1. కావున మీరు ప్రియులైన పిల్లలవలె దేవునిపోలి నడుచుకొనుడి.

మత్తయి 5:48. దేవుని పిల్లలు తమ తండ్రిలాగానే ప్రవర్తించాలి. “ప్రియమైన పిల్లలు”– 1 యోహాను 3:1.

2. క్రీస్తు మిమ్మును ప్రేమించి, పరిమళ వాసనగా ఉండుటకు మనకొరకు తన్నుతాను దేవునికి అర్పణముగాను బలిగాను అప్పగించుకొనెను; ఆలాగుననే మీరును ప్రేమగలిగి నడుచుకొనుడి.
నిర్గమకాండము 29:18, కీర్తనల గ్రంథము 40:6

“క్రీస్తు మనలను ప్రేమించి”– వ 25; యోహాను 13:1; యోహాను 15:9, యోహాను 15:12; రోమీయులకు 8:37; గలతియులకు 2:20. “పరిమళమైన...బలిగా”– మత్తయి 20:28; మత్తయి 26:28; యోహాను 1:29; రోమీయులకు 3:25; రోమీయులకు 5:8; 2 కోరింథీయులకు 5:14; హెబ్రీయులకు 9:14; హెబ్రీయులకు 10:10, హెబ్రీయులకు 10:14; 1 పేతురు 2:24; 1 పేతురు 3:18. పరిమళం అనే పదం క్రీస్తుకు సూచనగా ఉన్న పాత ఒడంబడిక అర్పణలను గుర్తుకు తెస్తున్నది (లేవీయకాండము 1:9, లేవీయకాండము 1:13, లేవీయకాండము 1:17 మొ।।). “ప్రేమభావం”– ఎఫెసీయులకు 3:19; ఎఫెసీయులకు 4:15; యోహాను 13:34; రోమీయులకు 12:10; గలతియులకు 5:6, గలతియులకు 5:13; 1 యోహాను 3:11, 1 యోహాను 3:16-18; 1 యోహాను 4:7-8.

3. మీలో జారత్వమే గాని, యే విధమైన అపవిత్రతయే గాని, లోభత్వమేగాని, వీటి పేరైనను ఎత్తకూడదు, ఇదే పరిశుద్ధులకు తగినది.

ఎఫెసీయులకు 4:1; 1 కోరింథీయులకు 6:13-18; 1 పేతురు 1:14-15; 1 యోహాను 2:6. “అత్యాశ”– వ 5; లూకా 12:15-21; 1 తిమోతికి 6:6-10; హెబ్రీయులకు 13:5; 2 పేతురు 1:4.

4. కృతజ్ఞతావచనమే మీరుచ్చరింపవలెను గాని మీరు బూతులైనను, పోకిరిమాటలైనను, సరసోక్తులైనను ఉచ్చరింపకూడదు; ఇవి మీకు తగవు.

ఎఫెసీయులకు 4:29; కొలొస్సయులకు 3:8. “కృతజ్ఞతలు”– వ 20; కొలొస్సయులకు 3:17; ఫిలిప్పీయులకు 4:6; 1 థెస్సలొనీకయులకు 5:18; హెబ్రీయులకు 13:15; కీర్తనల గ్రంథము 50:14; కీర్తనల గ్రంథము 113:1; లేవీయకాండము 7:12-13.

5. వ్యభిచారియైనను, అపవిత్రుడైనను, విగ్రహారాధికుడై యున్న లోభియైనను, క్రీస్తుయొక్కయు దేవునియొక్కయు రాజ్యమునకు హక్కుదారుడు కాడను సంగతి మీకు నిశ్చయముగా తెలియును.

1 కోరింథీయులకు 6:9-11; గలతియులకు 5:21; హెబ్రీయులకు 10:26-27; 1 యోహాను 3:9-10. “విగ్రహ పూజకుడు”– అత్యాశపరుడు విగ్రహాలను పూజించేవారి వంటివాడే. ఎందుకంటే సరిగ్గా చూస్తూ దేనిపై అతనికి అత్యాశ ఉందో, దాన్ని అతడు పూజిస్తున్నాడన్నమాటే. అతని విగ్రహం అతని హృదయంలో ఉంది – యెహెఙ్కేలు 14:3-4. “రాజ్యం”– మత్తయి 4:17; రోమీయులకు 14:17; కొలొస్సయులకు 1:13 చూడండి.

