1. మీలో జారత్వమున్నదని వదంతి కలదు. మీలో ఒకడు తన తండ్రి భార్యను ఉంచుకొన్నాడట. అట్టి జారత్వము అన్యజనులలోనైనను జరుగదు.
లేవీయకాండము 18:7-8, ద్వితీయోపదేశకాండము 22:30, ద్వితీయోపదేశకాండము 27:20

తండ్రి భార్య అంటే సవతితల్లి. అవిశ్వాసులు సైతం తప్పుగా ఎంచే పాపం ఇతడు చేశాడు (మోషే ధర్మశాస్త్రం కూడా దీన్ని నేరమని ఖండిస్తున్నది – లేవీయకాండము 18:8; లేవీయకాండము 22:30; లేవీయకాండము 27:20).

2. ఇట్లుండియు, మీరుప్పొంగుచున్నారే గాని మీరెంత మాత్రము దుఃఖపడి యీలాటి కార్యము చేసిన వానిని మీలోనుండి వెలివేసిన వారు కారు.

“విర్రవీగుతూ”– ఈ విషయంలో వారి లోక సంబంధమైన జ్ఞానం గురించి, లేక చూచీ చూడనట్టు పోయే తమ విశాల భావాల గురించి వారికి గర్వమా? క్రీస్తు శుభవార్త క్రైస్తవులకు ఏది చేయడానికైనా స్వేచ్ఛ ఇచ్చిందని వారికి తప్పు అభిప్రాయం కలిగిందా? పాపం చేస్తున్న సభ్యుడి విషయంలో స్థానిక సంఘం ఎలా ప్రవర్తించాలో పౌలు ఇక్కడ చెప్తున్నాడు. వారికి దుఃఖం కలగాలి – క్రీస్తుకు అపకీర్తి కలిగిందన్న దుఃఖం, సాటి క్రైస్తవుడొకడు అంతగా దిగజారిపోయాడన్న దుఃఖం, సంఘం దేవుని తీర్పుకు గురి అయ్యే ప్రమాదంలో పడిందన్న దుఃఖం కలగాలి. తన పాపానికి పశ్చాత్తాపపడని క్రైస్తవుణ్ణి తమ సహవాసం నుంచి దూరం చెయ్యడం కూడా వారి బాధ్యత. ఇలాంటి క్రమశిక్షణను అమలుపరచని సంఘం దేవుని తీర్పుకు గురి అవుతుంది – 1 కోరింథీయులకు 11:30-32.

3. నేను దేహవిషయమై దూరముగా ఉన్నను ఆత్మవిషయమై సమీపముగా ఉండి, మీతోకూడ ఉండినట్టుగానే యిట్టి కార్యము ఈలాగు చేసినవానినిగూర్చి యిదివరకే తీర్పు తీర్చియున్నాను.

క్రైస్తవులకు తీర్పు తీర్చడం క్రైస్తవ సంఘాల, క్రైస్తవ సంఘ నాయకుల పనా? అవును సంఘాన్ని పరిశుద్ధంగా ఉంచడం, పాపాన్ని గద్దించడం, క్రీస్తు నేర్పించిన పవిత్ర జీవితానికి విరుద్ధంగా ఉండే ప్రవర్తనకు తీర్పు తీర్చడం వారి బాధ్యతే. వ 12,13; మత్తయి 18:15-17; అపో. కార్యములు 5:1-11 చూడండి. ఒక వ్యక్తి మరో వ్యక్తికి తీర్పు తీర్చడం వంటిది కాదిది (ఇది మనం చెయ్యకూడదు – 1 కోరింథీయులకు 4:3, 1 కోరింథీయులకు 4:5; మత్తయి 7:1-5; రోమీయులకు 14:4, రోమీయులకు 14:13). ఇది సంఘానికి చెందిన వ్యవహారం. అందులో సహవాసంలో ఉండడానికి తగినవారు ఎవరు, సంఘంలో ఉండవలసిన ప్రవర్తన నియమాలు ఏమిటి అనే సమస్య ఇది.

