1. ఆ తరువాత యోబు మాటలాడ మొదలుపెట్టి తాను పుట్టిన దినమును శపించెను.

ఇక్కడనుంచి 31వ అధ్యాయంవరకు యోబు బాధల గురించి యోబు, అతని స్నేహితులు పలికిన మాటలు ఉన్నాయి. అతనికి అలాంటి విపత్తు ఎందుకు కలిగిందో అన్న సమస్యకు సమాధానాన్ని ఎవరికి వారు ఆలోచిస్తూ వారంతా కలిసి 7 రోజులు గడిపారు. యోబు ఈ సంభాషణను ఆరంభించాడు. చాలా కాలంగా అతడు ఎడతెగని వేదన అనుభవిస్తూ తన బాధల గురించి తలపోస్తూ ఉన్నాడు. దేవుడెందుకు నన్నిలా చేశాడు? నేను చేసిన దోషం ఏమిటి? నాకిక మిగిలినదేమిటి? బ్రతకడం కంటే మరణం మేలు గదా. అసలు పుట్టకుండానే ఉంటే అంతకంటే మంచిది కాదా? ఇలాంటి ప్రశ్నలు అతని మనస్సును వేధిస్తూ ఉన్నాయి, అతని ఆత్మను క్రుంగదీస్తూ ఉన్నాయి. అసలు ఏం జరిగిందో ఏమీ అంతుబట్టలేదు. తన సమస్యల్లో దేనికీ జవాబు లేదు. పరలోకంలో అతని గురించి సైతాను, దేవుడు మాట్లాడుకున్న మాటలు అతనికి తెలియదు. అతని స్నేహితులు అతనికేమీ ఆదరణ కలిగించలేదు. దేవుడు మౌనం వహించాడు. ఒక సంగతి గుర్తుంచుకోవాలి. యోబుకు యోహాను 16:33; రోమీయులకు 8:17-18 రోమీయులకు 8:28; 2 కోరింథీయులకు 4:17; 1 పేతురు 4:12-13; ప్రకటన గ్రంథం 7:17; ప్రకటన గ్రంథం 21:3-4 లాంటి వాగ్దానాలు లేవు. ఈ వాక్యాలను అప్పటికింకా రాసి ఉండలేదు. క్రీస్తు సిలువ ద్వారా దేవుని అద్భుత ప్రేమ ప్రత్యక్షాన్ని యోబు చూడలేదు. అదింకా జరగలేదు. దేవుడు మానవ చరిత్రలో ఇక్కడ కొంచెం, అక్కడ కొంచెం ఇలా క్రమక్రమంగా తన సత్యాన్ని వెల్లడి చేశాడు. ఇలాంటి వెల్లడింపు అప్పుడప్పుడే ఆరంభమౌతున్న రోజుల్లో యోబు జీవించాడు. యోబుకు తానున్న పరిస్థితుల్లో గ్రహింపునూ ప్రోత్సాహాన్నీ ఇచ్చే దేవుని వాగ్దానమేమీ లేదు. జరిగినదేమిటో అర్థం చేసుకునేందుకు అతనికి ఉన్నదల్లా తన సొంత ఆలోచనలే. కాని అవి అతనికెలాంటి ఆదరణనూ ఇవ్వలేకపోయాయి. ఎందుకంటే జరిగిన విషయం ఏ తర్కానికీ దేవుణ్ణి గురించి తనకు తెలిసిన దానంతటికీ భిన్నంగా ఉంది. ఒక్కసారి బద్దలైన ఆనకట్టలాగా అతని హృదయమూ, నోరు తెరుచుకుని అప్పటిదాకా బిగబట్టి ఉంచిన పరితాపం, పరిపరివిధాల పోయిన ఆలోచనలు తన్నుకువచ్చాయి. యోబు అన్నమాటల గురించి కఠినమైన అభిప్రాయం ఏర్పరచకూడదు. సహించలేనంతగా శరీరం, మనసు గాయపడిన మనిషి నోట వెలువడే మాటలే ఈ అధ్యాయంలో కనిపిస్తున్నాయి. (దీని విషయం యోబు స్వంత అభిప్రాయాన్ని యోబు 6:2-4 యోబు 6:11-13; యోబు 7:11 లో చూడండి.) యోబు భూమి అంతటిలోకి నీతిన్యాయాల విషయంలో సాటిలేనివాడు. ఇది దేవుడు అన్నమాటే (యోబు 2:3). మనలో ఎవరమైనా ఆ పరిస్థితుల్లో ఉంటే అంతకన్నా యోగ్యంగా ప్రవర్తించేవారమూ మాట్లాడేవారమూ కాదు. బైబిలు ద్వారా దేవుని సర్వ సత్యాన్ని గ్రహించిన ఒక విశ్వాసి అయితే ఇలాంటి బాధ, విపత్తులు ఎదురైనప్పుడు యోబు మాట్లాడినట్టుగా మాట్లాడకూడదు. దేవుడు వెల్లడించిన సత్యం యోబుకు ఎంత తక్కువ తెలుసో మనం గుర్తించుకోవాలి.

