1. అరణ్యమును ఎండిన భూమియు సంతోషించును అడవి ఉల్లసించి కస్తూరిపుష్పమువలె పూయును

ఈ భాగాన్ని యెషయాలోని ఇలాంటి ఇతర భాగాలతో (యెషయా 11:6-9; యెషయా 32:15-16; యెషయా 49:8-11; యెషయా 51:3) పోల్చి చూడండి. ఈ అధ్యాయాన్ని ఎలా అర్థం చేసుకోవాలి అన్న విషయంలో భిన్నాభిప్రాయాలు ఉన్నాయి. ఇది బబులోను ప్రవాసం తరువాత యూదాదేశంలో కనిపించే ఆధ్యాత్మిక పరిస్థితుల వర్ణన అని కొందరు పండితుల అభిప్రాయం. మరికొందరు ఇది యేసు, ఆయన రాయబారులు జీవించిన కాలం వర్ణన అన్నారు. మరికొందరు ఇది ఈ కృపాయుగం అంతటి గురించీ వర్ణన అంటారు. మరికొందరు ఇది క్రీస్తు తిరిగి వచ్చిన వెంటనే వెయ్యేళ్ళ పరిపాలన ఆరంభం స్థితిగతులు అంటారు. మరి కొందరు ఇది క్రొత్త ఆకాశం, క్రొత్త భూమిలో కలుగబోయే పరిస్థితుల వర్ణన అంటారు. కొందరు ఈ వివరణ ఇస్రాయేల్ ప్రజలకూ, వారి దేశానికీ సంబంధించినది కాదని గట్టిగా అంటారు. మరి కొందరైతే ఇది వారికి మాత్రమే సంబంధించినది అంటారు. ఈ నోట్స్ రాసిన వ్యాఖ్యాత అభిప్రాయం ఏమిటంటే, ఈ భాగం క్రీస్తు రెండవ రాకడ తర్వాత కనిపించే పరిస్థితులను వివరిస్తున్నది. ఇది బహుశా వెయ్యేళ్ళ పాలన సమయానికి చెందినది. దీనికీ ఇస్రాయేల్‌కూ సంబంధం ఉంది. ఇక్కడ కనిపిస్తున్న అలంకారికమైన మాటలు కొంతవరకు యేసు తన రక్షణ కారణమైన చర్యను మానవ హృదయాల్లో జరిగించినప్పుడెల్లా జరిగే దాన్ని గురించి కూడా వివరిస్తున్నాయేమో అని ఈ వ్యాఖ్యాత నమ్మకం. భవిష్య ద్వాక్కులను సరిగ్గా అర్థం చేసుకొని వివరణ ఇవ్వాలన్న విషయం ముఖ్యమే గాని దానికంటే దేవునిపట్ల, మనిషి పట్ల ప్రేమ కలిగి పవిత్ర జీవనం గడపడం మరింత ముఖ్యమైన విషయం (1 కోరింథీయులకు 13:2). పై వివరణల్లో ఏదో ఒకదాన్ని నమ్మడం వల్ల మనం ఇతరులకంటే మంచివారం కాలేము. లేక వీటిల్లో దేన్నైనా త్రోసిపుచ్చితే చెడ్డవారం కాబోము. భవిష్యత్తు గురించి యెషయా చెప్తున్న మాటలను అర్థం చేసుకోవడంలో మనం ఆచరణలో పెట్టగలిగే ఆధ్యాత్మిక గుణపాఠాలను కూడా నేర్చుకొందాం. అవి దేవునికిష్టమైన రీతిలో మనం ఇప్పుడు జీవించేందుకు ఉపయోగపడతాయి. “ఎడారి”, “ఎండిన భూమి”– ఈ అధ్యాయంలోని మాటలనుబట్టి చూస్తే ఇది ఇస్రాయేల్ దేశాన్ని సూచిస్తున్నట్టు ఉంది. ఇంతకుముందు అధ్యాయంలో ఎదోంలో జరిగే సంగతులకు ఇక్కడ రాసివున్నది పూర్తిగా భిన్నంగా ఉంది. “పూలు పూస్తుంది”– యెషయా 27:6; యెషయా 51:3.

2. అది బహుగా పూయుచు ఉల్లసించును ఉల్లసించి సంగీతములు పాడును లెబానోను సౌందర్యము దానికి కలుగును కర్మెలు షారోనులకున్న సొగసు దానికుండును అవి యెహోవా మహిమను మన దేవుని తేజస్సును చూచును.

“ఘనత...తేజస్సు”– యెషయా 4:5; యెషయా 6:3; యెషయా 59:19 (1 వ వచనం నెరవేరినప్పుడు కనిపిస్తుంది).

3. సడలిన చేతులను బలపరచుడి తొట్రిల్లు మోకాళ్లను దృఢపరచుడి.
హెబ్రీయులకు 12:12

హెబ్రీయులకు 12:12 – భరించవలసినవాటిని భరించాలి, కష్టం, ప్రమాదం వచ్చిన సమయంలో నిబ్బరంగా, ధైర్యంగా ఉండాలి అని అర్థం.

