Sajeeva Vahini - Bible AI - Beta

1. యోసేపు తన తండ్రి ముఖముమీద పడి అతని గూర్చి యేడ్చి అతని ముద్దుపెట్టుకొనెను.

“కన్నీళ్ళు విడిచాడు”– ఆదికాండము 45:14.

2. తరువాత యోసేపు సుగంధ ద్రవ్యములతో తన తండ్రి శవమును సిద్ధపరచవలెనని తన దాసులైన వైద్యులకు ఆజ్ఞాపించెను గనుక ఆ వైద్యులు ఇశ్రాయేలును సుగంధ ద్రవ్యములతో సిద్ధపరచిరి.

“యాకోబు” చనిపోయాడు (ఆదికాండము 49:33), “ఇస్రాయేల్” మృతదేహాన్ని సుగంధద్రవ్యాలతో సిద్ధం చేశారు. చివరికి అతడు తన యాకోబు స్వభావాన్ని కోల్పోయాడు. ఆదికాండము 32:18 చూడండి.

3. సుగంధ ద్రవ్యములతో సిద్ధపరచబడువారి కొరకు దినములు సంపూర్ణమగునట్లు అతనికొరకు నలుబది దినములు సంపూర్ణమాయెను. అతనిగూర్చి ఐగుప్తీయులు డెబ్బది దినములు అంగలార్చిరి.

సమాధి చెయ్యడం కోసం దేహాన్ని సిద్ధం చెయ్యడంలో పురాతన ఈజిప్ట్‌వారు ఆరితేరినవారు. 3,500 ఏళ్ళ తరువాత కూడా వారు సిద్ధపరచిన శవాలు కొన్ని చెడిపోకుండా ఇప్పటికీ అలాగే ఉన్నాయి.

4. అతనిగూర్చిన అంగలార్పు దినములు గడచిన తరువాత యోసేపు ఫరో యింటి వారితో మాటలాడి - మీ కటాక్షము నామీద నున్నయెడల మీరు అనుగ్రహించి నా మనవి ఫరో చెవిని వేసి

5. నా తండ్రి నాచేత ప్రమాణము చేయించి - ఇదిగో నేను చనిపోవుచున్నాను, కనానులో నా నిమిత్తము సమాధి త్రవ్వించితిని గదా, అందులోనే నన్ను పాతిపెట్టవలెనని చెప్పెను. కాబట్టి సెలవైతే నేనక్కడికి వెళ్లి నా తండ్రిని పాతిపెట్టి మరల వచ్చెదనని చెప్పుడనెను.

ఆదికాండము 47:29-31 నోట్.

6. అందుకు ఫరో అతడు నీచేత చేయించిన ప్రమాణము చొప్పున వెళ్లి నీ తండ్రిని పాతిపెట్టుమని సెలవిచ్చెను.

7. కాబట్టి యోసేపు తన తండ్రిని పాతిపెట్టుటకు పోయెను; అతనితో ఫరో యింటి పెద్దలైన అతని సేవకులందరును ఐగుప్తు దేశపు పెద్దలందరును

8. యోసేపు యింటివారందరును అతని సహోదరులును అతని తండ్రి ఇంటివారును వెళ్లిరి. వారు తమ పిల్లలను తమ గొఱ్ఱెల మందలను తమ పశువులను మాత్రము గోషెను దేశములో విడిచిపెట్టిరి.

9. మరియు రథములును రౌతులును అతనితో వెళ్లినందున ఆ సమూహము బహు విస్తారమాయెను.

10. యెర్దానునకు అవతలనున్న ఆఠదు కళ్లమునొద్దకు చేరి అక్కడ బహు ఘోరముగా అంగలార్చిరి. అతడు తన తండ్రిని గూర్చి యేడు దినములు దుఃఖము సలిపెను.