2. యోబు ఈలాగు అనెను

3. నా తల్లి గర్భద్వారములను అది మూయనందుకును నా నేత్రములకు అది బాధను మరుగు చేయనందుకును నేను పుట్టిన దినము లేకపోవును గాక మగపిల్ల పుట్టెనని ఒకడు చెప్పిన రాత్రి లేక పోవును గాక.

యిర్మియా 20:14-18 పోల్చి చూడండి.

4. ఆ దినము అంధకారమగును గాకపైనుండి దేవుడు దాని నెంచకుండును గాకవెలుగు దానిమీద ప్రకాశింపకుండును గాక

5. చీకటియు గాఢాంధకారమును మరల దానిని తమ యొద్దకు తీసికొనును గాక. మేఘము దాని కమ్మును గాకపగలును కమ్మునట్టి అంధకారముదాని బెదరించును గాక

6. అంధకారము ఆ రాత్రిని పట్టుకొనును గాకసంవత్సరపు దినములలో నేనొకదాననని అది హర్షింపకుండును గాకమాసముల సంఖ్యలో అది చేరకుండును గాక.

7. ఆ రాత్రి యెవడును జననము కాకపోవును గాకదానిలో ఏ ఉత్సాహధ్వని పుట్టకుండును గాక

8. దినములు అశుభదినములని చెప్పువారు దానిని శపించుదురు గాకభుజంగమును రేపుటకు నేర్పుగలవారు దానిని శపించుదురు గాక.

“లివయాటాన్”– యోబు 41:1; యెషయా 27:1 నోట్.

9. అందులో సంధ్యవేళను ప్రకాశించు నక్షత్రములకు అంధకారము కమ్మును గాకవెలుగుకొరకు అది యెదురుచూడగా వెలుగు లేకపోవును గాక

10. అది వేకువ కనురెప్పలను చూడకుండును గాకపుట్టుకలోనే నేనేల చావకపోతిని?

11. గర్భమునుండి బయలుదేరగానే నేనేల ప్రాణము విడువక పోతిని?

యోబు 10:18-19.

12. మోకాళ్లమీద నన్నేల ఉంచుకొనిరి?నేనేల స్తనములను కుడిచితిని?

13. లేనియెడల నేనిప్పుడు పండుకొని నిమ్మళించి యుందును నేను నిద్రించియుందును, నాకు విశ్రాంతి కలిగి యుండును

అన్నిటికంటే ముఖ్యంగా శరీరంలోను, ఆత్మలోను నెమ్మది కలగాలని యోబు కోరుకుంటున్నాడు. అందువల్ల బ్రతుకు కంటే చావే అతనికి తియ్యగా అనిపించింది.

14. తమకొరకు బీడుభూములయందు భవనములు కట్టించు కొనిన భూరాజులతోను మంత్రులతోను నేను నిద్రించి నిమ్మళించియుందును.

15. బంగారము సంపాదించి తమ యిండ్లను వెండితో నింపుకొనిన అధిపతులతో నిద్రించి విశ్రమించి యుందును.

