Sajeeva Vahini - Bible AI - Beta

1. ఐగుప్తుదేశమునుండి యెహోవా రప్పించిన ఇశ్రా యేలీయులారా, మిమ్మునుగూర్చియు ఆయన రప్పించిన కుటుంబమువారినందరినిగూర్చియు ఆయన సెలవిచ్చిన మాట ఆలకించుడి.

ఆమోసు 2:10. “అందరి విషయం”– ఉత్తర రాజ్యంలోని పది గోత్రాల విషయమే కాదు, యూదా, లేవీ గోత్రాలను కూడా కలుపుకుని మాట్లాడుతున్నాడు.

2. అదేమనగా భూమిమీది సకల వంశములలోను మిమ్మును మాత్రమే నేను ఎరిగియున్నాను గనుక మీరు చేసిన దోషక్రియలన్నిటినిబట్టి మిమ్మును శిక్షింతును.

“మిమ్ములను మాత్రమే”– నిర్గమకాండము 19:5-6; ద్వితీయోపదేశకాండము 10:15-17. తాము దేవునికి ప్రత్యేక ప్రజ గనుక తమ పాపాలకోసం దేవుడు తమను శిక్షించడని వారు అనుకొన్నారేమో (మత్తయి 3:7-10 పోల్చి చూడండి). అయితే నిజం దీనికి సరిగ్గా వ్యతిరేకంగా ఉంది. వారు తన ప్రజలు కాబట్టే దేవుడు వారిని శిక్షిస్తాడు. ఎక్కువ ఆధిక్యతలతో బాటు ఎక్కువ బాధ్యతలు కూడా ఉంటాయి. వీటిని నిర్లక్ష్యం చేస్తే తప్పకుండా శిక్ష వస్తుంది.

3. సమ్మతింపకుండ ఇద్దరు కూడి నడుతురా? ఎర దొరకక సింహము అడవిలో గర్జించునా?

దేవుని శాసనాలు విధానాలతో ఇస్రాయేల్‌వారు సమ్మతించకపోతే దేవుడు, ఇస్రాయేల్‌ప్రజ కలిసి ముందుకు సాగిపోవడం కుదరదు. వారు ఒప్పుకోకపోతే ఎడబాటు అనే శిక్ష తప్పదు.

4. ఏమియు పట్టు కొనకుండనే కొదమ సింహము గుహలోనుండి బొబ్బ పెట్టునా?

ప్రతి సంఘటనకూ ఒక కారణం ఉంటుంది. సింహాలు తమ ఆహారం కోసం వేరే జంతువు పైకి దూకేటప్పుడు గర్జించవచ్చు. దాన్ని తింటూ ఉండడం బట్టి గుర్రుమంటూ ఉండవచ్చు. వల వెయ్యకుండా పక్షి దొరకదు. అక్కడేమీ లేకపోతే వల గానీ ఉచ్చు గానీ దేన్నీ బంధించలేవు. ఇవి చెప్పడంలో ఆమోసు భావం ఏమిటంటే దేవుడు వారికి విరోధంగా గర్జిస్తున్నాడు (ఆమోసు 1:2), వారికోసం వల పన్నాడు.

5. భూమిమీద ఒకడును ఎరపెట్టకుండ పక్షి ఉరిలో చిక్కుపడునా? ఏమియు పట్టుబడకుండ ఉరి పెట్టువాడు వదలిలేచునా?

6. పట్టణమందు బాకానాదము వినబడగా జనులకు భయము పుట్టకుండునా? యెహోవా చేయనిది పట్టణములో ఉపద్రవము కలుగునా?

హెచ్చరికగా బూరధ్వని వినిపించినప్పుడు ప్రజలు భయంతో వణకుతారు – యోవేలు 2:1. ఒక నగరం మీదికి వచ్చిపడే విపత్తు దేవుని నుంచి వినిపించే బూరధ్వని లాంటిది. కారణం లేకుండా అది రాదు. దానికి కారణం దేవుడే.

7. తన సేవకులైన ప్రవక్తలకు తాను సంకల్పించినదానిని బయలు పరచకుండ ప్రభువైన యెహోవా యేమియు చేయడు.
ప్రకటన గ్రంథం 10:7, ప్రకటన గ్రంథం 11:18