6. వ్యర్థమైన మాటలవలన ఎవడును మిమ్మును మోసపరచ నియ్యకుడి; ఇట్టి క్రియల వలన దేవుని ఉగ్రత అవిధేయులైన వారి మీదికి వచ్చును

“మోసగించకుండా”– 1 కోరింథీయులకు 6:9; గలతియులకు 6:7; 1 యోహాను 3:7-8. మనుషులు (కొందరు క్రైస్తవులు కూడా) తమ ఇష్టం వచ్చినట్టు పాపాలు చేస్తూ కూడా దేవుని రాజ్యంలో తమకు చోటుందని తమను తాము నమ్మించుకుంటారు, ఇతరులను నమ్మించేలా ప్రయత్నిస్తారు. అలాంటివారు చేసేది బహు నీచమైన వంచన, కేవలం వట్టి మాటలు. “దేవుని కోపం” గురించి సంఖ్యాకాండము 23:5; ద్వితీయోపదేశకాండము 4:25; కీర్తనల గ్రంథము 90:7-11; యోహాను 3:36; రోమీయులకు 1:18 మొ।। చూడండి.

7. గనుక మీరు అట్టివారితో పాలివారై యుండకుడి.

2 కోరింథీయులకు 6:14-18.

8. మీరు పూర్వమందు చీకటియై యుంటిరి, ఇప్పుడైతే ప్రభువునందు వెలుగైయున్నారు.

పాపులు కేవలం ఆధ్యాత్మిక అంధకారంలో ఉండడం మాత్రమే కాదు, వారే అంధకారం. అలాగే విశ్వాసులు వెలుగులో ఉండడం మాత్రమే కాదు, క్రీస్తులో వారే ఆ వెలుగు (మత్తయి 5:14-16). వారు ఏమిటో దాని ప్రకారం నడుచుకోవడం వారికి దక్కిన ఆధిక్యత, విధి. దేవుడు వెలుగు (1 యోహాను 1:5). అందువల్ల ఆయన పిల్లలు వెలుగు సంతానం, కేవలం శుద్ధుడూ పవిత్రుడూ అయినవాని సంతానం. అందువల్ల వారు కేవలం శుద్ధులుగా పవిత్రులుగా నడుచుకోవాలి.

9. వెలుగు ఫలము సమస్తవిధములైన మంచితనము, నీతి, సత్యమను వాటిలో కనబడుచున్నది.

“ఫలం”– మత్తయి 7:17-20; యోహాను 15:1-8; రోమీయులకు 7:4. “మంచితనం”– గలతియులకు 5:22. “నీతినిజాయితీ”– ఎఫెసీయులకు 4:24; మత్తయి 5:6; రోమీయులకు 6:18; రోమీయులకు 8:4; రోమీయులకు 14:17-18; 2 కోరింథీయులకు 5:21; ఫిలిప్పీయులకు 1:11; 1 తిమోతికి 6:11; 1 పేతురు 2:24; కీర్తనల గ్రంథము 15:1-2. “సత్యం”– ఎఫెసీయులకు 4:15, ఎఫెసీయులకు 4:21, ఎఫెసీయులకు 4:25.

10. గనుక ప్రభువుకేది ప్రీతికరమైనదో దానిని పరీక్షించుచు, వెలుగు సంబంధులవలె నడుచుకొనుడి

రోమీయులకు 12:2; 2 కోరింథీయులకు 5:9. యేసుప్రభువుకు ఇష్టమైనదేమిటో తెలుసుకుని వాటిని చేయడమే విశ్వాసికి జీవిత ఆశయం కావాలి.

11. నిష్ఫలమైన అంధకార క్రియలలో పాలి వారైయుండక వాటిని ఖండించుడి.

“చీకటి వ్యవహారాలు”– యోహాను 3:19-20; రోమీయులకు 13:12-14. విశ్వాసులు అలాంటి వాటిని బయట పెట్టవలసిన విధానం వాటి గురించి మాట్లాడ్డం ద్వారా కాదు (వ 12,13), “వెలుగు”గా ఉండడం ద్వారా, వెలుగు సంతానంగా జీవించడం ద్వారా (వ 8), దేవుని సత్యం పలకడం ద్వారా.

