1. ఆ కాలమందు బబులోనురాజును బలదాను కుమారుడునైన మెరోదక్బలదాను హిజ్కియా రోగియై బాగు పడిన సంగతి విని పత్రికలను కానుకను అతని యొద్దకు పంపగా

2 రాజులు 20:12-19 నోట్ చూడండి.

2. హిజ్కియా దూతలు వచ్చిన మాట విని వారిని లోపలికి రప్పించి, తన యింటనేమి రాజ్యమందేమి కలిగిన సమస్తవస్తువులలో దేనిని మరుగు చేయక తన పదార్థములు గల కొట్టును వెండి బంగారములను గంధవర్గములను పరిమళ తైలమును ఆయుధశాలను తన పదార్థములలో నున్న సమస్తమును వారికి చూపించెను.

3. పిమ్మట ప్రవక్తయైన యెషయా రాజైన హిజ్కియాయొద్దకు వచ్చి - ఆ మనుష్యులు ఏమనిరి? నీయొద్దకు ఎక్కడనుండి వచ్చిరి? అని యడుగగా హిజ్కియాబబులోనను దూరదేశమునుండి వారు వచ్చియున్నారని చెప్పెను.

4. నీ యింట వారేమేమి చూచిరని అతడడుగగా హిజ్కియా - నా పదార్థములలో దేనిని మరుగుచేయక నా యింటనున్న సమస్తమును నేను వారికి చూపించియున్నాననెను.

5. అంతట యెషయా హిజ్కియాతో నిట్లనెను యెహోవా సెలవిచ్చు మాట వినుము

6. రాబోవు దినములలో ఏమియు మిగులకుండ నీ యింటనున్న సమస్తమును, నేటివరకు నీ పితరులు సమకూర్చి దాచిపెట్టినది అంతయును బబులోను పట్టణమునకు ఎత్తికొని పోవుదురని సైన్యముల కధిపతియగు యెహోవా సెలవిచ్చుచున్నాడు.

7. మరియు నీ గర్భమందు పుట్టిన నీ పుత్రసంతును బబులోను రాజు నగరునందు నపుంసకులగా చేయుటకై వారు తీసికొనిపోవుదురు.

8. అందుకు హిజ్కియా - నీవు తెలియజేసిన యెహోవా ఆజ్ఞ చొప్పున జరుగుట మేలే; నా దినములలో సమాధాన సత్యములు కలుగునుగాక అని యెషయాతో అనెను.

దీనిలో యెషయా మొదటి భాగం ముగిసింది. యెషయా 1–35 అధ్యాయాలు అష్షూరువారు యూదాను ముట్టడించక ముందు రాశాడు. ఆ అధ్యాయాల్లో ఉన్న అనేక సంగతులను ఆ సంభవాన్ని దృష్టిలో పెట్టుకుని రాశాడు. 36,37 అధ్యాయాల్లో జెరుసలం దగ్గర అష్షూరు సైన్యాలు ఓడిపోవడం గురించి ఉంది. 39 అధ్యాయంలో ఒక క్రొత్త ప్రమాదం తల ఎత్తడం చూస్తున్నాం. అది యూదా పై బబులోనువారు దాడి చెయ్యడం. వీరు మాత్రం అష్షూరులాగా విఫలం కారు. జెరుసలంను పట్టుకుని దాని ప్రజలను తీసుకుపోతారు. 40–66 అధ్యాయాలు దీన్ని దృష్టిలో ఉంచుకుని రాశాడు యెషయా. అతడు భవిష్యత్తులో బబులోను పతనాన్ని గురించీ, అక్కడినుంచి యూదులు స్వదేశానికి తిరిగి రావడం గురించీ, జెరుసలంకు కలగబోయే వైభవం గురించీ రాశాడు. అంతే గాక యూదుల, ఇతర ప్రజల శాశ్వత రక్షణ ఎవరిపై ఆధారపడి ఉంటుందో ఆయనను – అంటే అభిషిక్తుడు అయిన యేసు క్రీస్తుప్రభువును, యెషయా స్పష్టంగా ఇక్కడ చూపెడుతున్నాడు.