16. అకాలసంభవమై కంటబడకయున్న పిండమువంటివాడనై లేకపోయి యుందును. వెలుగు చూడని బిడ్డలవలె లేకపోయి యుందును.

17. అక్కడ దుర్మార్గులు ఇక శ్రమపరచరు బలహీనులై అలసినవారు విశ్రాంతి నొందుదురు

18. బంధింపబడినవారు కార్యనియామకుల శబ్దము వినక యేకముగా కూడి విశ్రమించుదురు

19. అల్పులేమి ఘనులేమి అందరు నచ్చటనున్నారుదాసులు తమ యజమానుల వశమునుండి తప్పించుకొని స్వతంత్రులై యున్నారు.

20. దుర్దశలోనున్న వారికి వెలుగియ్యబడుట ఏల?దుఃఖా క్రాంతులైనవారికి జీవమియ్యబడుట ఏల?

యోబు వేసిన ఈ ప్రశ్న మానవ చరిత్ర ఆరంభాల నుంచీ మనుషులను కలత పెడుతున్నది. ప్రశ్న ఏమిటంటే జీవితం బాధలతో నిండి, ఒక ఆశాభావం గానీ గమ్యం గానీ లేనప్పుడు బ్రతికి ప్రయోజనం ఏమిటి? యోబుకైతే జీవితం అనవసరంగా, అసాధ్యంగా అయిపోయింది. బైబిలు ఇతర భాగాల్లో, ముఖ్యంగా క్రొత్త ఒడంబడిక గ్రంథంలో దేవుని ప్రజలకు వచ్చే బాధలకు కారణాలు వెల్లడి అయ్యాయి (ద్వితీయోపదేశకాండము 8:2 ద్వితీయోపదేశకాండము 8:16; కీర్తనల గ్రంథము 66:10-12; సామెతలు 17:3; రోమీయులకు 5:3-4; 2 కోరింథీయులకు 12:7-10; హెబ్రీయులకు 2:10; హెబ్రీయులకు 12:5-11; యాకోబు 1:2-4; 1 పేతురు 1:6-7 మొ।।). ఇవేవీ తెలుసుకొనే అవకాశం యోబుకు లేదు. దేవుడు మనుషులతో వ్యవహరించే తీరు, దేవుని ప్రజల మీదికి వచ్చే బాధలకు కారణాలు, ఇవన్నీ మనలో ఎవరూ పూర్తిగా అర్థం చేసుకోలేము. యోబు గ్రంథంలో కూడా ఇందుకు కారణం ఏదీ కనబడడం లేదు. ఈ పుస్తకం చివర్లో దేవుడు తనను తాను సర్వ జ్ఞానం గల సర్వాధికారిగా ప్రత్యక్ష పరచుకుంటాడు అంతే. అయితే న్యాయవంతులకు ఎదురయ్యే కష్టాలు, పరీక్షల గురించి కొన్ని కారణాలు బైబిల్లో కనబడుతున్నాయి. ఈ కారణాలు ఇవి – విశ్వాసికి ఉన్న నమ్మకం నిజమైనదని రుజువు చేసి దాన్ని శుద్ధీకరించి బలపరచేందుకు కష్టాలు వస్తాయి. అవి విశ్వాసిలో ఓపిక అనే సుగుణాన్ని అభివృద్ధి చేస్తాయి. విశ్వాసిలోని బద్ధకాన్ని వదలగొట్టి అంతరంగ పరిశోధన, ఆలోచన, ప్రార్థనలకు అతణ్ణి పురిగొల్పుతాయి. విశ్వాసిలో మిగిలిన స్వనీతి, గొప్పలు చెప్పుకోవడం, విలాసవంతమైన జీవన విధానాల పై దెబ్బ తీస్తాయి. విశ్వాసులను ఇహలోక బంధకాలనుంచి వేరు చేసి దేవునిలోనే తమ సర్వస్వాన్ని వెదికేలా చేస్తాయి. తమకోసం క్రీస్తు పడ్డ బాధలను మరింత స్పష్టంగా అర్థం చేసుకునేలా చేస్తాయి. వాటిని విశ్వాసి సహనంతో భరిస్తే అవి సైతాను నోరు మూయించి దేవునికి మహా ఘనతను కలిగిస్తాయి. విశ్వాసి లక్షణాలను వెలికి తేవడానికి వారిని మరింత లోపరహితంగా చేసి క్రీస్తు పోలికలోకి మార్చడానికి ఉపయోగపడతాయి. విశ్వాసికి ఎప్పటికీ నిలిచి ఉండే మహిమ భాగ్యాన్ని కలిగిస్తాయి (2 కోరింథీయులకు 4:17).