12. ఏలయనగా అట్టి క్రియలు చేయువారు రహస్యమందు జరిగించు పనులను గూర్చి మాటలాడుటయైనను అవమానకరమై యున్నది.
యెహెఙ్కేలు 20:41

ఎఫెసీయులకు 2:2; కొలొస్సయులకు 3:6; తీతుకు 1:16. మనుషులు దేవునికి అవిధేయులై ఆయన వెలుగుకు రాకపోవడం మూలంగా చీకటిలో ఉన్నారు (యోహాను 3:20).

13. సమస్తమును ఖండింపబడి వెలుగుచేత ప్రత్యక్షపరచబడును; ప్రత్యక్షపరచునది ఏదో అది వెలుగేగదా

14. అందుచేత నిద్రించుచున్న నీవు మేల్కొని మృతులలోనుండి లెమ్ము, క్రీస్తు నీమీద ప్రకాశించునని ఆయన చెప్పు చున్నాడు.
యెషయా 52:1, యెషయా 60:1

ఇది పాత ఒడంబడిక గ్రంథంనుంచి ఎత్తి రాసిన వచనం కాదు గాని అందులోని ఏదైనా వచనం ఆధారంగా రాసినది కావచ్చు – యెషయా 60:1; మలాకీ 4:2. ఈ మాటలు ఏదైనా పురాతన క్రైస్తవ గీతంలోవి కావచ్చు. “మృతి చెందిన”– చీకటిలో, పాపంలో ఉన్నవారు ఆత్మ సంబంధంగా నిద్రలో ఉన్నవారు, చనిపోయినవారు (ఎఫెసీయులకు 2:1). తన ప్రజల ద్వారా క్రీస్తు వెలుగు లోకంలో ప్రకాశిస్తూ ఉంది. నిద్రలో, మరణంలో ఉన్నవారు లేచి క్రీస్తు చెంతకు రావాలి.

15. దినములు చెడ్డవి గనుక, మీరు సమయమును పోనియ్యక సద్వినియోగము చేసికొనుచు,

లోకంలో తన వెలుగు ప్రకాశించనిచ్చేందుకు అవకాశాలు వస్తాయి. మనం వాటిని చక్కగా వాడుకోవాలని పౌలు ఉద్దేశం. “చెడ్డవి”– గలతియులకు 1:4; ఫిలిప్పీయులకు 2:15; 2 తిమోతికి 3:1.

16. అజ్ఞానులవలె కాక, జ్ఞానులవలె నడుచుకొనునట్లు జాగ్రత్తగా చూచుకొనుడి.
ఆమోసు 5:13

“తెలివైన వారిలాగే”– కొలొస్సయులకు 4:5; మత్తయి 10:16. ఇలాంటి భ్రష్ట లోకంలో ఎలా జీవించాలో ఎరిగే జ్ఞానం విశ్వాసులకు ఉండాలి. అది మనకు అందుబాటులో ఉంది (యాకోబు 1:5-6). “నడుచుకోవడానికి”– మనుషులు పాపంలో నిద్రపోతూ మరణించిన స్థితిలో ఉండగా విశ్వాసులు తమ ద్వారా దేవుని వెలుగు వారి మీద ప్రకాశించేలా నడుచుకోవాలి.

17. ఇందు నిమిత్తము మీరు అవివేకులు కాక ప్రభువుయొక్క చిత్తమేమిటో గ్రహించుకొనుడి.

“గ్రహించుకోండి”– ఎఫెసీయులకు 1:18; ఎఫెసీయులకు 4:18; కొలొస్సయులకు 1:9; కొలొస్సయులకు 2:2; రోమీయులకు 12:1-2.

