1. కన్యకయైన బబులోనూ, క్రిందికి దిగి మంటిలో కూర్చుండుము కల్దీయుల కుమారీ, సింహాసనము లేకయే నేలమీద కూర్చుండుము నీవు మృదువువనియైనను సుకుమారివనియైనను జనులు ఇకమీదట చెప్పరు.

బబులోను గురించిన ఇతర భవిష్యద్వాక్కులు 13,1-14,23; 21:1-9; యిర్మీయా 50,51 అధ్యాయాలు. మానవాళి కుమార్తెగా ఇక్కడ బబులోనును చిత్రీకరించాడు ప్రవక్త. బబులోను దుర్మార్గత వల్ల ఆమె తన రాజ్యాన్ని పోగొట్టుకుంటుంది (వ 1), సిగ్గు పాలవుతుంది (వ 2,3), రాణిగా అది ఇకపై ఉండదు (వ 5), తన ప్రజల వినాశనాన్ని కళ్ళారా చూస్తుంది (వ 8), తన మంత్రగాళ్ళు, జ్యోతిష్కులు, సోదె చెప్పేవాళ్ళు జ్ఞానుల విషయంలో నిరాశ చెందుతుంది (వ 10-15). “దుమ్ము”– యెషయా 3:26; యెషయా 29:4; యోబు 2:13.

2. తిరుగటిదిమ్మలు తీసికొని పిండి విసరుము నీ ముసుకు పారవేయుము కాలిమీద జీరాడు వస్త్రము తీసివేయుము కాలిమీది బట్ట తీసి నదులు దాటుము.

“పిండి విసురు”– ఒక రాణి చేయవలసిన పని కాదు.

3. నీ కోకయు తీసివేయబడును నీకు కలిగిన యవమానము వెల్లడియగును నేను ప్రతిదండన చేయుచు నరులను మన్నింపను.

నహూము 3:5. ఆమె తనను తాను కాపాడుకోలేకపోతుంది. “ప్రతీకారం”– యెషయా 13:17-19. బబులోనుపై దేవుడు ఎలా ప్రతీకారం సాధిస్తాడో చూపిస్తున్నది. అసలు ప్రతీకారం తీర్చుకోవడానికి కారణమేమిటో ఈ అధ్యాయం మిగిలిన భాగంలో రాసివుంది. దేవుని ప్రతీకారం అంటే ఎల్లప్పుడూ న్యాయమైన తీర్పు అన్నమాట – సంఖ్యాకాండము 31:2 నోట్ చూడండి.

4. సైన్యములకధిపతియు ఇశ్రాయేలుయొక్క పరిశుద్ధ దేవుడునగు యెహోవా అని మా విమోచకునికి పేరు.

“విముక్తి దాత”– కీర్తనల గ్రంథము 78:35. “పవిత్రుడు”– యెషయా 1:4 నోట్.

5. కల్దీయుల కుమారీ, మౌనముగా నుండి చీకటిలోనికి పొమ్ము రాజ్యములకు దొరసానియని యికమీదట జనులు నిన్నుగూర్చి చెప్పరు.

బబులోను అందమైన పట్టణం. దాని అధికారం ఇంతింత కాదు.

6. నా జనులమీద కోపపడి నా స్వాస్థ్యము నపవిత్ర పరచి వారిని నీ చేతికి అప్పగించితిని నీవు వారియందు కనికరపడక వృద్దులమీద నీ కాడి మ్రానును మిక్కిలి బరువుగా మోపితివి.

“నా ప్రజ”– యెషయా 42:23-25; 2 దినవృత్తాంతములు 36:15-17. భవిష్యత్తులో జరగబోయే సంఘటన ఒకటి ఇప్పుడే జరిగిపోయినట్టుగా ఇక్కడ రాసి వుంది. ప్రవక్తల రచనలలో ఈ శైలి సాధారణంగా కనిపిస్తూనే ఉంటుంది. ఇస్రాయేల్‌ను పీడించిన వారిపైకి ఇప్పుడు దేవుని కోపం వస్తుంది (యిర్మియా 50:33-34 నోట్‌).

7. నేను సర్వదా దొరసానినై యుందునని నీవనుకొని వీటిని ఆలోచింపకపోతివి వాటి ఫలమేమవునో మనస్సునకు తెచ్చుకొనకపోతివి.
ప్రకటన గ్రంథం 18:7

బబులోను అహంకారం, అజ్ఞానం బయట పడుతున్నాయి (యిర్మియా 50:31). కీర్తనల గ్రంథము 49:11 పోల్చి చూడండి. ప్రకటన గ్రంథం 18:7 చూడండి.

