1. మెట్టుకు నా సహోదరులారా, ప్రభువునందు ఆనందించుడి. అదేసంగతులను మీకు వ్రాయుట నాకు కష్టమైనది కాదు, మీకు అది క్షేమకరము.

“ఆనందించండి”– ఫిలిప్పీయులకు 1:4; ఫిలిప్పీయులకు 4:4. విశ్వాసులు ఆనందించడం తమ పరిస్థితులను బట్టి, తమ విజయాలను బట్టి కాదు, తమ ఆస్తిపాస్తులను బట్టి, లోక సంబంధమైన ఆశల గురించి కాదు. “ప్రభువులో” ఆనందించాలి. “ఈ సంగతులే”– ఆనందించాలనే ఈ హెచ్చరికనే మళ్ళీ ఇస్తున్నానని పౌలు భావం కావచ్చు. లేక తరువాతి వచనాల్లో దుర్మార్గుల గురించి ఇవ్వబోతున్న హెచ్చరికను గురించి ఇలా రాశాడేమో. ఇంతకుముందు వారితో ఉన్నప్పుడు ఇలాంటి హెచ్చరికలే పౌలు ఇచ్చాడేమో.

2. కుక్కల విషయమై జాగ్రత్తగా ఉండుడి. దుష్టులైన పని వారి విషయమై జాగ్రత్తగా ఉండుడి, ఈ ఛేదన నాచరించు వారి విషయమై జాగ్రత్తగా ఉండుడి.
కీర్తనల గ్రంథము 22:16, కీర్తనల గ్రంథము 22:20

ఇతర సంఘాలకు ఎవరి గురించి రాశాడో అలాంటి మనుషుల గురించే ఇక్కడ రాస్తున్నాడు – 2 కోరింథీయులకు 11:13-15; గలతియులకు 1:7; గలతియులకు 2:4; గలతియులకు 5:12. అపో. కార్యములు 15:1-2, అపో. కార్యములు 15:5 కూడా చూడండి. “కుక్కలు”– యూదులు కుక్కల్ని అశుద్ధ జంతువులుగా ఎంచారు. ఇతర ప్రజల్ని “కుక్కలు” అంటూ ఉండేవారు. క్రీస్తును తిరస్కరించి క్రైస్తవులకు కలవరం కలిగించజూసేవారే నిజంగా అశుద్ధ ప్రాణులు అని పౌలు అంటున్నాడు. “దుష్టులైన”– క్రీస్తు శుభవార్తను చెరిపి క్రైస్తవులను సత్యం నుంచి తిప్పివేయడానికి ప్రయత్నించడం అన్నిటికన్నా దుర్మార్గం. “ఛేదన”– దేవుడు తన ప్రజలకు విధించిన సున్నతి సంస్కారం గురించి మాట్లాడుతున్నాడు – ఆదికాండము 7:10-14. కొందరు యూదులు ఇతర ప్రజల్లోనుంచి క్రైస్తవులైన వారిని కూడా ఈ సంస్కారం పొందాలని బలవంతం చేస్తూ వచ్చారు.

3. ఎందుకనగా శరీరమును ఆస్పదము చేసికొనక దేవునియొక్క ఆత్మవలన ఆరాధించుచు, క్రీస్తుయేసునందు అతిశయపడుచున్న మనమే సున్నతి ఆచరించువారము.