18. మరియు మద్యముతో మత్తులైయుండకుడి, దానిలో దుర్వ్యాపారము కలదు; అయితే ఆత్మ పూర్ణులైయుండుడి.
సామెతలు 23:31

“మత్తిల్లకండి”– రోమీయులకు 13:13; 1 కోరింథీయులకు 5:11; 1 కోరింథీయులకు 6:10; గలతియులకు 5:21; యెషయా 5:11, యెషయా 5:22; ఆదికాండము 9:21. “ఆత్మ”– ఎఫెసీయులకు 1:13-14; ఎఫెసీయులకు 2:18, ఎఫెసీయులకు 2:22; ఎఫెసీయులకు 3:16. ఆత్మతో నిండి ఉండడమే ప్రతి విశ్వాసి విషయంలోనూ దేవుని సంకల్పం. మన పట్ల ఆయన సంకల్పం కాని దేన్నీ చేయాలని గానీ కలిగి ఉండాలని గానీ ఆయన చెప్పడు. దేవుని ఆత్మతో నిండి ఉండడం ఎఫెసీయులకు 3:19 లో పౌలు విశ్వాసుల కోసం ప్రార్థించిన విషయం ఒకటే. ఇది దేవుని సంకల్పమే కాబట్టి మనలో ప్రతి ఒక్కరికీ ఈ ఆత్మ పూర్ణత కలగడం సాధ్యమని మనకు తెలుసు (1 యోహాను 5:14-15; లూకా 11:13). అపో. కార్యములు 1:5; అపో. కార్యములు 2:4, అపో. కార్యములు 2:39 నోట్స్ కూడా చూడండి. “నిండి ఉండండి” అంటే ఎప్పుడూ నిండుతూ ఉండండి, అదే స్థితిలో నిలిచి ఉండండి అని అర్థం. విశ్వాసులందరి సామాన్య స్థితి ఇదే అయి ఉండాలని దేవుని కోరిక. మనం క్రైస్తవ జీవితం గడపవలసిన విధమిదే. ఇలా కాకపోతే మనమెలా స్వార్థ త్యాగం చేసుకోగలం? జీవించవలసిన రీతిలో ఎలా జీవించగలం? క్రీస్తును సేవించవలసిన రీతిలో ఎలా సేవించగలం? పవిత్రాత్మతో ఎప్పుడూ నిండి ఉండడం అంటే మనం మట్టుకు దేవునికి అస్తమానం విధేయులమై లోబడి, ఆయన్ను నమ్మి జీవిస్తూ ఉండడం. “నిండి ఉండడం” అంటే ఏమిటి? మద్యం తాగిన మనిషి ఆ మద్యం అదుపులో, దాని ప్రభావం కింద వుంటాడు. దేవుని ఆత్మతో నిండిన వ్యక్తి ఆ ఆత్మ అదుపులో ఉంటాడు. అలాగని తన స్పృహ కోల్పోయి పూనకం వచ్చిన వాడిలా అయిపోతాడని కాదు (1 కోరింథీయులకు 14:32-33). అది ఒక వ్యక్తి ఇష్టపూర్వకంగా ప్రేమతో ఆత్మకు లోబడి ఉండడం, ఆయనతో ఆనందంగా సహవాసం చెయ్యడం.

19. ఒకనినొకడు కీర్తనల తోను సంగీతములతోను ఆత్మసంబంధమైన పాటలతోను హెచ్చరించుచు, మీ హృదయములలో ప్రభువునుగూర్చి పాడుచు కీర్తించుచు,
కీర్తనల గ్రంథము 33:2-3

దేవుని ఆత్మతో నిండి ఉన్నామనడానికి రుజువు ఏమిటి? ఇక్కడ పౌలు సూచనలు అద్భుతాల గురించి, లేక ఆధ్యాత్మిక సామర్థ్యాలు, ఆత్మ ప్రత్యక్షతల గురించి ఏమీ చెప్పడం లేదు. వీటిల్లో ఏ ఒక్కటీ కూడా విశ్వాసులందరికీ ఇవ్వబడదు. ఒకరికి ఒకటుంటే, మరొకరికి వేరొకటి ఉంటుంది (రోమీయులకు 12:4-8; 1 కోరింథీయులకు 12:7-11, 1 కోరింథీయులకు 12:28-30). ఏదో ఒకటి లేక ఎక్కువ ఆధ్యాత్మిక సామర్థ్యాలు ఉండి కూడా పవిత్రాత్మతో నిండిన స్థితిలో ఉండకపోవడం సాధ్యమే (1 కోరింథీయులకు 1:7; 1 కోరింథీయులకు 3:1, 1 కోరింథీయులకు 3:3). అలానే ఒకరు పవిత్రాత్మతో నిండి ఉండి కూడా, కొందరు క్రైస్తవులు ఎక్కువగా ప్రాముఖ్యత ఇచ్చే సామర్థ్యం వారిలో లేకపోవడం కూడా సాధ్యమే (అపో. కార్యములు 2:4, అపో. కార్యములు 2:11; 1 కోరింథీయులకు 12:10, 1 కోరింథీయులకు 12:28-30 నోట్స్‌). పౌలు ఇక్కడ ఇతర సంగతులను చెప్తున్నాడు. ఇవి దేవుని ఆత్మతో నిండి ఉండడానికి గుర్తులు – ఇతర విశ్వాసులతో ఆనందకరమైన సహవాసం, దేవునికి కృతజ్ఞతలు చెప్తూ ఉండడం, ఒకరికొకరు లోబడి ఉండడం. ఆత్మఫలం (గలతియులకు 5:22) అస్తమానం ఆత్మతో నిండి ఉండేవారిలో ఏపుగా పెరుగుతుంది. ఆధ్యాత్మికమైన సంగీతం, పాటలు పవిత్రాత్మ నిండిన హృదయాల్లోనుంచి సహజంగా పెల్లుబుకుతాయి.

