1. అటుతరువాత ప్రభువు డెబ్బదిమంది యితరులను నియమించి, తాను వెళ్లబోవు ప్రతి ఊరికిని ప్రతిచోటికిని తనకంటె ముందు ఇద్దరిద్దరినిగా పంపెను.

పన్నెండుమంది ప్రధాన శిష్యులను గాక ఈ ఇతర శిష్యులను పంపడం గురించి లూకా ఒక్కడే రాశాడు. యేసు వారికిచ్చిన ఆదేశాలు ఇతర చోట్ల ఆయన పలికిన మాటలవంటివి.

2. పంపినప్పుడాయన వారితో ఇట్లనెను కోత విస్తారముగా ఉన్నది గాని పనివారు కొద్దిమందియే; కాబట్టి కోత యజమానుని తన కోతకు పనివారిని పంప వేడుకొనుడి.

మత్తయి 9:37-38.

3. మీరు వెళ్లుడి; ఇదిగో తోడేళ్లమధ్యకు గొఱ్ఱె పిల్లలను పంపినట్టు నేను మిమ్మును పంపుచున్నాను.

మత్తయి 10:16.

4. మీరు సంచినైనను జాలెనైనను చెప్పులనైనను తీసికొనిపోవద్దు;
2 రాజులు 4:29

మత్తయి 10:9-10. ప్రభువు జెరుసలం ప్రయాణంలో ఉన్నాడు (లూకా 9:51). త్వరగా గమ్యం చేరుకోవాలి.

5. త్రోవలో ఎవనినైనను కుశల ప్రశ్నలడుగవద్దు; మీరు ఏ యింటనైనను ప్రవేశించునప్పుడుఈ యింటికి సమాధానమగు గాక అని మొదట చెప్పుడి.

మత్తయి 10:10-15.

6. సమాధానపాత్రుడు అక్కడ నుండినయెడల మీ సమాధానము అతనిమీద నిలుచును; లేనియెడల అది మీకు తిరిగి వచ్చును.

7. వారు మీకిచ్చు పదార్థములను తినుచు త్రాగుచు ఆ యింటిలోనే యుండుడి, పనివాడు తన జీతమునకు పాత్రుడు. ఇంటింటికి తిరుగవద్దు.

8. మరియు మీరు ఏ పట్టణములోనైన ప్రవేశించునప్పుడు వారు మిమ్మును చేర్చుకొంటే మీ ముందరపెట్టునవి తినుడి.

9. అందులో నున్న రోగులను స్వస్థపరచుడి దేవుని రాజ్యము మీ దగ్గరకు వచ్చియున్నదని వారితో చెప్పుడి.

“దేవుని రాజ్యం”గురించి మత్తయి 4:17 నోట్ చూడండి.

10. మీరు ఏ పట్టణములోనైన ప్రవేశించునప్పుడు వారు మిమ్మును చేర్చుకొనక పోయిన యెడల

11. మీరు దాని వీధులలోనికి పోయిమా పాదములకు అంటిన మీ పట్టణపు ధూళినికూడ మీ యెదుటనే దులిపివేయుచున్నాము; అయినను దేవుని రాజ్యము సమీపించి యున్నదని తెలిసికొనుడని చెప్పుడి.

12. ఆ పట్టణపు గతికంటె సొదొమ పట్టణపు గతి ఆ దినమున ఓర్వతగినదై యుండునని మీతో చెప్పుచున్నాను.
ఆదికాండము 19:24-25

ఆ రోజున అంటే దేవుని తీర్పురోజున అని అర్థం – మత్తయి 10:15.

13. అయ్యో కొరాజీనా, అయ్యో బేత్సయిదా, మీ మధ్య చేయబడిన అద్భుతములు తూరు సీదోను పట్టణములలో చేయబడినయెడల ఆ పట్టణములవారు పూర్వమే గోనెపట్ట కట్టుకొని బూడిదె వేసికొని కూర్చుండి మారుమనస్సు పొందియుందురు.
యోవేలు 3:4-8, ఆమోసు 1:9-10, జెకర్యా 9:2-4

మత్తయి 11:20-24.

