షపు గుడారమునకు బలిపీఠమునకు నడుమ దానిని ఉంచి నీళ్లతో నింపవలెను.

“గంగాళం”– నిర్గమకాండము 38:8 నిర్గమకాండము 40:30-32. దేవుని స్వభావం అగ్నిజ్వాలలంత తీవ్రమైన పవిత్రత గలది. అలాంటి దేవుని యాజులు అపవిత్రమైన దేహాలతో సమీపించడానికి సాహసించ కూడదు. బైబిల్లో నీరు దేవుని వాక్కుకు సూచన – ఎఫెసీయులకు 5:26. దేవుని వాక్కును వినడం మూలంగా, దాన్ని ధ్యానించి లోబడడం ద్వారా విశ్వాసులు శుద్ధులౌతారు (యోహాను 15:3 కీర్తనల గ్రంథము 119:9). అవతారమెత్తిన దేవుని వాక్కు అయిన క్రీస్తును కంచు గంగాళం సూచిస్తున్నది. (యోహాను 1:1 యోహాను 1:14 ప్రకటన గ్రంథం 19:13). ఆయన ద్వారా దేవుని వాక్కు వెల్లడైంది, గంగాళంలోని నీటిలాగా, ఆ వాక్కు ఆయనలో నిలిచి ఉంది. క్రొత్త ఒడంబడిక యాజులైన విశ్వాసులు క్రీస్తు మూలంగా తమ పాపాల అపవిత్రతనుండి శుద్ధులౌతారు (2 కోరింథీయులకు 7:1 హెబ్రీయులకు 10:19-22).

19. ఆ నీళ్లతో అహరోనును అతని కుమారులును తమ చేతులను కాళ్లను కడుగుకొనవలెను.

20. వారు ప్రత్యక్షపు గుడారములోనికి వెళ్లునప్పుడును సేవచేసి యెహోవాకు హోమధూపము నర్పించుటకు బలిపీఠము నొద్దకు వచ్చునప్పుడును తాము చావక యుండునట్లు నీళ్లతో కడుగుకొనవలెను.

21. తాము చావక యుండునట్లు తమ చేతులను కాళ్లను కడుగుకొనవలెను. అది వారికి, అనగా అతనికిని అతని సంతతికిని వారి తరతరములకు నిత్యమైన కట్టడగా నుండును.

22. మరియు యెహోవా మోషేతో ఇట్లనెను నీవు ముఖ్యమైన సుగంధ సంభారములలో

23. పరిశుద్ధస్థల సంబంధమైన తులము చొప్పున, అచ్చమైన గోపరసము ఐదువందల తులములును సుగంధముగల లవంగిపట్ట సగము, అనగా రెండువందల ఏబది తులముల యెత్తును

24. నిమ్మగడ్డి నూనె రెండువందల ఏబది తులముల యెత్తును, లవంగిపట్ట ఐదువందల తులములును ఒలీవ నూనె సంభారమును మూడు పళ్లును తీసికొని

25. వాటిని ప్రతిష్ఠాభిషేక తైలము, అనగా సుగంధద్రవ్యమేళకుని పనియైన పరిమళసంభారముగా చేయవలెను. అది ప్రతిష్ఠాభిషేక తైలమగును.

26. ఆ తైలముతో నీవు సాక్ష్యపు గుడారమును సాక్ష్యపు మందసమును

“నూనె”– నిర్గమకాండము 37:29 నిర్గమకాండము 40:9 లేవీయకాండము 8:10. నూనెతో అభిషేకం పరిచర్య నిమిత్తం పవిత్రాత్మ అభిషేకానికి గుర్తు (నిర్గమకాండము 27:20). “అభిషేకించాలి”– నిర్గమకాండము 40:9 లేవీయకాండము 8:10 సంఖ్యాకాండము 7:1.

27. బల్లను దాని ఉపకరణములన్నిటిని దీప వృక్షమును దాని ఉపకరణములను ధూపవేదికను

28. దహన బలిపీఠమును దాని ఉపకరణములన్నిటిని గంగాళమును దాని పీటను అభిషేకించి

29. అవి అతిపరి శుద్ధమైనవిగా ఉండునట్లు వాటిని ప్రతిష్ఠింపవలెను. వాటిని తగులు ప్రతివస్తువు ప్రతిష్ఠితమగును.

30. మరియు అహరోనును అతని కుమారులును నాకు యాజకులై యుండునట్లు నీవు వారిని అభిషేకించి ప్రతిష్ఠింపవలెను.