20. మన ప్రభువైన యేసుక్రీస్తు పేరట సమస్తమునుగూర్చి తండ్రియైన దేవునికి ఎల్లప్పుడును కృతజ్ఞతాస్తుతులు చెల్లించుచు,

“అన్ని పరిస్థితుల్లో”, “ఎప్పుడూ” అనే మాటలను గమనించండి. 2 కోరింథీయులకు 4:15; కొలొస్సయులకు 2:7; కొలొస్సయులకు 4:2; 1 థెస్సలొనీకయులకు 5:18; 1 తిమోతికి 2:1; హెబ్రీయులకు 13:15; లేవీయకాండము 7:12-13; కీర్తనల గ్రంథము 7:17; మొ।। చూడండి. రోమ్ 8:28 కారణంగా విశ్వాసులు ఇలా చేయగలరు – అయితే దీనికి వారు పవిత్రాత్మలో నిండి ఉండాలి.

21. క్రీస్తునందలి భయముతో ఒకనికొకడు లోబడియుండుడి.

“భయభక్తులు”– ఆదికాండము 20:11; కీర్తనల గ్రంథము 34:11-14; కీర్తనల గ్రంథము 111:10; సామెతలు 1:7 నోట్స్ చూడండి. “లోబడి”– వ 22,24; ఎఫెసీయులకు 6:1, ఎఫెసీయులకు 6:5; 1 కోరింథీయులకు 16:16; హెబ్రీయులకు 13:17; 1 పేతురు 5:5. లోబడి ఉండడ మంటే విధేయత. స్వంత ఇష్టం నెరవేర్చుకోవడం, స్వార్థాన్ని హెచ్చించుకోవడం, గర్వంతో కూడిన స్వేచ్ఛ వీటన్నిటికీ ఇది విరుద్ధం.

22. స్త్రీలారా, ప్రభువునకువలె మీ సొంతపురుషులకు లోబడియుండుడి.
ఆదికాండము 3:16

“ప్రభువుకు...లోబడినట్టే”– అంటే భార్యలు క్రీస్తును ఎంచినట్టే తమ భర్తలను ఎంచాలని కాదు. క్రీస్తు పట్ల తమ బాధ్యతగా భర్తలకు లోబడాలని దీని అర్థం. కొలొస్సయులకు 3:18 పోల్చి చూడండి. 1 తిమోతికి 2:11-13; 1 పేతురు 3:1-2, 1 పేతురు 3:5-6 కూడా చూడండి.

23. క్రీస్తు సంఘమునకు శిరస్సై యున్నలాగున పురుషుడు భార్యకు శిరస్సై యున్నాడు. క్రీస్తే శరీరమునకు రక్షకుడైయున్నాడు.

“శరీరానికి”– వ 30; ఎఫెసీయులకు 1:22-23. “రక్షకుడు”– క్రీస్తే నిజ సంఘాన్ని ప్రమాదాలనుంచి విడిపించేవాడు, కాపాడేవాడు. “శిరస్సు”– అంటే స్త్రీలు పురుషులకన్నా తక్కువ అని కాదు. దేవుడు తన మహా జ్ఞానం చొప్పున కుటుంబంలోను, సమాజంలోను ఈ క్రమాన్ని ఏర్పరిచాడు. విశ్వాసులు ఈ క్రమాన్ని అనుసరించాలని కోరుతున్నాడు. 1 కోరింథీయులకు 11:3-16 నోట్స్.

