1. మరియు ఒకడు తన భార్యను త్యజించగా ఆమె అతనియొద్దనుండి తొలగిపోయి వేరొక పురుషునిదైన తరువాత అతడు ఆమెయొద్దకు తిరిగిచేరునా? ఆలాగు జరుగు దేశము బహుగా అపవిత్రమగును గదా; అయినను నీవు అనేకులైన విటకాండ్రతో వ్యభిచారము చేసినను నాయొద్దకు తిరిగిరమ్మని యెహోవా సెలవిచ్చుచున్నాడు.

“విడాకులు”– యిర్మియా 24:1-4. “అపవిత్రం”– లేవీయకాండము 18:25-28. “వ్యభిచారిణి”– యిర్మియా 2:20. పతితులైన ఈ ప్రజలపట్ల నమ్మశక్యం కాని కృపను, ప్రేమను దేవుడు ప్రదర్శించాడు.

2. చెట్లులేని కొండప్రదేశమువైపు నీ కన్నులెత్తి చూడుము; నీతో ఒకడు శయనింపని స్థలమెక్కడ ఉన్నది? ఎడారి మార్గమున అరబిదేశస్థుడు కాచియుండునట్లుగా నీవు వారికొరకు త్రోవలలో కూర్చుండియున్నావు; నీ వ్యభిచారములచేతను నీ దుష్కార్యములచేతను నీవు దేశమును అపవిత్రపరచుచున్నావు.

3. కావున వానలు కురియక మానెను, కడవరి వర్షము లేకపోయియున్నది, అయినను నీకు వ్యభిచార స్త్రీ ధైర్యమువంటి ధైర్యము గలదు, సిగ్గు పడనొల్లకున్నావు.

దేశంలో అనావృష్ఠి కలిగించడంద్వారా దేవుడు వారిని శిక్షించాడు. అయినా ఆయన ఆశించిన ఫలితాలు వారిలో కనిపించలేదు.

4. అయినను ఇప్పుడు నీవు నా తండ్రీ, చిన్నప్పటినుండి నాకు చెలికాడవు నీవే యని నాకు మొఱ్ఱపెట్టుచుండవా?

వారి ప్రార్థనలు వట్టి మాటలే. వారి హృదయాలు కీడుమీదనే లగ్నమై ఉన్నాయి. దేవుణ్ణి “తండ్రి” అన్నారు గాని తమ తండ్రి సైతాను అన్నట్టుగా వారి ప్రవర్తన ఉంది. (యోహాను 8:41, యోహాను 8:44 చూడండి). అందువల్ల వారి ప్రార్థనలకు జవాబు లేదు (యెషయా 1:15-17; సామెతలు 28:9; యాకోబు 4:3-4).

5. ఆయన నిత్యము కోపించునా? నిరంతరము కోపము చూపునా? అని నీవనుకొనినను నీవు చేయదలచిన దుష్కార్యములు చేయుచునే యున్నావు.

6. మరియు రాజైన యోషీయా దినములలో యెహోవా నాకీలాగు సెలవిచ్చెను ద్రోహినియగు ఇశ్రాయేలు చేయుకార్యము నీవు చూచితివా? ఆమె ఉన్నతమైన ప్రతి కొండమీదికిని పచ్చని ప్రతి చెట్టు క్రిందికిని పోవుచు అక్కడ వ్యభిచారము చేయుచున్నది.

యోషీయారాజు పుట్టకముందు చాలా సంవత్సరాల క్రితమే అంటే సుమారు క్రీ.పూ. 930లో ఇస్రాయేల్ రాజ్యం రెండు రాజ్యాలుగా విడిపోయింది (1 రాజులు 12 అధ్యాయం). ఆరంభంనుంచే ఉత్తర రాజ్యం (ఇస్రాయేల్‌) దేవునినుంచి దూరమైపోయి ఆధ్యాత్మిక విషయాల్లో భ్రష్టత్వాలలో మునిగి పశ్చాత్తాపం పొందడానికే ఇష్టపడలేదు. దేవుడైన యెహోవా దానికి “విడాకులు ఇచ్చేసి” క్రీ.పూ. 721లో దాన్ని చెరలోకి పంపేశాడు. ఈ చరిత్ర అంతా రాజులు, దినవృత్తాంతాలు గ్రంథాల్లో రాసి ఉంది. దక్షిణ రాజ్యం (యూదా) ఇదంతా చూచి కూడా బుద్ధి తెచ్చుకోలేదు.