“మనమే”– అంటే యూదులు, ఇతరులు అని తేడా లేకుండా క్రీస్తు విశ్వాసులు అని పౌలు భావం. వారు సున్నతి పొందకపోయినా నిజమైన సున్నతి గలవారు వారే. అంటే సున్నతి అనే పాత సంస్కారం దేన్ని సూచిస్తున్నదో ఆ వాస్తవమైన లక్షణం వారి అంతరంగంలో ఉంది. రోమీయులకు 2:25-29; కొలొస్సయులకు 2:11. ఇప్పుడు పౌలు నిజమైన విశ్వాసులు ఎలాంటివారో చెపుతున్నాడు. “శరీరం మీద నమ్మకం ఏమీలేకుండా”– శరీరానికి జరుపుకునే సంస్కారాలు, మానవ యోగ్యత, మంచి పనులు మొదలైనవి మనుషులు దేవునికి అంగీకారమయ్యేలా చేసి పాపవిముక్తిని, రక్షణను సంపాదించి పెడతాయని అబద్ధ బోధకులు నేర్పించారు. దీన్ని పౌలు పూర్తిగా త్రోసిపుచ్చు తున్నాడు. మానవ స్వభావం ఎలాంటిదో అతనికి తెలుసు – రోమీయులకు 7:18; రోమీయులకు 8:5-8. నిజ క్రైస్తవులు క్రీస్తులోనే తమ నమ్మకం పెట్టుకుంటారు, తమలో గానీ తాము చెయ్యగలిగే వాటిల్లో గానీ ఇతరులు తమకు చెయ్యగలిగే వాటిల్లో గానీ కాదు – గలతియులకు 2:16; గలతియులకు 5:24; ఎఫెసీయులకు 2:8-9. “ఆత్మ ద్వారా...ఆరాధన”– యోహాను 4:23-24. “అతిశయంగా”– 1 కోరింథీయులకు 1:30-31.

4. కావలయునంటే నేను శరీరమును ఆస్పదము చేసికొనవచ్చును; మరి ఎవడైనను శరీరమును ఆస్పదము చేసికొనదలచినయెడల నేను మరి యెక్కువగా చేసికొనవచ్చును.

యూదులైన అబద్ధ బోధకులు తమపైనా, తమ మతాన్ని పాటించడం పైనా నమ్మకం పెట్టుకున్నారు. రోమీయులకు 2:17-20 చూడండి. పౌలు తన గతంలోకి చూచుకుంటూ తాను వారికి ఎందులోనూ తీసిపోలేదని చెపుతున్నాడు. కానీ వారిలాగా కాక తనలో, మతంలో నమ్మకం పెట్టుకోవడం అనేదాన్నంతటినీ నిరాకరించడం అతడు నేర్చుకున్నాడు. యూదుల దృష్టిలో తానొక ఆదర్శవంతుడైన యూదుడుగా ఎలా ఉన్నాడో 7 అంశాల ద్వారా చెపుతున్నాడు.

5. ఎనిమిదవ దినమున సున్నతి పొందితిని, ఇశ్రాయేలు వంశపువాడనై, బెన్యామీను గోత్రములో పుట్టి హెబ్రీయుల సంతానమైన హెబ్రీయుడనై, ధర్మశాస్త్రవిషయము పరిసయ్యుడనై,

“ఎనిమిదో రోజున”– లేవీయకాండము 12:3. “ఇస్రాయేల్”– దేవుడు ఎన్నుకున్న ప్రజ (రోమీయులకు 9:4-5). “హీబ్రూవారి సంతానమైన హీబ్రూవాణ్ణి”– అంటే హీబ్రూ భాష నేర్చుకున్నవాడనీ, ప్రజల పురాతన ధర్మాలను పాటించేవాడనీ అర్థం. “పరిసయ్యుణ్ణి”– యూదుల్లో అతి సనాతన భావాలు గల నిష్ఠగల మత శాఖకు చెందినవాడు పౌలు (పరిసయ్యుల గురించి మత్తయి 3:7 నోట్‌).

6. ఆసక్తివిషయము సంఘమును హింసించువాడనై, ధర్మశాస్త్రమువలని నీతివిషయము అనింద్యుడనై యుంటిని.

“ఆసక్తి”– సత్యమని అతడు అనుకున్నదాని విషయంలో చాలా ఆసక్తిగా ఉండేవాడు. తన మతానికి వ్యతిరేకంగా అనిపించిన ఉపదేశాలంటే అతడికి అసహ్యం (అపో. కార్యములు 8:3; అపో. కార్యములు 9:1-2). ఇందువల్ల యూదుల నాయకులు అతణ్ణి గౌరవంతో చూశారు. “నిందకు చోటివ్వనివాణ్ణి”– అంటే దేవుడు మోషేద్వారా ఇచ్చిన ధర్మశాస్త్రాన్ని ప్రవర్తనలో ఎంతమాత్రం మీరలేదు. దాని ఆచారాలన్నిటినీ పాటించాడు. తన ప్రవర్తనలో తనకు పొరపాటేమీ కనిపించలేదు (ఆ తరువాత దేవుని ఆజ్ఞల్లో ఒకదాన్ని మీరడం ద్వారా లోలోపల తాను దోషినని గ్రహించాడు – రోమీయులకు 7:7-11). స్వంత చర్యల వల్ల విముక్తిని, రక్షణను సంపాదించు కోవడానికీ న్యాయవంతుడుగా ఉండడానికీ దేవునికి అంగీకారం కావడానికీ ఒక యూదుడుగా పౌలు ప్రయత్నించినంత గట్టిగా మరెవరూ ప్రయత్నించలేదని చెప్పవచ్చు. ఇదంతా అతని విషయంలో నిజం అయినా దానంతటివల్ల అతనికి పాపవిముక్తి కలగలేదు. అపో. కార్యములు 10:1-2 నోట్ చూడండి.

