Sajeeva Vahini - Bible AI - Beta

1. సీయోనులో నిర్విచారముగానున్నవారికి శ్రమ, షోమ్రోను పర్వతములమీద నిశ్చింతగా నివసించువారికి శ్రమ; ఇశ్రాయేలువారికి విచారణకర్తలై జనములలో ముఖ్య జనమునకు పెద్దలైనవారికి శ్రమ

ఓ వ్యక్తి తనను బట్టే సంతృప్తిగా ఉండి దేవుని విషయంలో అశ్రద్ధగా ఉండడం అనే పాపాన్ని ఆమోసు ఇక్కడ వర్ణిస్తూ దానిపై దేవుని తీర్పును ప్రకటిస్తున్నాడు. యెషయా 3:9-11; జెఫన్యా 1:12-13 కూడా చూడండి. వారి పాపాలను చూపిస్తూ, రానున్న శిక్ష భయానకంగా ఉంటుందని చెప్తూ దేవుడు వారిమధ్య గర్జించే సింహం లాగా వారికి వ్యతిరేకంగా ఉన్నాడు – ఆమోసు 1:2; ఆమోసు 2:4-8; ఆమోసు 3:14-15; ఆమోసు 4:1-3; ఆమోసు 5:16-17. ఏమీ పట్టనట్టు, అంతా భద్రంగానే ఉందనుకుంటూ కూర్చునే విషయం సమయం కాదది. హృదయపూర్వకంగా, శక్తి అంతటితో, మనస్ఫూర్తిగా, పశ్చాత్తాపంతో దేవునివైపు తిరగవలసిన సమయం. అశ్రద్ధ అపనమ్మకం వల్ల వస్తుంది. అది కేవలం బుద్ధిహీనత. అది వారి వినాశనాన్ని మరింత ఖాయం చేస్తుంది. సామెతలు 1:32 చూడండి. మత్తయి 4:17; మత్తయి 5:29-30; మత్తయి 7:13-14; మత్తయి 13:49-50; మత్తయి 16:24, మత్తయి 16:27; మత్తయి 25:26 మొదలైన చోట్ల కనిపించే యేసు క్రీస్తు ప్రబోధాలను బట్టి చూస్తే ఈ విధమైన అశ్రద్ధ బహు భయంకరమైన మూర్ఖత్వానికి గుర్తు. “నిర్భయంగా” (వ 1) – ఇది శరీరానుసారమైన భద్రత. దేవుడు గానీ ఆయన ప్రవక్తలు గానీ ఏం చెప్పినప్పటికీ తమకు మాత్రం ఏ ప్రమాదమూ లేదనుకొన్నారు.

2. కల్నేకు పోయి విచారించుడి; అక్కడ నుండి హమాతు మహాపురమునకు పోవుడి, ఫిలిష్తీయుల పట్టణమైన గాతునకు పోవుడి; అవి ఈ రాజ్యములకంటె గొప్పవి గదా; వాటి సరిహద్దులు మీ సరిహద్దులకంటె విశాలమైనవి గదా.

హమాతు సిరియాలో దమస్కుకు 180 కి.మీ. ఉత్తరంగా ఉన్న నగరం. కల్నే కూడా అక్కడే ఉన్న ఒక పట్టణమై ఉండవచ్చు. “గాతు”– యెహోషువ 11:22; యెహోషువ 13:3. ఈ వచనంలో ఆమోసు ఈ పోలిక ఎందుకు చెప్తున్నాడో స్పష్టంగా తెలియదు. అతని మాటలు ఆ కాలంలో విన్నవారికి ఇది అర్థం అయ్యే ఉంటుంది.

3. ఉపద్రవ దినము బహుదూరముననున్న దనుకొని అన్యాయపు తీర్పు తీర్చుటకై మీ మధ్య మీరు పీఠములు స్థాపింతురు.

“దూరంగా ఉందనుకొని”– తమ ఆలోచనల్లో వారు ఆపద్దినం దగ్గరగా ఉందని ఒప్పుకోరు. అలా చెయ్యడంవల్ల ఆ దినాన్ని మరింత సమీపం తెచ్చుకొన్నారు.

4. దంతపు మంచముల మీద పరుండుచు, పాన్పులమీద తమ్మును చాచుకొనుచు, మందలో శ్రేష్ఠమైన గొఱ్ఱెపిల్లలను సాలలోని క్రొవ్విన దూడలను వధించి భోజనము చేయుదురు.

వారి అశ్రద్ధను గురించిన వివరం. రానున్న దేవుని తీర్పును గురించి ఆలోచించడానికి నిరాకరించారు. విలాసం, సుఖభోగాల కోసమే అర్రులు చాచారు.

5. స్వరమండలముతో కలిసి పిచ్చిపాటలు పాడుచు, దావీదువలెనే వాయించు వాద్యములను కల్పించుకొందురు.

“దావీదులాగా”– 1 సమూయేలు 16:15-23; 2 సమూయేలు 23:1. సమయం, సందర్భం పాటిస్తే వాద్య విశేషాలలో తప్పేమీ లేదు. అయితే ఇలాంటివారికి ఇది సమయం కాదు. సరైన స్థలమూ కాదు.

6. పాత్రలలో ద్రాక్షారసముపోసి పానము చేయుచు పరిమళ తైలము పూసికొనుచుందురు గాని యోసేపు సంతతివారికి కలిగిన ఉపద్రవమును గురించి చింతపడరు.