14. అయినను విమర్శకాలము నందు మీ గతికంటె తూరు సీదోను పట్టణములవారి గతి ఓర్వదగినదై యుండును.
యోవేలు 3:4-8, ఆమోసు 1:9-10, జెకర్యా 9:2-4

15. ఓ కపెర్నహూమా, ఆకాశము మట్టుకు హెచ్చింపబడెదవా? నీవు పాతాళమువరకు దిగిపోయెదవు.
యెషయా 14:13, యెషయా 14:15

16. మీ మాట వినువాడు నా మాట వినును, మిమ్మును నిరాకరించువాడు నన్ను నిరాకరించును, నన్ను నిరాకరించువాడు నన్ను పంపినవానిని నిరాకరించుననెను.

లూకా 9:48; మత్తయి 10:40; మత్తయి 18:5; యోహాను 12:44; యోహాను 13:20.

17. ఆ డెబ్బదిమంది శిష్యులు సంతోషముతో తిరిగి వచ్చి ప్రభువా, దయ్యములు కూడ నీ నామమువలన మాకు లోబడుచున్నవని చెప్పగా

యేసు పేరులోని ప్రభావం కొంత గమనించండి – మత్తయి 10:1; మార్కు 16:17; అపో. కార్యములు 5:6; అపో. కార్యములు 8:7; అపో. కార్యములు 16:18.

18. ఆయన సాతాను మెరుపువలె ఆకాశమునుండి పడుట చూచితిని.
యెషయా 14:12

దయ్యాలను వెళ్ళగొట్టడం దేవుని రాజ్యం దగ్గరలో ఉన్నదనడానికీ, చివరికి సైతాను ఓడిపోవడం ఖాయం అన్నదానికీ సూచన. మత్తయి 12:22-29; యోహాను 12:31 పోల్చి చూడండి. సైతాను గురించి నోట్స్ మత్తయి 4:1-11; 1 దినవృత్తాంతములు 21:1; మొ।।.

19. ఇదిగో పాములను తేళ్లను త్రొక్కుటకును శత్రువు బలమంతటిమీదను మీకు అధికారము అనుగ్రహించియున్నాను; ఏదియు మీ కెంతమాత్రమును హానిచేయదు.
ఆదికాండము 3:15, కీర్తనల గ్రంథము 91:13

యేసు వారికి పాములమీదా తేళ్ళమీదా, పాములు తేళ్ళవంటి దయ్యాలమీదా కూడా అధికారం ఇచ్చాడు. ముఖ్య శత్రువు సైతానే. మార్కు 16:17-18; కీర్తనల గ్రంథము 91:13; అపో. కార్యములు 28:3-6; ఎఫెసీయులకు 6:12; యాకోబు 4:7; 1 పేతురు 5:8-9; ప్రకటన గ్రంథం 12:10-11.

20. అయినను దయ్యములు మీకు లోబడుచున్నవని సంతోషింపక మీ పేరులు పరలోకమందు వ్రాయబడి యున్నవని సంతోషించుడని వారితో చెప్పెను.
నిర్గమకాండము 32:32

తమకు పాపవిముక్తి, శాశ్వత జీవం ఉన్నాయన్న సత్యమే వారి ఆనందానికి ఆధారం కావాలి గాని తాము కొంత అధికారాన్ని, ప్రభావాన్ని ప్రదర్శించగలిగామని కాదు. “పరలోకంలో వ్రాసి ఉన్నందుచేత”– నిర్గమకాండము 32:32; హెబ్రీయులకు 12:23; ప్రకటన గ్రంథం 3:5; ప్రకటన గ్రంథం 20:12.

21. ఆ గడియలోనే యేసు పరిశుద్ధాత్మయందు బహుగా ఆనందించి - తండ్రీ, ఆకాశమునకును భూమికిని ప్రభువా, నీవు జ్ఞానులకును వివేకులకును ఈ సంగతులను మరుగు చేసి పసిబాలురకు బయలుపరచినావని నిన్ను స్తుతించుచున్నాను; అవును తండ్రీ, ఆలాగు నీ దృష్టికి అనుకూలమాయెను.