7. ఆమె యీ క్రియలన్నిటిని చేసినను, ఆమెను నాయొద్దకు తిరిగి రమ్మని నేను సెలవియ్యగా ఆమె తిరిగిరాలేదు. మరియు విశ్వాసఘాతకురాలగు ఆమె సహోదరియైన యూదా దాని చూచెను.

8. ద్రోహినియగు ఇశ్రాయేలు వ్యభిచారముచేసిన హేతువుచేతనే నేను ఆమెను విడిచిపెట్టి ఆమెకు పరిత్యాగపత్రిక ఇయ్యగా, విశ్వాసఘాతకురాలగు ఆమె సహోదరియైన యూదా చూచియు తానును భయపడక వ్యభిచారము చేయుచు వచ్చుచున్నది.

9. రాళ్లతోను మొద్దులతోను వ్యభిచారము చేసెను; ఆమె నిర్భయముగా వ్యభిచారము చేసి దేశమును అపవిత్రపరచెను.

10. ఇంతగా జరిగినను విశ్వాసఘాతకురాలగు ఆమె సహోదరియైన యూదా పైవేషమునకే గాని తన పూర్ణహృదయముతో నాయొద్దకు తిరుగుట లేదని యెహోవా సెలవిచ్చుచున్నాడు.

యోషీయారాజు కాలంలో మత పునరుజ్జీవం ఒకటి బయలుదేరింది. అయితే ప్రజా జీవితంలోకి ఇది తగినంతగా చొచ్చుకుపోలేదు. కపట భక్తి, నటన ఎక్కువగా ఉన్నాయి.

11. కాగా విశ్వాసఘాతకురాలగు యూదాకంటె ద్రోహినియగు ఇశ్రాయేలు తాను నిర్దోషినియని ఋజువుపరచుకొని యున్నది.

ఇస్రాయేల్‌ను దేవుడు శిక్షించిన విషయమంతా యూదాకు తెలుసు. దాన్ని చూచి బుద్ధి తెచ్చుకునే అవకాశం యూదాకు ఉంది. పైగా సత్యాన్ని ఉపదేశించడం యూదాలో ఎక్కువగా జరిగింది. దేవాలయం యూదా ప్రదేశంలోనే ఉంది. ఇస్రాయేల్ కంటే యోగ్యులైన రాజులు యూదాకు ఉన్నారు. కాబట్టి పోలికను బట్టి చూస్తే ఇస్రాయేల్‌కంటే యూదాయే మరింత భ్రష్టస్థితికి దిగజారింది. దేవుని సత్యాన్ని తెలుసుకునేందుకు మంచి అవకాశాలు ఉన్నప్పుడు దాన్ని అనుసరించవలసిన బాధ్యత కూడా అలాంటివారిపై అధికంగా ఉంటుంది.

12. నీవు వెళ్లి ఉత్తరదిక్కున ఈ మాటలు ప్రకటింపుము ద్రోహినివగు ఇశ్రాయేలూ, తిరిగిరమ్ము; ఇదే యెహోవా వాక్కు. మీమీద నా కోపము పడనీయను, నేను కృపగలవాడను గనుక నేనెల్లప్పుడు కోపించువాడను కాను; ఇదే యెహోవా వాక్కు.

“ఉత్తరం”– ఉత్తరాన ఉన్న అష్షూరువారు ఇస్రాయేల్‌ను చెరబట్టుకుపోయారు. దేవుడు తన ప్రజలను కఠినంగా శిక్షించినప్పటికీ వారిని పూర్తిగా, శాశ్వతంగా విడిచిపెట్టలేదు. “కరుణామయుణ్ణి”– నిర్గమకాండము 34:6-7.

13. నీ దేవుడైన యెహోవామీద తిరుగుబాటు చేయుచు, నా మాటను అంగీకరింపక ప్రతి పచ్చని చెట్టు క్రింద అన్యులతో కలిసి కొనుటకు నీవు ఇటు అటుపోయిన నీ దోషము ఒప్పుకొనుము; ఇదే యెహోవా వాక్కు.

వారికి క్షమాపణ కావాలంటే తమ పాపాన్ని అర్థం చేసుకుని ఒప్పుకుని దాన్ని విడిచిపెట్టాలి (సామెతలు 28:13).