పైన చెప్పిన ఉదాహరణలకు ఇక్కడ ఆమోసు వివరణ ఇస్తున్నాడు. రాబోతున్న విపత్తును గురించి హెచ్చరిస్తూ అతడిక్కడ ఎందుకున్నాడు? ఎందుకంటే రాబోతున్నదాన్ని దేవుడు అతనికి వెల్లడి చేసి దాన్ని పలుకమని చెప్పాడు. అతడు దేవుని మూలంగా పలకడం అతనిద్వారా దేవుడు సింహం లాగా గర్జించడమన్న మాట. వారి పైకి విపత్తు రాబోతుందన్న సత్యానికి ఈ గర్జన నిస్సందేహమైన గుర్తు. హోషేయ 5:14 పోల్చి చూడండి. “బయలు పరచకుండా”– దేవుడు బైబిలంతటా ఇది చేశాడు. తాను చేయబోయేది ముందుగానే మనుషులకు చెప్పాడు (యెషయా 46:10). “చెప్పలేని...” దేవుని సందేశాన్ని వినిపించాలని ఆమోసు ఇస్రాయేల్ దగ్గరికి ఎందుకు వచ్చాడు? అలా రాకుండా ఊరికే ఉండడం సాధ్యం కాదు.

8. సింహము గర్జించెను, భయపడనివాడెవడు? ప్రభువైన యెహోవా ఆజ్ఞ ఇచ్చియున్నాడు, ప్రవచింపకుండువాడెవడు?

9. అష్డోదు నగరులలో ప్రకటనచేయుడి, ఐగుప్తుదేశపు నగరులలో ప్రకటనచేయుడి; ఎట్లనగా - మీరు షోమ్రోనునకు ఎదురుగానున్న పర్వతములమీదికి కూడివచ్చి అందులో జరుగుచున్న గొప్ప అల్లరి చూడుడి; అందులో జనులు పడుచున్న బాధ కనుగొనుడి.

దేవుని ధర్మశాస్త్రం లేనివారిని, దేవుణ్ణి ఎరుగనివారిని ఇస్రాయేల్‌కు వ్యతిరేకంగా సాక్షులుగా పిలవడం ఇది. అలాంటివారు సైతం ఇస్రాయేల్‌వారు చేస్తున్నది తప్పని గ్రహించగలిగారు.

10. వారు నీతి క్రియలు చేయ తెలియక తమ నగరులలో బలాత్కారము చేతను దోపుడుచేతను సొమ్ము సమకూర్చుకొందురు.

11. కాబట్టి ప్రభువైన యెహోవా సెలవిచ్చునదేమనగా శత్రువు వచ్చును, అతడు దేశమంతట సంచరించి నీ ప్రభావమును కొట్టివేయగా నీ నగరులు పాడగును.

ఇస్రాయేల్‌లోని ధనికులూ అధికారులూ కూడా తమ సంపదలు పోగు చేసుకుంటూ పేదలను బాధించారు – ఆమోసు 2:6-7. వారు ఇతరులకు చేసిన విధంగానే దేవుడు వారికి చేస్తాడు (కీర్తనల గ్రంథము 18:25-26 నోట్‌). “శత్రువులు”– అష్షూరువారు.

12. యెహోవా సెలవిచ్చునదేమనగా గొల్లవాడు సింహము నోటనుండి రెండు కాళ్లనైనను చెవి ముక్కనైనను విడిపించునట్లుగా షోమ్రోనులో మంచములమీదను బుట్టాలువేసిన శయ్యలమీదను కూర్చుండు ఇశ్రాయేలీయులు రక్షింపబడుదురు.

అష్షూరు చెరనుంచి తప్పించుకునేవారు కొద్దిమందే ఉంటారు (యెషయా 10:20-23; యెషయా 11:11).

13. ప్రభువును దేవుడును సైన్యములకధిపతియునగు యెహోవా సెలవిచ్చునదేమనగా - నా మాట ఆలకించి యాకోబు ఇంటివారికి దానిని రూఢిగా తెలియజేయుడి.

14. ఇశ్రాయేలువారు చేసిన దోషములనుబట్టి నేను వారిని శిక్షించు దినమున బేతేలులోని బలిపీఠములను నేను శిక్షింతును; ఆ బలిపీఠపు కొమ్ములు తెగవేయబడి నేలరాలును.

శిక్షించే రోజున”– ఆమోసు 2:6; ఆమోసు 3:2. “బేతేల్”– ఇస్రాయేల్‌లో విగ్రహ పూజకు ఈ పట్టణం కేంద్ర స్థానం (1 రాజులు 12:26-33).

15. చలికాలపు నగరును వేసవికాలపు నగరును నేను పడగొట్టెదను, దంతపు నగరులునులయమగును, బహు నగరులు పాడగును; ఇదే యెహోవా వాక్కు.

ఈ వచనం సంపదలు, విలాసాల గురించి చెప్తున్నది. అదంతా స్వార్థం, పేదల పట్ల తిరస్కారంతో (ఆమోసు 4:1) కూడి ఉన్నది గనుక దేవుడు దాన్నంతటినీ నిర్మూలిస్తాడు. 1 తిమోతికి 6:6-19 చూడండి.