11. ఆ దేశమందు నివసించిన కనానీయులు ఆఠదు కళ్లము నొద్ద ఆ దుఃఖము సలుపుట చూచి - ఐగుప్తీయులకు ఇది మిక్కటమైన దుఃఖమని చెప్పుకొనిరి గనుక దానికి ఆబేల్‌ మిస్రాయిము అను పేరు పెట్టబడెను, అది యొర్దానునకు అవతల నున్నది.

“ఆబేల్ మిస్రాయిం”– అంటే “ఈజిప్ట్‌వారి విలాపం”.

12. అతని కుమారులు తన విషయమై అతడు వారి కాజ్ఞాపించినట్లు చేసిరి.

13. అతని కుమారులు కనాను దేశమునకు అతని శవమును తీసికొనిపోయి మక్పేలా పొలమందున్న గుహలో పాతి పెట్టిరి. దానిని ఆ పొలమును అబ్రాహాము తనకు శ్మశానముకొరకు స్వాస్థ్యముగానుండు నిమిత్తము మమ్రే యెదుట హిత్తెయుడైన ఎఫ్రోను యొద్ద కొనెను
అపో. కార్యములు 7:16

ఆదికాండము 23:16-20 చూడండి.

14. యోసేపు తన తండ్రిని పాతిపెట్టిన తరువాత అతడును అతని సహోదరులును అతని తండ్రిని పాతిపెట్ట వెళ్లిన వారందరును తిరిగి ఐగుప్తునకు వచ్చిరి.

15. యోసేపు సహోదరులు తమ తండ్రి మృతిపొందుట చూచి ఒకవేళ యోసేపు మనయందు పగపట్టి మన మతనికి చేసిన కీడంతటి చొప్పున మనకు నిశ్చయముగా కీడు జరిగించుననుకొని

ఆదికాండము 37:28 ఆదికాండము 42:21-22 చూడండి. యోసేపు వారిపట్ల ఎంత ఆదరం చూపినప్పటికీ వారి మనసులు దోషభరితంగానే ఉండి వారు భయపడేలా చేశాయి. ఈ విధంగా యాకోబు వారిని చెప్పమన్న సంగతి ఎక్కడా రాసి లేదు. ఒకవేళ యాకోబు నిజంగానే వారికలా చెప్పి ఉండవచ్చు.

16. యోసేపునకు ఈలాగు వర్తమాన మంపిరి

17. - నీ తండ్రి తాను చావక మునుపు ఆజ్ఞాపించిన దేమనగా - మీరు యోసేపుతో నీ సహోదరులు నీకు కీడు చేసిరి గనుక దయచేసి వారి అపరాధమును వారి పాపమును క్షమించుమని అతనితో చెప్పుడనెను. కాబట్టి దయచేసి నీ తండ్రి దేవుని దాసులా అపరాధము క్షమించుమనిరి. వారు యోసేపుతో ఈలాగు మాటలాడుచుండగా అతడు ఏడ్చెను.

“ఏడ్చాడు”– ఆదికాండము 45:14. తనపై వారికి నమ్మకం లేదని తెలిసి యోసేపుకు దుఃఖం కలిగింది. మన అపనమ్మకం కూడా యేసు ప్రభువుకు విచారం కలిగించదా?

18. మరియు అతని సహోదరులు పోయి అతని యెదుట సాగిలపడి ఇదిగో - మేము నీకు దాసులమని చెప్పగా

“ఎదుట”– ఆదికాండము 37:8-10.

19. యోసేపు - భయపడకుడి, నేను దేవుని స్థానమందున్నానా?

దేవుడొక్కడే మనుషుల తీర్పరి అంటున్నాడు యోసేపు. పగ తీర్చుకోవడం అవసరమైతే అలా తీర్చుకునేవాడు ఆయనే (రోమీయులకు 12:17 రోమీయులకు 12:19). సంఖ్యాకాండము 31:2 నోట్ చూడండి.