మత్తయి 11:25-26. శుభవార్తల్లో క్రీస్తు ఆనందం మరి రెండు చోట్ల మాత్రమే రాసి ఉంది – యోహాను 15:11; యోహాను 17:13. ఇతర శుభవార్తల రచయితలకంటే ఎక్కువ సార్లు లూకా పవిత్రాత్మను పేరుతో ప్రస్తావించాడు.

22. సమస్తమును నా తండ్రిచేత నాకు అప్పగింపబడియున్నది; కుమారుడెవడో, తండ్రి తప్ప మరెవడును ఎరుగడు; తండ్రి ఎవడో, కుమారుడును కుమారుడెవనికి ఆయనను బయలు పరచనుద్దేశించునో వాడును తప్ప, మరెవడును ఎరుగడని చెప్పెను.

23. అప్పుడాయన తన శిష్యులవైపు తిరిగి - మీరు చూచుచున్న వాటిని చూచు కన్నులు ధన్యములైనవి;

యోహాను 13:16-17.

24. అనేకమంది ప్రవక్తలును రాజులును, మీరు చూచుచున్నవి చూడగోరి చూడకయు, వినగోరి వినకయు ఉండిరని మీతో చెప్పుచున్నానని యేకాంతమందు వారితో అనెను.

25. ఇదిగో ఒకప్పుడు ధర్మశాస్త్రోపదేశకుడొకడు లేచి బోధకుడా, నిత్యజీవమునకు వారసుడనగుటకు నేనేమి చేయవలెనని ఆయనను శోధించుచు అడిగెను.

పాత ఒడంబడిక గ్రంథంలోని మోషే ధర్మశాస్త్రంలో ఇతను ఆరితేరినవాడు. ఇతని ప్రశ్న యోహాను 19:16 లోని ప్రశ్నలాగా ఉంది. ఇది నిజంగా అతి ప్రాముఖ్యమైన ప్రశ్న. అయితే ఇలా అడిగే వారందరూ కూడా క్రీస్తు చెప్పిన జవాబును అనుసరించేందుకు మనసు చూపరు.

26. అందుకాయన ధర్మశాస్త్రమందేమి వ్రాయబడియున్నది? నీవేమి చదువుచున్నావని అతని నడుగగా

యేసుకు ఈ సమాచారం అవసరమై ఇలా అడగలేదు, ఆ మనిషి మనసులో ఉన్నదాన్ని అతడు బయటికి చెప్పాలనే.

27. అతడు - నీ దేవుడైన ప్రభువును నీ పూర్ణహృదయముతోను, నీ పూర్ణమనస్సుతోను, నీ పూర్ణశక్తితోను, నీ పూర్ణవివేకముతోను ప్రేమింపవలెననియు, నిన్నువలె నీ పొరుగువాని ప్రేమింపవలెననియు, వ్రాయబడియున్నాదని చెప్పెను.
లేవీయకాండము 19:18, ద్వితీయోపదేశకాండము 6:5, ద్వితీయోపదేశకాండము 10:12, యెహోషువ 22:5

ఇది చక్కటి జవాబు. మత్తయి 22:36-40 చూడండి. అక్కడ అతడు చెప్పిన వచనాలు ద్వితీయోపదేశకాండము 6:5; లేవీయకాండము 19:18 లో ఉన్నాయి.

28. అందుకాయన నీవు సరిగా ఉత్తరమిచ్చితివి; ఆలాగు చేయుము అప్పుడు జీవించెదవని అతనితో చెప్పెను.
లేవీయకాండము 18:5

దేవుని సత్యాన్ని కేవలం ఎరిగి ఉండడం, లేక దాన్ని నోటితో వల్లించడం ఎవరికీ శాశ్వత జీవాన్ని ఇవ్వదు. రోమీయులకు 2:13; యాకోబు 1:22-25 పోల్చి చూడండి. ఈ మనిషి తనకు తెలిసిన సత్యాన్ని ఆచరణలో పెట్టలేదు (రోమీయులకు 3:23). మనుషులు ఇది చేస్తే జీవిస్తారు, కానీ చెయ్యరు.