21. వారు మరణము నపేక్షింతురు దాచబడిన ధనముకొరకైనట్టు దానిని కనుగొనుటకైవారు లోతుగా త్రవ్వుచున్నారు గాని అది వారికి దొరకక యున్నది.
ప్రకటన గ్రంథం 9:6

చావు తరువాత ఏమి సంభవిస్తుందోనన్న భయం యోబుకు లేదు. అతని అంతర్వాణి అతణ్ణి దేని గురించీ తప్పుపట్టలేదు. దేవుని ఎదుట నిలిచి తన జీవిత కాలమంతటి గురించీ సంజాయిషీ చెప్పుకోవడానికి అతనికేమీ భయం లేదు. దేవుని ప్రజల్లో అతి శ్రేష్ఠులైనవారు కూడా చావు గురించి అర్రులు చాచడం అరుదు కాదు (సంఖ్యాకాండము 11:15; 1 రాజులు 19:4; యిర్మియా 20:14-18; యోనా 4:8; ఫిలిప్పీయులకు 1:23). కానీ ఆత్మహత్య అన్నది కనీసం ఆలోచించడానికైనా తగని పాపం. ఆత్మహత్య హత్యతో సమానమే.

22. సమాధికి చేరినప్పుడు వారు హర్షించి బహుగా సంతోషించెదరు.

23. మరుగుపడిన మార్గముగలవానికిని, దేవుడు చుట్టుకంచె వేసినవానికిని వెలుగు ఇయ్యబడనేల?

కంచె వేయడం అనేమాట యోబు 1:10 లో కూడా కనిపిస్తున్నది. అయితే అక్కడ దాని అర్థం పూర్తిగా వేరు. ఇక్కడ యోబు భావం ఏమిటంటే తన దుఃఖం నుండి కష్టం నుండీ బయటపడే మార్గం ఏదీ కనిపించడం లేదని. అతను పూర్తిగా అయోమయంలో పడిపోయాడు. ఇరుకులో, చీకటిలో ఉన్నట్టు చిక్కుకుపోయినట్టు అనిపించింది (యోబు 19:8; విలాపవాక్యములు 3:5).

24. భోజనమునకు మారుగా నాకు నిట్టూర్పు కలుగుచున్నదినా మొఱ్ఱలు నీళ్లవలె ప్రవహించుచున్నవి.

25. ఏది వచ్చునని నేను బహుగా భయపడితినో అదియేనాకు సంభవించుచున్నదినాకు భీతి పుట్టించినదే నామీదికి వచ్చుచున్నది.

ఇక్కడ యోబు అంటున్నది బహుశా తన ఆస్తి, సంతానం, ఆరోగ్యం హఠాత్తుగా నాశనమవడం గురించి కాదు – యోబు 29:18-20 చూడండి. ఈ భయం ఇక్కట్ల తరువాత అతనికి కలిగి ఉండవచ్చునేమో. అది దేవుని సహవాసాన్ని పూర్తిగా కోల్పోతాననీ దేవుని ముఖకాంతికి దూరమౌతాననీ అయి ఉండవచ్చు. అలాంటి స్థితిలో యోబులాంటి మనిషికి ఇది నిజంగా భయం గొలిపే ఆలోచన. ఇప్పుడది నెరవేరుతున్నదేమో అని యోబు భావిస్తున్నాడు.

26. నాకు నెమ్మది లేదు సుఖము లేదు విశ్రాంతి లేదు శ్రమయే సంభవించుచున్నది.