4. ఏమనగా, ప్రభువైన యేసు దినమందు వాని ఆత్మ రక్షింపబడునట్లు శరీరేచ్ఛలు నశించుటకై మన ప్రభువైన యేసుక్రీస్తు నామమున మీరును,

క్రమశిక్షణ చర్య యేసుప్రభువు పేరున ఆయన సన్నిధిలో ఆయన ప్రభావం చొప్పున తీసుకోవాలి. సంఘాన్ని పవిత్రం చేసేవాడు ఆయనే. ఆయనే దానికి నాయకుడు, ప్రభువు. స్థానిక సంఘాలు ఆయన అధికారం కింద చర్య తీసుకోవాలి. పాపం చేసే క్రైస్తవుణ్ణి సైతానుకు అప్పగించడమంటే సంఘంలో నుంచి అతణ్ణి దూరం చేసి అతడు పశ్చాత్తాపపడే వరకు అతనితో సంబంధ బాంధవ్యాలు పెట్టుకోకపోవడం – వ 11,13; అతణ్ణి బాధించేందుకు సైతానుకు అవకాశమివ్వడం కూడా. సంఘం బయటంతా సైతాను సామ్రాజ్యమైన లోకమే (యోహాను 14:30; ఎఫెసీయులకు 2:2; కొలొస్సయులకు 1:13; 1 యోహాను 5:19). సైతానుకు మనుషుల దేహాలను బాధపెట్టే శక్తి ఉంది (యోబు 2:4-7); మరణశక్తి వాడికి ఉంది (హెబ్రీయులకు 2:14. సైతాను గురించి నోట్స్ 1 దినవృత్తాంతములు 21:1). సైతానుకు అప్పగించడమంటే నిజంగా భయంకరమైన, బాధకరమైన శిక్షే. కానీ ఈ మనిషి విషయంలో పౌలు ఒక మంచి ఉద్దేశాన్ని తెలియజేస్తున్నాడు. మనిషి శరీరం నాశనమైపోయి ఆత్మకు విముక్తి కలగాలని అతని కోరిక (“శరీరేచ్ఛలు” లేక “శరీరస్వభావం” అనే తర్జుమా బహుశా ఇక్కడ సరి కాదు. పౌలు ఆ మనిషి చావును గురించి మాట్లాడుతున్నట్టుంది). తన ప్రజలను క్రమశిక్షణలో పెట్టడంలో దేవునికెప్పుడూ మంచి ఉద్దేశమే ఉంది. (1 కోరింథీయులకు 11:32; హెబ్రీయులకు 12:7-11).

5. నా ఆత్మయు మన ప్రభువైన యేసుక్రీస్తు బలముతో కూడి వచ్చినప్పుడు, అట్టి వానిని సాతానునకు అప్పగింపవలెను.

6. మీరు అతిశయపడుట మంచిదికాదు. పులిసిన పిండి కొంచెమైనను ముద్దంతయు పులియజేయునని మీరెరుగరా?

వ 2. క్రైస్తవ సంఘంలో పాపం అతి స్వల్పంగా ఆరంభమై సంఘమంతటా వ్యాపించవచ్చని అతని భావం. పాపాన్ని తక్షణమే, కఠినంగా పరిష్కరించడం అవసరం అనేందుకు ఇదొక కారణం. సంఘం గనుక అలా చెయ్యకపోతే, అందులోని వారు పాపం అంతగా ప్రమాదకరమైనది కాదనీ, తాము ఏం చేసినా ఎవరూ ఏమీ అనరులే అనీ అనుకునే ప్రమాదం ఉంది.

7. మీరు పులిపిండి లేనివారు గనుక క్రొత్తముద్ద అవుటకై ఆ పాతదైన పులిపిండిని తీసిపారవేయుడి. ఇంతే కాక క్రీస్తు అను మన పస్కా పశువు వధింపబడెను
నిర్గమకాండము 12:21, నిర్గమకాండము 13:7, యెషయా 53:7

“పాత పొంగు పదార్థం”– అంటే పాత చెడు అలవాట్లు. సంఘం కొత్త పిండి ముద్ద వంటిది. పాత జీవితానికి చెందిన విషయాలకు అందులో స్థానం ఉండకూడదు. ఎఫెసీయులకు 5:25-27; కొలొస్సయులకు 3:5-12 పోల్చి చూడండి. పస్కా విందులో పొంగజేసే పదార్థం కలపని రొట్టెలు యూదులు తినేవారు. పొంగజేసే పదార్థం దుర్మార్గతకు సూచనగా సాదృశ్యంగా వాడబడింది బైబిల్లో – నిర్గమకాండము 12:14-15; లేవీయకాండము 23:5-6. సిలువపై క్రీస్తు మరణం పస్కాకు ఆధ్యాత్మికమైన నెరవేర్పు (మత్తయి 26:26-28; యోహాను 1:29; యోహాను 6:53-58).