29. అయితే తాను నీతిమంతుడైనట్టు కనబరచుకొనగోరి, అతడు అవును గాని నా పొరుగువాడెవడని యేసునడిగెను.

అనేకమంది మనుషులు చేసే పెద్ద తప్పు ఇదే. లూకా 16:15 చూడండి. సహజంగా తాము ఏమిటో అంతకన్నా మంచివారుగా మనుషులు తమ గురించి అనుకోవాలని చూస్తారు. తాము పాపులమనీ, దేవుని ధర్మశాస్త్రాన్ని పాటించలేని నిస్సహాయులమనీ ఒప్పుకునేందుకు ఇష్టపడరు. ఎవరైనా సరే తనను న్యాయవంతుడుగా ఎంచడం మాని, దేవుని ఎదుట తన దోషాన్ని ఒప్పుకోవాలి. అంతవరకు ఆశాభావానికి అతనికి ఆధారం ఏమీ లేదు (రోమీయులకు 3:19-20).

30. అందుకు యేసు ఇట్లనెనుఒక మనుష్యుడు యెరూషలేము నుండి యెరికోపట్టణమునకు దిగి వెళ్లుచు దొంగల చేతిలో చిక్కెను; వారు అతని బట్టలు దోచుకొని, అతని కొట్టి కొరప్రాణముతో విడిచి

లూకా ఒక్కడే ఈ ఉదాహరణ రాశాడు. పైపైన చూస్తే పొరుగువాడు, ప్రేమ అంటే ఏమిటో ఇది తెలియ జేస్తున్నది. ధర్మశాస్త్ర పండితుడు అడిగిన రెండో ప్రశ్నకు జవాబిస్తున్నది. అయితే అతని మొదటి ప్రశ్నకు (వ 25) జవాబిచ్చే మరింత లోతైన భావం ఇందులో దాగి ఉండవచ్చు. ఆ ప్రశ్నకు ఈ ఉదాహరణ ద్వారా జవాబు ఇవ్వకపోతే యేసు అసలు ఆ ప్రశ్నకు ఇక్కడ జవాబియ్యలేదనే అనుకోవాలి. కానీ మనం అలా అనుకోవచ్చా? అయితే ఈ ఉదాహరణలో ఆధ్యాత్మిక అర్థాలను చెప్పేటప్పుడు ప్రతి విషయాన్ని వివరించి నొక్కి చెప్పడం కూడా వివేకం కాకపోవచ్చు. మత్తయి 13:18-23 నోట్స్ చూడండి. జెరుసలం సముద్ర మట్టానికి దాదాపు 800 మీటర్లు ఎగువన ఉంది. యెరికో అక్కడికి 27 కి మీ దూరాన సముద్ర మట్టానికి దాదాపు 250 మీటర్లు దిగువన ఉంది. జెరుసలం మహా రాజైన దేవుని నగరం (మత్తయి 5:35). యెరికో శాపం కింద ఉన్న నగరం (యెహోషువ 6:26). యెరికోకు వెళ్ళే ఏటవాలుగా బండ రాళ్ళతో ఉన్న దారిలో దోపిడీ దొంగలు పొంచి ఉండేందుకు వీలైన తావులు ఉన్నాయి. ఈ లోకం బండరాళ్ళ మయంగా ఉన్న ప్రదేశం. సైతాను, వాడి దాసులు మనుషుల దగ్గర ఉన్నదంతా దోచుకోవాలని పొంచి ఉన్నారు (యోహాను 8:44; 1 పేతురు 5:8). దేవుడు ఆదిలో మనుషులకిచ్చిన నీతినిజాయితీలను వారు దోచుకొని, మనుషుల్ని తీవ్రంగా గాయపరచి కొనప్రాణంతో వదిలిపోయారు – అంటే భౌతికంగా ప్రాణం ఉంది గానీ ఆధ్యాత్మికంగా కాదు (ఆదికాండము 2:17; ఆదికాండము 3:1-5; ఎఫెసీయులకు 2:1-3).