“యోసేపు”– ఆమోసు 5:6 నోట్. “విచారమేమీ లేదు”– కీర్తనల గ్రంథము 119:136; యిర్మియా 9:1; యిర్మియా 13:17; యెహెఙ్కేలు 9:4-6; యోవేలు 2:12-13; మత్తయి 5:4; లూకా 19:41 పోల్చి చూడండి.

7. కాబట్టి చెరలోనికి ముందుగా పోవు వారితో కూడా వీరు చెరలోనికి పోవుదురు; అప్పుడు సుఖాసక్తులు చేయు ఉత్సవధ్వని గతించును. యాకోబు సంతతివారికున్న గర్వము నాకసహ్యము; వారి నగరులకు నేను విరోధినైతిని గనుక వారి పట్టణములను వాటిలోని సమస్తమును శత్రువుల వశము చేసెదనని

“వీళ్ళే”– అశ్రద్ధ, కఠినత్వం గలవారు. అంటే వ 1లోని ప్రసిద్ధులు.

8. ప్రభువైన యెహోవా తనతోడని ప్రమాణము చేసెను; ఇదే దేవుడును సైన్యములకధిపతియునగు యెహోవా వాక్కు.

“గర్వం నాకు అసహ్యం”– సామెతలు 6:16-17; యెషయా 2:12-18 మొ।। చూడండి. “భవనాలు”– లేక కోటలు (హీబ్రూ పదానికి ఈ రెండు అర్థాలూ ఉన్నాయి). దేవునికి వారి విలాసాల మీదా సంపదల మీదా శక్తియుక్తుల మీదా వారికున్న ఆలోచన లేని నమ్మకం అంటే అసహ్యమే. “తనతోడని”– హెబ్రీయులకు 6:13-14 పోల్చి చూడండి.

9. ఒక కుటుంబమందు పదిమంది మనుష్యులుండినను వారు చత్తురు.

శత్రువు షోమ్రోనును పట్టుకున్నప్పుడు ఉండబోయే పరిస్థితి ఇలాంటిదే. గొప్ప వధ, వినాశనం ఉంటాయి. నిజ దేవుని నామం ఉచ్చరించడానికి కూడా భయం కలుగుతుంది.

10. ఒకని దాయాది కాల్చబోవు వానితోకూడ ఎముకలను ఇంటిలోనుండి బయటికి కొనిపోవుటకై శవమును ఎత్తినప్పుడు ఇంటి వెనుకటి భాగమున ఒకనిచూచి యింటిలో మరి ఎవరైన మిగిలియున్నారా? యని అడుగగా అతడుఇంకెవరును లేరనును; అంతట దాయా దిట్లనునునీవిక నేమియు పలుకక ఊరకుండుము, యెహోవానామము స్మరించకూడదు;

11. ఏలయనగా గొప్ప కుటుంబములు పాడగుననియు, చిన్న కుటుంబములు చీలిపోవుననియు యెహోవా ఆజ్ఞ ఇచ్చియున్నాడు

12. గుఱ్ఱములు బండలమీద పరుగెత్తునా? అట్టిచోట ఎవరైన ఎద్దులతో దున్నుదురా? అయినను మాశక్తిచేతనే బలము తెచ్చుకొందుమని చెప్పుకొను మీరు, వ్యర్థమైన దానినిబట్టి సంతోషించు మీరు,

ఇస్రాయేల్ నాయకులు దేవుడు నియమించిన లోక ధర్మానికీ బుద్ధికీ వ్యతిరేకంగా ప్రవర్తిస్తున్నారు. గుర్రపు రౌతులకు, పొలం దున్నుకునే రైతులకు వారికంటే ఎక్కువ తెలివి ఉంది. “న్యాయాన్ని విష తుల్యం”– వాళ్ళు న్యాయాన్ని తారుమారు చేయడం ద్వారా నిస్సహాయులకు హాని చేసి హతమార్చారు – ఆమోసు 2:7; ఆమోసు 5:7, ఆమోసు 5:12. 1 రాజులు 21:1-16 లో దీనికి ఒక ఉదాహరణ ఉంది. “ధర్మఫలాన్ని చేదుకు”– ఆమోసు 5:7. దేవుడు కోరిన నీతిన్యాయాలను స్వనీతిగా, అహంకారంగా మార్చేసి దాన్ని తమను గొప్ప చేసుకునేందుకూ, ఇతరులను హీనపరిచేందుకూ సాకుగా వాడుకున్నారు. లూకా 18:9-14 పోల్చి చూడండి.

13. న్యాయమును ఘోరమైన అన్యాయముగాను, నీతిఫలమును ఘోరదుర్మార్గముగాను మార్చితిరి.

14. ఇందుకు దేవుడును సైన్యముల కధిపతియునగు యెహోవా సెలవిచ్చునదేమనగా ఇశ్రాయేలీయులారా, నేను మీ మీదికి ఒక జనమును రప్పింతును, వారు హమాతునకు పోవుమార్గము మొదలుకొని అరణ్యపు నదివరకు మిమ్మును బాధింతురు.

“ఒక జనాన్ని”– అంటే అష్షూరును (యెషయా 10:5-6). “హమాతు...అరాబా”– ఇస్రాయేల్ ఉత్తర సరిహద్దునుంచి మృత సముద్రందాకా దేశం అంతటిలో.