8. గనుక పాతదైన పులిపిండితోనైనను దుర్మార్గతయు దుష్టత్వమునను పులిపిండితోనైనను కాకుండ, నిష్కాపట్యమును సత్యమునను పులియని రొట్టెతో పండుగ ఆచరింతము.
నిర్గమకాండము 12:3-20, ద్వితీయోపదేశకాండము 16:3, నిర్గమకాండము 13:7

మహోత్సవాన్ని జరుపుకొందాం అంటే యూదుల పాతదైన పస్కా పండుగను జరుపుకుందామని కాదు. ఇది చెయ్యాలని క్రైస్తవులకు ఎక్కడా చెప్పలేదు. విశ్వాసుల మహోత్సవం అంటే వారి పస్కా బలి అయిన క్రీస్తుకు చెందిన సత్యాలతో విందు చేసుకోవడమే. అది ఒక కొత్త జీవితంలో ఆయనతో సహవాసం. గర్వం, విభేదాలు, కలహాలు, అవినీతి మొదలైన వాటికి ఈ మహోత్సవంలో తావుండకూడదు.

9. జారులతో సాంగత్యము చేయవద్దని నా పత్రికలో మీకు వ్రాసియుంటిని.

మహోత్సవాన్ని జరుపుకొందాం అంటే యూదుల పాతదైన పస్కా పండుగను జరుపుకుందామని కాదు. ఇది చెయ్యాలని క్రైస్తవులకు ఎక్కడా చెప్పలేదు. విశ్వాసుల మహోత్సవం అంటే వారి పస్కా బలి అయిన క్రీస్తుకు చెందిన సత్యాలతో విందు చేసుకోవడమే. అది ఒక కొత్త జీవితంలో ఆయనతో సహవాసం. గర్వం, విభేదాలు, కలహాలు, అవినీతి మొదలైన వాటికి ఈ మహోత్సవంలో తావుండకూడదు.

10. అయితే ఈలోకపు జారులతోనైనను, లోభులతోనైనను, దోచుకొనువారితోనైనను, విగ్రహారాధకులతోనైనను, ఏమాత్రమును సాంగత్యము చేయవద్దని కాదు; ఆలాగైతే మీరు లోకములోనుండి వెళ్లిపోవలసివచ్చును గదా?

11. ఇప్పుడైతే, సహోదరుడనబడిన వాడెవడైనను జారుడుగాని లోభిగాని విగ్రహారాధకుడుగాని తిట్టుబోతుగాని త్రాగుబోతుగాని దోచుకొనువాడుగాని అయియున్నయెడల, అట్టివానితో సాంగత్యము చేయకూడదు భుజింపనుకూడదని మీకు వ్రాయుచున్నాను.

12. వెలుపలివారికి తీర్పు తీర్చుట నాకేల? వెలుపలివారికి దేవుడే తీర్పు తీర్చునుగాని

వ 3; 1 కోరింథీయులకు 6:1-5; 1 కోరింథీయులకు 11:31. వ్యక్తులకు ఇతర వ్యక్తులపై తీర్పు తీర్చే హక్కు లేకపోయినా ఒక క్రైస్తవ సంఘానికి తన సహవాసంలో ఎవరు ఉండవచ్చో ఎవరు ఉండకూడదో అనే విషయంపై తీర్పు తీర్చే హక్కు ఉంది. సంఘం ఈ హక్కును వినియోగించుకోవాలి. దుర్మార్గులైన వారిని వెలివేస్తే సంఘం పరిశుద్ధతలో, బలప్రభావాలలో ఎదగగలదు. అలా జరక్కపోతే ఆ సంఘంపై ఆపద విరుచుకుపడేందుకు పొంచి ఉందన్న మాట. వ్యభిచారుల్ని, వ్యభిచారిణుల్ని, దొంగల్ని, అన్యాయస్థుల్ని, నిజాయితీ లేనివారిని సంఘ సహవాసంలో ఉండనిస్తే దేవుడు పెద్ద మొత్తంలో తన దీవెనలు వెనక్కు తీసేసుకుంటాడు (అయితే ఇది తక్షణమే ప్రజలకు కనబడకపోవచ్చు). అలాంటి సంఘంలో ఆధ్యాత్మిక సామర్థ్యాలు అనేకం ఉండవచ్చు, పరిచర్యలో విజయాలుగా కనిపించేవి ఉండవచ్చు. కానీ అందులోని కుళ్ళు సంఘంలో నిజమైన ఆధ్యాత్మిక జీవాన్ని దోచుకుంటుంది.

13. మీరు లోపటివారికి తీర్పు తీర్చువారు గనుక ఆ దుర్మార్గుని మీలో నుండి వెలివేయుడి.
ద్వితీయోపదేశకాండము 17:7, ద్వితీయోపదేశకాండము 19:19, ద్వితీయోపదేశకాండము 22:21, ద్వితీయోపదేశకాండము 22:24, ద్వితీయోపదేశకాండము 24:7