31. అప్పుడొక యాజకుడు ఆ త్రోవను వెళ్లుట తటస్థించెను. అతడు అతనిని చూచి, ప్రక్కగా పోయెను.

యాజుల గురించి నోట్స్ నిర్గమకాండము 28:1. లేవివారి గురించి సంఖ్యాకాండము 1:47-50 చూడండి. ఈ ఇద్దరిలో ఎవరూ తనలాగా తన పొరుగువాన్ని ప్రేమించలేదు. వేరొక రీతిలో చెప్పాలంటే ఏ ధర్మశాస్త్రానికి ఈ యాజులూ లేవివారూ ప్రతినిధులుగా ఉన్నారో ఆ ధర్మశాస్త్రం సైతానుచేత, చావు దెబ్బలు తిన్న పాపికి ఎలాంటి సహాయమూ చేయలేదు. అపో. కార్యములు 13:38-39; రోమీయులకు 8:3; గలతియులకు 2:16; హెబ్రీయులకు 8:7-8; హెబ్రీయులకు 9:9-10; హెబ్రీయులకు 10:1-4, హెబ్రీయులకు 10:11 చూడండి.

32. ఆలాగుననే లేవీయుడొకడు ఆ చోటికివచ్చి చూచి ప్రక్కగా పోయెను.

33. అయితే ఒక సమరయుడు ప్రయాణమై పోవుచు, అతడు పడియున్నచోటికి వచ్చి

సమరయవారి గురించి నోట్స్ యోహాను 4:4-9. యూదులు వీరిని చిన్న చూపు చూశారు. వారితో ఎలాంటి సాంగత్యం చేయలేదు. ఈ సమరయవాడు ప్రేమ అంటే ఏమిటో, పొరుగువాడి బాధ్యతలేమిటో చూపించాడు. మనకు ఎవరు ఎదురైతే వాడే మన పొరుగువాడు. అతని జాతి, దేశం, రంగు, మతం ఏదైనా సరే. ఈ వచనాల ఆధ్యాత్మిక భావం వ 25లోని ప్రశ్నకు జవాబిస్తున్నది. ఈ ఉదాహరణలోని మనిషి చనిపోయేందుకు సిద్ధంగా ఉన్నాడు. తన ప్రాణం కాపాడు కునేందుకు, తిరిగి తనకు ప్రాణం పోసేందుకు ఏమీ చేసుకోలేని స్థితిలో ఉన్నాడు. అతడు పూర్తిగా నిస్సహాయుడు. రోమీయులకు 5:6; రోమీయులకు 8:7; ఎఫెసీయులకు 2:4-5 పోల్చి చూడండి. మనుషుల తిరస్కారానికీ ద్వేషానికీ గురి అయిన క్రీస్తును ఈ సమరయవాడు సూచిస్తూ ఉండవచ్చు యెషయా 53:3. క్రీస్తును సమరయవాడు అని కొందరు పిలిచారు కూడా యోహాను 8:48-49. దిక్కులేని పాపులు తమకు తాము చేసుకోలేనిదాన్ని ప్రభువైన యేసుక్రీస్తు వారికి చేస్తాడు – అంటే వారిని రక్షించి శాశ్వత జీవాన్ని ఇస్తాడు లూకా 19:10; యోహాను 3:16-17; యోహాను 10:27-28.

34. అతనిని చూచి, అతనిమీద జాలిపడి, దగ్గరకుపోయి, నూనెయు ద్రాక్షారసమును పోసి అతని గాయములను కట్టి, తన వాహనముమీద ఎక్కించి యొక పూటకూళ్లవాని యింటికి తీసికొనిపోయి అతని పరామర్శించెను.

35. మరునాడతడు రెండు దేనారములు తీసి ఆ పూట కూళ్లవానికిచ్చి ఇతని పరామర్శించుము, నీవింకేమైనను ఖర్చు చేసినయెడల నేను మరల వచ్చునప్పుడు అది నీకు తీర్చెదనని అతనితో చెప్పి పోయెను.