8. కాబట్టి సుఖాసక్తురాలవై నిర్భయముగా నివసించుచు నేనే ఉన్నాను నేను తప్ప మరి ఎవరును లేరు నేను విధవరాలనై కూర్చుండను పుత్రశోకము నేను చూడనని అనుకొనుచున్నదానా, ఈ మాటను వినుము
ప్రకటన గ్రంథం 18:7

9. ఒక్క దినములోగా ఒక్క నిమిషముననే పుత్ర శోకమును వైధవ్యమును ఈ రెండును నీకు సంభవించును. నీవు అధికముగా శకునము చూచినను అత్యధికమైన కర్ణపిశాచ తంత్రములను నీవు ఆధారముగా చేసికొనినను ఆ యపాయములు నీమీదికి సంపూర్తిగా వచ్చును.
ప్రకటన గ్రంథం 18:8-23

“రోజు”– బబులోను శత్రువశం కావడం ఎంత హఠాత్తుగా జరిగిపోతుందో సూచిస్తున్నది (వ 11). “మంత్రాలు”– వ 12. పురాతన ప్రపంచంలో బబులోను మంత్ర విద్యలకు, విగ్రహారాధనకు, జ్యోతిష్యాలకు ఒక కేంద్ర స్థానం. దేవుడు వారిని శిక్షించేందుకు కోపంతో లేచినప్పుడు ఇవేవీ వారికి తోడు రావని వారు గ్రహించారు.

10. నీ చెడుతనమును నీవు ఆధారము చేసికొని యెవడును నన్ను చూడడని అనుకొంటివి నేనున్నాను నేను తప్ప మరి ఎవరును లేరని నీవను కొనునట్లుగా నీ విద్యయు నీ జ్ఞానమును నిన్ను చెరిపివేసెను.

“చూడరు”– యెషయా 29:15; హెబ్రీయులకు 4:13. “జ్ఞానం”– బబులోను దాని జ్ఞానులకు ప్రసిద్ధి. అయితే వారి జ్ఞానమే వారి నాశనానికి ఒక కారణమైంది.

11. కీడు నీమీదికివచ్చును నీవు మంత్రించి దాని పోగొట్ట జాలవు ఆ కీడు నీమీద పడును దానిని నీవు నివారించలేవు నీకు తెలియని నాశనము నీమీదికి ఆకస్మికముగా వచ్చును.
ప్రకటన గ్రంథం 18:7

12. నీ బాల్యమునుండి నీవు ప్రయాసపడి అభ్యసించిన నీ కర్ణపిశాచ తంత్రములను నీ విస్తారమైన శకునములను చూపుటకు నిలువుము ఒకవేళ అవి నీకు ప్రయోజనములగునేమో ఒకవేళ నీవు మనుష్యులను బెదరింతువేమో

ఇవి ఎగతాళిగా రాసిన మాటలు. వారి మంత్రగాళ్ళు వారికి విజయం కలిగించే అవకాశమేమీ లేదు.

13. నీ విస్తారమైన యోచనలవలన నీవు అలసియున్నావు జ్యోతిష్కులు నక్షత్రసూచకులు మాసచర్య చెప్పువారు నిలువబడి నీమీదికి వచ్చునవి రాకుండ నిన్ను తప్పించి రక్షించుదురేమో ఆలోచించుము.

“జ్యోతిష్కులు”– బబులోనులో వీరు కోకొల్లలు (దానియేలు 2:2, దానియేలు 2:10). అయితే బబులోనుకు గడ్డు స్థితి సమీపించినప్పుడు ఎప్పటిలాగానే వారంతా విఫలమౌతారు. ఎందుకంటే ఒక వ్యక్తి లేదా, ఒక ప్రజ భవిష్యత్తును నక్షత్రాల మూలంగా చెప్పగలగడం అసాధ్యం. జ్యోతిష్యం బహు పురాతనమైన మూఢ నమ్మకం. దీనిలో ఎంత మాత్రం వాస్తవికత లేదు. భవిష్యత్తును తెలుసుకునేందుకు జ్యోతిష్కుల దగ్గరికి వెళ్ళడం ఎంతో వెర్రితనం.

14. వారు కొయ్యకాలువలెనైరి అగ్ని వారిని కాల్చివేయుచున్నది జ్వాలయొక్క బలమునుండి తమ్ముతాము తప్పించుకొన లేక యున్నారు అది కాచుకొనుటకు నిప్పుకాదు ఎదుట కూర్చుండి కాచుకొనదగినది కాదు.

మంత్రగాళ్ళు, జ్యోతిష్కులు బబులోనును రక్షించలేరు సరిగదా తమను తాము కూడా రక్షించుకోలేరు. బబులోను శత్రువుల చేజిక్కిన రాత్రే వీరి అజ్ఞానం, అసమర్థత ఎలాంటివో దానియేలు 5వ అధ్యాయం చూడండి.

15. నీవు ఎవరికొరకు ప్రయాసపడి అలసితివో వారికి ఆలాగే జరుగుచున్నది నీ బాల్యము మొదలుకొని నీతో వ్యాపారము చేయువారు తమ తమ చోట్లకు వెళ్లిపోవుచున్నారు నిన్ను రక్షించువాడొకడైన నుండడు.