14. భ్రష్టులగు పిల్లలారా, తిరిగిరండి, నేను మీ యజమానుడను; ఇదే యెహోవా వాక్కు ఒకానొక పట్టణములోనుండి ఒకనిగాను, ఒకానొక కుటుంబములోనుండి ఇద్దరినిగాను మిమ్మును తీసికొని సీయోనునకు రప్పించెదను.

“యజమానుణ్ణి”– యిర్మియా 2:2. చాలా కొద్దిమంది మాత్రం జెరుసలంకు తిరిగి రాగలుగుతారు.

15. నాకిష్టమైన కాపరులను మీకు నియమింతును, వారు జ్ఞానముతోను వివేకముతోను మిమ్ము నేలుదురు.

అంతకు ముందు ఉన్న తమ కాపరుల్లాగా కాక దేవుని హృదయానుసారంగా ప్రవర్తించే కాపరులు. యిర్మియా 2:8 పోల్చి చూడండి.

16. మీరు ఆ దేశములో అభివృద్ధిపొంది విస్తరించు దినములలో జనులు యెహోవా నిబంధన మందసమని ఇకను చెప్పరు, అది వారి మనస్సులోనికి రాదు, దానిని జ్ఞాపకము చేసికొనరు, అది పోయినందుకు చింతపడరు, ఇకమీదట దాని చేయరాదు; ఇదే యెహోవా వాక్కు.

యెహోవాదేవుడు ఇక్కడ దూర భవిష్యత్తులో ఎప్పుడో రాబోయే ఒక కాలం గురించి మాట్లాడుతున్నాడు. ఆ కాలం ఇంకా రాలేదు. ఎందుకంటే ఇక్కడ కనిపించే భవిష్యద్వాక్కులు కొన్ని ఇంకా నెరవేరవలసి ఉంది. పాత ఒడంబడిక గ్రంథంలో ఒడంబడిక పెట్టెను గురించి ఇది ఆఖరు ప్రస్తావన (నిర్గమకాండము 25:10-16 నోట్‌). “మాట్లాడరు”– ఒడంబడిక పెట్టె క్రీస్తుకు గుర్తు. క్రీస్తు వచ్చినప్పుడు ఈ గుర్తులతో, సంకేతాలతో పని ఉండదు.

17. ఆ కాలమునయెహోవాయొక్క సింహాసనమని యెరూషలేమునకు పేరు పెట్టెదరు; జనములన్నియు తమ దుష్టమనస్సులో పుట్టు మూర్ఖత్వము చొప్పున నడుచుకొనక యెహోవా నామమునుబట్టి యెరూషలేమునకు గుంపులుగా కూడి వచ్చెదరు.

ఇది ఇంకా నెరవేరవలసి ఉంది గదా. ఇస్రాయేల్‌వారు ఈ నాటివరకు తమ చెడు హృదయాల్లో ఉన్న మూర్ఖత్వం ప్రకారమే ప్రవర్తిస్తున్నారు. “అన్ని దేశాలవారు”– కీర్తనల గ్రంథము 102:15; యెషయా 2:2-3; మీకా 4:1.

18. ఆ దినములలో యూదావంశస్థులును ఇశ్రాయేలు వంశస్థులును కలిసి ఉత్తరదేశములోనుండి ప్రయాణమై, మీ పితరులకు నేను స్వాస్థ్యముగా ఇచ్చిన దేశమునకు వచ్చెదరు.

యెషయా 11:12; యిర్మియా 30:3; యెహెఙ్కేలు 37:19-23; హోషేయ 1:11.

19. నేను బిడ్డలలో నిన్నెట్లు ఉంచుకొని, రమ్య దేశమును జనముల స్వాస్థ్యములలో రాజకీయ స్వాస్థ్యమును నేనెట్లు నీకిచ్చెదననుకొని యుంటిని. నీవునా తండ్రీ అని నాకు మొఱ్ఱపెట్టి నన్ను మానవనుకొంటిని గదా?
1 పేతురు 1:17

“కుమారులు”గా ఇస్రాయేల్‌వారు అవిధేయత చూపారు. “భార్య”గా ఆ జాతి దేవునికి నమ్మకంగా లేదు.