36. కాగా దొంగలచేతిలో చిక్కినవానికి ఈ ముగ్గురిలో ఎవడు పొరుగువాడాయెనని నీకు తోచుచున్నది అని యేసు అడుగగా అతడు - అతనిమీద జాలి పడినవాడే అనెను.

ఈ కథలో మరింత లోతైన ఆధ్యాత్మిక అంతరార్థాలు వెతకాలన్న ప్రయత్నంలో ధర్మశాస్త్ర విద్వాంసునికి యేసు ఇచ్చిన వివరణను మరిచిపోకూడదు. ఇది చాలా ఆచరణయుక్తమైన వివరణ. మనం అందరిపట్లా ప్రేమ చూపాలని దేవుడు ఆజ్ఞాపిస్తున్నాడు. వారు ఎవరైనప్పటికీ అవసరంలో ఉన్నవారికి సహాయపడేందుకు మనం సిద్ధంగా ఉండాలి గానీ ఊరికే క్రీస్తు చెప్పిన ఉదాహరణల అర్థాన్ని చర్చించుకుంటూ కూర్చోవడం కాదు (మత్తయి 5:43-48; యోహాను 13:34; రోమీయులకు 13:8-10; గలతియులకు 6:10; 1 యోహాను 3:16-18).

37. అందుకు యేసు నీవును వెళ్లి ఆలాగు చేయుమని అతనితో చెప్పెను.

38. అంతట వారు ప్రయాణమై పోవుచుండగా, ఆయన యొక గ్రామములో ప్రవేశించెను. మార్త అను ఒక స్త్రీ ఆయనను తన యింట చేర్చుకొనెను.

ఈ గ్రామం బేతనీ, జెరుసలంకు సుమారు 3 కిలోమీటర్లు దూరాన ఉంది. మత్తయి 21:17; యోహాను 11:1 చూడండి.

39. ఆమెకు మరియ అను సహోదరియుండెను. ఈమె యేసు పాదములయొద్ద కూర్చుండి ఆయన బోధ వినుచుండెను.

40. మార్త విస్తారమైన పని పెట్టుకొనుటచేత తొందరపడి, ఆయనయొద్దకు వచ్చి ప్రభువా, నేను ఒంటరిగా పనిచేయుటకు నా సహోదరి నన్ను విడిచి పెట్టినందున, నీకు చింతలేదా? నాకు సహాయము చేయుమని ఆమెతో చెప్పుమనెను.

మార్కు 4:38. యేసుప్రభువుకు లోకమంతటి గురించి శ్రద్ధ వహించే మనసు, ప్రతి ఒక్కరికీ గొప్ప మేలు జరగాలని కోరే హృదయం ఉన్నాయని తెలియక ఈమె యేసుప్రభువును మందలిస్తున్నది. వంటపని, తాను పడుతున్న కష్టం గురించే ఆమె ఆలోచిస్తున్నది. “నన్ను చూడు, నేనింత కష్టపడుతున్నాను, నువ్వేమో ఎవరూ నాకు సహాయం చేయకుండా అడ్డుపడుతున్నావు” అని ఆమె మాట భావం.

41. అందుకు ప్రభువు మార్తా, మార్తా, నీవనేకమైన పనులను గూర్చి విచారము కలిగి తొందరపడుచున్నావు గాని అవసరమైనది ఒక్కటే

శారీరికంగా పని చేయడం, భోజనం తయారు చెయ్యడం ఉపయోగం లేనివనీ, అనవసరమనీ యేసు అనడం లేదు. ఏది ప్రాముఖ్యమో చూపిస్తున్నాడు, అంతే. ఆయన వారితో మరి కొద్దికాలమే ఉండబోతున్నాడు. ఉపదేశించవలసిన సత్యం చాలా ఉంది. మరియ ఆ అవకాశాన్ని ఉపయోగించుకొంటూ ఉంది. మార్త అయితే ఇతర పనుల్లో పడి అవకాశాన్ని జారవిడుచుకొంటూ ఉంది.

42. మరియ ఉత్తమమైనదానిని ఏర్పరచుకొనెను, అది ఆమె యొద్దనుండి తీసివేయబడదని ఆమెతో చెప్పెను.