20. మీరు నాకు కీడుచేయ నుద్దేశించితిరి గాని నేటి దినమున జరుగుచున్నట్లు, అనగా బహు ప్రజలను బ్రదికించునట్లుగా అది మేలుకే దేవుడు ఉద్దేశించెను.

ఈ ఒక్క వచనంలో దేవునిపై యోసేపు దృఢమైన నమ్మకం, ఆధ్యాత్మిక సత్యాలను గురించి అతని గ్రహింపు, దేవుని సంకల్పం గురించిన అతని సంపూర్ణమైన అంగీకారం కనిపిస్తున్నాయి (ఆదికాండము 45:5-7 ద్వితీయోపదేశకాండము 23:5 కీర్తనల గ్రంథము 76:10 రోమీయులకు 8:28 పోల్చి చూడండి). మానవ చరిత్ర అంతటిలోనూ లోకానికి రాజాది

21. కాబట్టి భయపడకుడి, నేను మిమ్మును మీ పిల్లలను పోషించెదనని చెప్పి వారిని ఆదరించి వారితో ప్రీతిగా మాటలాడెను.

“దయగా మాట్లాడాడు”– యోసేపు జీవితంలో జరిగిన కొన్ని సంగతులకూ, క్రీస్తు జీవితంలోని కొన్ని సంఘటనలకూ చాలా దగ్గర పోలికలున్నాయి. వీరిద్దరినీ వీరి తండ్రులు ప్రత్యేకంగా ప్రేమించారు (ఆదికాండము 37:3 మత్తయి 3:17 యోహాను 3:35 యోహాను 5:20). ఇద్దరినీ వారి స్వంత ప్రజలే ద్వేషించార

22. యోసేపు అతని తండ్రి కుటుంబపువారును ఐగుప్తులో నివసించిరి, యోసేపు నూటపది సంవత్సరములు బ్రదికెను.

23. యోసేపు ఎఫ్రాయిముయొక్క మూడవతరము పిల్లలను చూచెను; మరియు మనష్షే కుమారుడైన మాకీరునకు కుమారులు పుట్టి యోసేపు ఒడిలో ఉంచబడిరి.

24. యోసేపు తన సహోదరులను చూచి - నేను చనిపోవుచున్నాను; దేవుడు నిశ్చయముగా మిమ్మును చూడవచ్చి, యీ దేశములోనుండి తాను అబ్రాహాము ఇస్సాకు యాకోబులతో ప్రమాణము చేసియిచ్చిన దేశమునకు మిమ్మును తీసికొని పోవునని చెప్పెను
హెబ్రీయులకు 11:22

ఆదికాండము 13:15 ఆదికాండము 26:3 ఆదికాండము 35:12 చూడండి.

25. మరియు యోసేపు దేవుడు నిశ్చయముగా మిమ్మును చూడవచ్చును; అప్పుడు మీరు నా యెముకలను ఇక్కడనుండి తీసికొని పోవలెనని చెప్పి ఇశ్రాయేలు కుమారులచేత ప్రమాణము చేయించుకొనెను.

26. యోసేపు నూటపది సంవత్సరములవాడై మృతి పొందెను. వారు సుగంధ ద్రవ్యములతో అతని శవమును సిద్ధపరచి ఐగుప్తు దేశమందు ఒక పెట్టెలో ఉంచిరి.

“నూట పదేళ్ళు”– హెబ్రీయులకు 11:22 చూడండి. ఆదికాండం గ్రంథమంతా మనుషుల ఆయుర్ధాయం తగ్గుతూ వస్తున్నట్టు గమనించవచ్చు (ఆదికాండము 5:27 ఆదికాండము 9:29 ఆదికాండము 11:10-32 ఆదికాండము 25:7 ఆదికాండము 37:28 ఆదికాండము 47:28). తరువాతి కాలంలో ఇదింకా తగ్గిపోయింది (కీర్తనల గ్రంథము 90:10). “శవపేటికలో ఉంచారు”– ఆదికాం