24. సంఘము క్రీస్తునకు లోబడినట్టుగా భార్యలుకూడ ప్రతి విషయములోను తమ పురుషులకు లోబడవలెను.

“అన్ని విషయాలలో”– భార్యాభర్తలిద్దరూ విశ్వాసులై, ఇద్దరూ ప్రభువుకు లోబడి ఉండే స్థితిని గురించి పౌలు మాట్లాడుతున్నాడు. ఒక భర్త తన భార్యను దేవుని వాక్కుకు లేక ఆమె అంతర్వాణికి వ్యతిరేకంగా ఏమైనా చేయమంటే ఆమె చెయ్యకూడదు. పాపం చెయ్యవలసి వచ్చే పరిస్థితుల్లో కూడా భర్తకు లోబడాలని దేవుడు చెప్పలేదు. దేవుని వాక్కులో విధించిన సూత్రాలు చూడండి – అపో. కార్యములు 4:19; అపో. కార్యములు 5:29; రోమీయులకు 1423:1; మొ।।.

25. పురుషులారా, మీరును మీ భార్యలను ప్రేమించుడి. అటువలె క్రీస్తుకూడ సంఘమును ప్రేమించి,

“ప్రేమించినట్టే”– యోహాను 13:24. “ప్రేమిస్తూ”– భార్యలకు వారి ధర్మం ఉంది – లోబడడం. భర్తలకూ వారు చేయవలసినది ఉంది – ప్రేమించడం (అంటే భార్యలు తమ భర్తల్ని ప్రేమించవద్దని కాదు). భర్తలు తమ భార్యలను చూచుకునే విధానాన్ని దృష్టిలో పెట్టుకుని ప్రేమించాలి అంటున్నాడు పౌలు. ఇది కేవలం వలపు, మోహం కాదు. ఇక్కడున్న గ్రీక్ పదం స్వార్థం లేని ప్రేమను సూచిస్తున్నది. 1 కోరింథీయులకు 13:1 నోట్ చూడండి.

26. అది కళంకమైనను ముడతయైనను అట్టిది మరి ఏదైనను లేక, పరిశుద్ధమైనదిగాను,

సంఘం కోసం క్రీస్తు ఎందుకు చనిపోయాడో చూడండి. ఎఫెసీయులకు 1:4; తీతుకు 2:14; 1 కోరింథీయులకు 6:11 పోల్చి చూడండి. ఆయన మచ్చలేని పవిత్రత గలవాడు. తన సంఘం కూడా మచ్చలేని పవిత్రతలోకి వచ్చేవరకు తృప్తి చెందడు. “వాక్కు అనే నీళ్ళతో”– పౌలు ఇక్కడ బాప్తిసం గురించి మాట్లాడుతున్నాడని కొందరు పండితులు బల్ల గుద్ది చెప్పారు. ఇది అసంభవం. పౌలు దేవుని వాక్కు గురించి మాట్లాడుతున్నాడు. దేవుని వాక్కుతో, దేవుని ఆత్మతో మన అంతరంగాలు శుద్ధి కావడం ముఖ్యమైన సంగతి అనీ, శుద్ధి అయినట్టు బాహ్య చిహ్నమైన బాప్తిసం ముఖ్యం కాదనీ మనందరం గుర్తుపెట్టుకోవాలి. శుద్ధిచేయడం, కడగడం గురించి కీర్తనల గ్రంథము 51:2, కీర్తనల గ్రంథము 51:7; యెహెఙ్కేలు 36:25-26; యెహెఙ్కేలు 37:23; యోహాను 13:5-10; యోహాను 15:3; తీతుకు 3:5 (యోహాను 3:3-8); హెబ్రీయులకు 9:14; 1 యోహాను 1:7, 1 యోహాను 1:9 చూడండి. “అర్పించుకున్నాడు”– వ 2; గలతియులకు 2:20; రోమీయులకు 5:8; యోహాను 10:11, యోహాను 10:15. క్రీస్తు రెండో రాకడ సమయంలో ఆయన సంఘం ఆరోహణమై ఆకాశంలో క్రీస్తును కలుసుకునే సమయంలో వ 27 నెరవేరుతుంది (1 కోరింథీయులకు 15:50-57).