నిర్గమకాండము 29:7 లేవీయకాండము 8:12. ఇప్పుడు విశ్వాసులందరినీ క్రీస్తే పవిత్రపరచి అభిషేకిస్తాడు. దేవునికి యాజులుగా సేవ చేయడానికి నియమిస్తాడు (2 కోరింథీయులకు 1:21-22 1 యోహాను 2:20 1 యోహాను 2:27 యోహాను 14:16-17 యోహాను 20:21-22).

31. మరియు నీవు ఇశ్రాయేలీయులతోఇది మీ తరతరములకు నాకు ప్రతిష్ఠాభిషేకతైలమై యుండవలెను;

32. దానిని నర శరీరము మీద పోయకూడదు; దాని మేళనము చొప్పున దాని వంటి దేనినైనను చేయకూడదు. అది ప్రతిష్ఠితమైనది, అది మీకు ప్రతిష్ఠిత మైనదిగా నుండవలెను.

33. దానివంటిది కలుపువాడును అన్యునిమీద దానిని పోయువాడును తన ప్రజలలోనుండి కొట్టివేయబడవలెనని చెప్పుము.

“లేకుండా చేయాలి”– దేవుడు ఇంత నిష్కర్షగా ఎందుకు హెచ్చరిక ఇచ్చాడంటే నూనె పవిత్రాత్మకు గుర్తు. ఆయన శక్తినీ ప్రభావాన్నీ మనుషులెవరూ కనపరచలేరు. అలా చేయడానికి ఎవరూ ప్రయత్నించకూడదు. యాజులకు (కొత్త ఒడంబడిక విశ్వాసులందరికీ అన్నమాట) తప్ప ఈ అభిషేకం మరెవ్వరికీ ప్రసాదించడం అసాధ్యం. అలా ప్రయత్నించడం దుష్ట తలంపు (అపో. కార్యములు 8:18-23 చూడండి). సన్నిధి గుడారం సేవకు సంబంధించి మరణశిక్షను తెచ్చిపెట్టే ఇతర పొరపాట్ల గురించి నిర్గమకాండము 28:35 నోట్ చూడండి.

34. మరియు యెహోవా మోషేతో ఇట్లనెనునీవు పరిమళ ద్రవ్యములను, అనగా జటామాంసి గోపి చందనము గంధపుచెక్క అను ఈ పరిమళ ద్రవ్యములను స్వచ్ఛమైన సాంబ్రాణిని సమభాగములుగా తీసికొని

“పరిమళ ద్రవ్యాలు”– సువాసనగా, పవిత్రంగా ఉన్న ఈ ధూపద్రవ్యం క్రీస్తు తన ప్రజలకోసం చేసే విజ్ఞాపనలకు సూచన. 38 వచనంలో ఉన్న హెచ్చరిక బహుశా ప్రార్థన, ఆరాధన అనేవి స్వార్థపూరితమైన మనస్సుతో చెయ్యకూడదని చెప్పేందుకు అయి ఉండవచ్చు. తన ప్రయోజనాలు నెరవేర్చుకునేందుకు దీన్ని చెయ్యకూడదు. విశ్వాసి కాని వ్యక్తి ఎవరూ ఇలాంటి పవిత్రమైన సంగతుల జోలికి పోకూడదు. దేవుడు నియమించిన రీతిలో అర్పించని ఆరాధన దేవునికి అంగీకారం కాదు (యోహాను 4:23-24 కొలొస్సయులకు 2:18 కొలొస్సయులకు 2:23 సామెతలు 14:12).

35. వాటితో ధూపద్రవ్యమును చేయవలెను; అది సుగంధద్రవ్యమేళకుని పనిచొప్పున కలపబడి, ఉప్పు గలదియు స్వచ్ఛమైనదియు పరిశుద్ధమైనదియునైన సుగంధ ధూపసంభారము.

36. దానిలో కొంచెము పొడిచేసి నేను నిన్ను కలిసికొను ప్రత్యక్షపు గుడారము లోని సాక్ష్యపు మందసమునెదుట దాని నుంచవలెను. అది మీకు అతి పరిశుద్ధముగా ఉండవలెను.

37. నీవు చేయవలసిన ఆ ధూపద్రవ్యమును దాని మేళనము చొప్పున మీ నిమిత్తము మీరు చేసికొనకూడదు. అది యెహోవాకు ప్రతిష్ఠితమైనదిగా ఎంచవలెను.

38. దాని వాసన చూచుటకు దానివంటిది చేయువాడు తన ప్రజలలోనుండి కొట్టివేయబడును.