4. తత్తరిల్లు హృదయులతో ఇట్లనుడి భయపడక ధైర్యముగా ఉండుడి ప్రతిదండన చేయుటకై మీ దేవుడు వచ్చుచున్నాడు ప్రతిదండనను దేవుడు చేయదగిన ప్రతికారమును ఆయన చేయును ఆయన వచ్చి తానే మిమ్మును రక్షించును.

“దేవుడు వస్తాడు”– దేవుని అవతారమైన క్రీస్తు రాకడ గురించి కావచ్చు. “ప్రతీకారం”– సంఖ్యాకాండము 31:12; కీర్తనల గ్రంథము 94:1. ఇక్కడి అర్థం క్రీస్తు రాకడే అయితే అది రెండవ రాకడ అయివుండాలి. ఎందుకంటే మొదటి రాకడలో ఆయన మానవుల ప్రాణాలను రక్షించేందుకు వచ్చాడు, నాశనం చేసేందుకు కాదు. ఎవరిమీదా ఆయన పగ సాధించలేదు. ఆయన రెండవ రాకడలో ప్రతీకారం తీర్చుకుంటాడు (2 థెస్సలొనీకయులకు 1:5-10).

5. గ్రుడ్డివారి కన్నులు తెరవబడును చెవిటివారి చెవులు విప్పబడును
మత్తయి 11:5, మార్కు 7:37, లూకా 7:22, అపో. కార్యములు 26:18

“కళ్ళను...చెవులను”– యెషయా 29:18; యెషయా 32:3; యెషయా 33:24; యెషయా 42:7.

6. కుంటివాడు దుప్పివలె గంతులువేయును మూగవాని నాలుక పాడును అరణ్యములో నీళ్లు ఉబుకును అడవిలో కాలువలు పారును
మత్తయి 11:5, మార్కు 7:37, లూకా 7:22

“నాలుక”– యెషయా 32:4. “ప్రవాహాలు”– యెషయా 30:25; యెషయా 41:18; యెషయా 43:19.

7. ఎండమావులు మడుగులగును ఎండిన భూమిలో నీటిబుగ్గలు పుట్టును నక్కలు పండుకొనినవాటి ఉనికిపట్టులో జమ్మును తుంగగడ్డియు మేతయు పుట్టును.

8. అక్కడ దారిగా నున్న రాజమార్గము ఏర్పడును అది పరిశుద్ధ మార్గమనబడును అది అపవిత్రులు పోకూడని మార్గము అది మార్గమున పోవువారికి ఏర్పరచబడును మూఢులైనను దానిలో నడచుచు త్రోవను తప్పక యుందురు

“అక్కడ”– యూదా దేశం. “రాజమార్గం”– యెషయా 11:16; యెషయా 19:23; యెషయా 40:3; యెషయా 49:11; యెషయా 57:14; యెషయా 62:10. “పవిత్ర మార్గం”– ఈ రాజమార్గం పవిత్రుల కోసమే, విముక్తి పొందిన వారికోసమే (వ 9). ఇక్కడ చెప్పిన సమయం ఇస్రాయేల్‌ప్రజలు దేవునివైపుకూ, జీవానికీ దారితీసే ఇరుకు మార్గం వైపుకూ మళ్ళీ తిరిగే సమయాన్ని సూచిస్తున్నట్టుంది (మత్తయి 7:14; రోమీయులకు 11:26-27). ప్రజలు పవిత్రులుగా ఉంటారు. పవిత్ర మార్గాల్లో నడుస్తారు (యెషయా 4:3; యెషయా 62:12; జెకర్యా 14:20-21 చూడండి). యెషయా ఈ మాటలు రాసిన సమయంలో ఇస్రాయేల్‌వారి ఆధ్యాత్మిక స్థితికీ (యెషయా 1:2-4), ప్రస్తుతం ఇస్రాయేల్‌ప్రజల పరిస్థితికీ ఇది భిన్నంగా ఉంది. తెలివితక్కువ వారు ఆ దారిని కనుక్కోలేకపోయేందుకు కారణం తెలివి లేకపోవడం కాదు. వారి చెడుతనమే ఇందుకు కారణం.

9. అక్కడ సింహముండదు క్రూరజంతువులు దాని ఎక్కవు, అవి అక్కడ కనబడవు విమోచింపబడినవారే అక్కడ నడచుదురు యెహోవా విమోచించినవారు పాటలుపాడుచు తిరిగి సీయోనునకు వచ్చెదరు

“మృగాలు”– యెషయా 11:6-9; యెషయా 65:25.

10. వారి తలలమీద నిత్యానందముండును వారు ఆనందసంతోషములు గలవారై వచ్చెదరు. దుఃఖమును నిట్టూర్పును ఎగిరిపోవును.
ప్రకటన గ్రంథం 21:4

“ఎగిరిపోతాయి”– దేవుని సన్నిధిలో ఆనందంతో పాటలు పాడుతూ ఉండే స్థితికి మార్గం పవిత్రత, విముక్తి మార్గమే. ఇది పరమ సత్యం, శాశ్వత సత్యం (కీర్తనల గ్రంథము 126:1-3; యెషయా 25:8; ప్రకటన గ్రంథం 7:17; ప్రకటన గ్రంథం 14:1-5; ప్రకటన గ్రంథం 21:4).