27. నిర్దోష మైనదిగాను మహిమగల సంఘముగాను ఆయన తనయెదుట దానిని నిలువబెట్టుకొనవలెనని, వాక్యముతో ఉదకస్నానముచేత దానిని పవిత్రపరచి, పరిశుద్ధపరచుటకై దానికొరకు తన్ను తాను అప్పగించుకొనెను.

28. అటువలెనే పురుషులుకూడ తమ సొంత శరీరములను వలె తమ భార్యలను ప్రేమింప బద్ధులైయున్నారు. తన భార్యను ప్రేమించువాడు తన్ను ప్రేమించుకొనుచున్నాడు.

భార్య, భర్త ఒకే శరీరం అని పౌలు భావం (వ 31). భార్య తన స్వంత శరీరం వంటిదే గనుక తన శరీరం లాగానే భర్త ఆమెను చూచుకోవాలి.

29. తన శరీరమును ద్వేషించినవాడెవడును లేడు గాని ప్రతివాడును దానిని పోషించి సంర క్షించుకొనును.

“పోషించి సంరక్షించుకొంటాడు”– అంటే ఆమెపట్ల ప్రవర్తించే విషయంలో చూపవలసిన ప్రేమ (వ 25). క్రియల్లో బయటపడని ప్రేమ క్రైస్తవ ప్రేమ కాదు, క్రీస్తు ప్రేమ కాదు – 1 యోహాను 3:18. క్రీస్తు ప్రేమసందేశాలు పంపుతూ పరలోకంలో హాయిగా కూర్చోలేదు. ఈ లోకానికి వచ్చి తనను మనకోసం అర్పించుకున్నాడు. ఇప్పుడు తన సంఘాన్ని సంరక్షించి పోషిస్తున్నాడు.

30. మనము క్రీస్తు శరీరమునకు అవయవములమై యున్నాము గనుక అలాగే క్రీస్తుకూడ సంఘమును పోషించి సంరక్షించుచున్నాడు.

ఎఫెసీయులకు 1:23; ఎఫెసీయులకు 2:16; ఎఫెసీయులకు 4:4, ఎఫెసీయులకు 4:12, ఎఫెసీయులకు 4:16; రోమీయులకు 12:4-5; 1 కోరింథీయులకు 12:12-13, 1 కోరింథీయులకు 12:27.

31. ఈ హేతువుచేత పురుషుడు తన తండ్రిని తల్లిని విడిచి తన భార్యను హత్తుకొనును; వారిద్దరును ఏకశరీరమగుదురు.
ఆదికాండము 2:24

ఆదికాండము 2:24.

32. ఈ మర్మము గొప్పది; అయితే నేను క్రీస్తును గూర్చియు సంఘమునుగూర్చియు చెప్పుచున్నాను.

ఆధ్యాత్మికంగా క్రీస్తుతో ఐక్యత కావడానికి వ్యక్తులు తమ తల్లిదండ్రుల్ని, తోబుట్టువుల్ని, తమకున్నదానంతటినీ, తమను కూడా కాదని చెప్పి ఆయనదగ్గరికి వస్తారు. వారు ఆయనతో ఒకే ఆత్మ అవుతారు (1 కోరింథీయులకు 6:17; మత్తయి 4:18-22; మత్తయి 10:37-39; లూకా 14:26-27, లూకా 14:33). భర్తను క్రీస్తుకు సాదృశ్యంగా లేక చిహ్నంగా, అతని భార్యను సంఘానికి చిహ్నంగా ఎంచి పౌలు మాట్లాడుతున్నాడు. 2 కోరింథీయులకు 11:2; యోహాను 3:28-29; ప్రకటన గ్రంథం 19:7 పోల్చి చూడండి.

33. మెట్టుకు మీలో ప్రతి పురుషుడును తననువలె తన భార్యను ప్రేమింపవలెను, భార్యయైతే తన భర్తయందు భయము కలిగి యుండునట్లు చూచుకొనవలెను.

భర్త తన భార్య గౌరవాన్ని చూరగొనే రీతిలో మెలగాలనీ, భార్య తన భర్త ప్రేమకు అర్హురాలుగా నడుచుకోవాలనీ వేరే చెప్పాలా.