20. అయినను స్త్రీ తన పురుషునికి విశ్వాసఘాతకురాలగునట్లుగా ఇశ్రాయేలు వంశస్థులారా, నిశ్చయముగా మీరును నాకు విశ్వాస ఘాతకులైతిరి; ఇదే యెహోవా వాక్కు.

21. ఆలకించుడి, చెట్లులేని మెట్టలమీద ఒక స్వరము వినబడుచున్నది; ఆలకించుడి, తాము దుర్మార్గులై తమ దేవుడైన యెహోవాను మరచినదానిని బట్టి ఇశ్రాయేలీయులు చేయు రోదన విజ్ఞాపనములు వినబడుచున్నవి.

ఇది పశ్చాత్తాపానికి ఆరంభాన్ని సూచిస్తున్నది.

22. భ్రష్టులైన బిడ్డలారా, తిరిగి రండి; మీ అవిశ్వాసమును నేను బాగుచేసెదను; నీవే మాదేవుడవైన యెహోవావు, నీయొద్దకే మేము వచ్చుచున్నాము,

ఆధ్యాత్మిక విషయాలలో దిగజారిపోయినవారికి ఇది అద్భుతమైన వాగ్దానం. వారిని తిరిగి స్వీకరించడమే కాక వారిని బాగుచేస్తానని దేవుడు మాట ఇస్తున్నాడు – ద్వితీయోపదేశకాండము 32:19; కీర్తనల గ్రంథము 41:4; యెషయా 57:18; యిర్మియా 30:17; యిర్మియా 33:6; హోషేయ 6:1; హోషేయ 14:1, హోషేయ 14:4. పాపమనే రోగాన్ని నయం చేయడం అన్ని స్వస్థతల్లోకి గొప్పది. ఈ వచనం మధ్యలోనుంచి 25 వచనం ఆఖరు వరకు ఉన్నమాటలు ఇస్రాయేల్‌వారు భావికాలంలో ఏ విధంగా పశ్చాత్తాపపడి తమ పాపాలు ఒప్పుకొంటారో వెల్లడి చేస్తాయి. యిర్మీయా కాలంలో ఇస్రాయేల్ గాని, యూదా గాని, ఇలాంటి మాటలు పలకలేదు. ఇలాంటి మాటలు యథార్థ మనస్సుతో చెప్పడం దేవుడు బాగుచేస్తానన్న వాగ్దానం నెరవేర్పుకు ఆరంభం. వ 22లోని మాటలు వారు దేవునితో చెప్తారు. వ 24, 25 లోని మాటలు ఒకరితో ఒకరు చెప్పుకొంటారు.

23. నిశ్చయముగా కొండలమీద జరిగినది మోసకరము, పర్వతములమీద చేసిన ఘోష నిష్‌ప్రయోజనము, నిశ్చయముగా మా దేవుడైన యెహోవావలన ఇశ్రాయేలునకు రక్షణ కలుగును.

24. అయినను మా బాల్యమునుండి లజ్జాకరమైన దేవత మా పితరుల కష్టార్జితమును, వారి గొఱ్ఱెలను వారి పశువులను వారి కుమారులను వారి కుమార్తెలను మింగివేయుచున్నది.

విగ్రహారాధన తమకెంత ఘోరమైన అపకారం చేసిందో ఇస్రాయేల్‌వారు ఎట్టకేలకు తెలుసుకొంటారు అందువల్ల తమకు వాటిల్లిన నష్టమెంత గొప్పదో తెలుసుకుంటారు. లేవీయకాండము 26:1; లేవీయకాండము 14:35; ద్వితీయోపదేశకాండము 27:15; ద్వితీయోపదేశకాండము 28:15-68 చూడండి.

25. సిగ్గునొందినవారమై సాగిలపడుదము రండి, మనము కనబడకుండ అవమానము మనలను మరుగుచేయును గాక; మన దేవుడైన యెహోవా మాట వినక మనమును మన పితరులును మన బాల్యమునుండి నేటివరకు మన దేవుడైన యెహోవాకు విరోధముగా పాపము చేసినవారము.

నిజమైన జ్ఞానోదయం, మన హృదయాల్లో దేవుడు జరిగించే పని, మనం ఇలా ఒప్పుకునేలా చేస్తాయి. దేవునితో సఖ్యపడేందుకూ, శాశ్వతజీవం పొందేందుకూ ఇది మార్గం.