7. అయినను ఏవేవి నాకు లాభకరములై యుండెనో వాటిని క్రీస్తు నిమిత్తము నష్టముగా ఎంచుకొంటిని.

ఈ కొత్త మనస్తత్వం, దృక్పథం దమస్కు దారిలో అతనికి కలిగిన అనుభవంతో ఆరంభం అయింది – అపో. కార్యములు 9:3-6. ఏవి నిజమైన విలువ గలవి అన్న జ్ఞానోదయం అతనికి కలిగింది. ఆధ్యాత్మికంగా ఏవి తనకు లాభమనుకున్నాడో నిజానికి అవి నష్టం అని గ్రహించాడు. గర్వం, తనలో నమ్మకం అతణ్ణి క్రీస్తుకు దూరంగా ఉంచాయి. ఇప్పుడు దానంతటినీ విడిచిపెట్టాడు. జన్మ గర్వం, మత గర్వం, తాను సాధించిన వాటిని బట్టి కలిగిన గర్వం మొదలైనవాటిని విసర్జించాడు. అతని ఆధ్యాత్మిక నేత్రాలు తెరుచుకోవడంతో అప్పటి వరకు అతనికి ఇష్టమైనవి పనికిమాలినవిగా, నీచమైనవిగా అనిపించాయి. పౌలు జీవితానికి అప్పటి వరకు “నేను” అనేది కేంద్రం. ఇప్పుడు క్రీస్తు ఆ కేంద్రం అయ్యాడు. నిజంగా జ్ఞానప్రకాశాలు అనుభవించి క్రీస్తును ఎరిగినవారందరి విషయంలోనూ ఇలానే జరుగుతుంది.

8. నిశ్చయముగా నా ప్రభువైన యేసుక్రీస్తునుగూర్చిన అతిశ్రేష్ఠమైన జ్ఞానము నిమిత్తమై సమస్తమును నష్టముగా ఎంచుకొనుచున్నాను.

“తెలుసుకోవడం”– యోహాను 17:3; 2 కోరింథీయులకు 4:6. క్రీస్తును గురించిన సంగతులను తెలుసుకోవడం కంటే మరింత లోతైన అనుభవం గురించి పౌలు మాట్లాడుతున్నాడు. క్రీస్తును వ్యక్తిగతంగా ఎరిగి ఉండడం, ఆయనతో సహవాసం చెయ్యడం అని పౌలు ఉద్దేశం. దీనికోసం మిగతా వాటన్నిటినీ చెత్త కుప్పలో పడేసేందుకు అతడు సిద్ధమయ్యాడు. పౌలు చెత్తగా ఉందని తెలుసుకున్న వాటికోసమే భూమిపై అధిక సంఖ్యాకులు జీవిస్తున్నారు. ఇది ఎంత విచారకరం. “సమస్తాన్నీ”– వ 4-6లో చెప్పినవి మాత్రమే కాదు. అతని దృష్టిలో తనకు చెందినవన్నీ, మతం ఇవ్వగలిగేవన్నీ, లోకంలో ఉన్నవన్నీ నష్టంగా, చెత్తలాగా అయ్యాయి. మత్తయి 10:39; మత్తయి 16:24-26 పోల్చి చూడండి. క్రీస్తును ఎరగడమే మిగతా వాటన్నిటినీ చెత్తలాగా కనిపించేలా చేసే గొప్ప విషయం. “నష్టపోయాను”– లూకా 14:33. ఒక మనిషి అంతా నష్టపోయి క్రీస్తును సంపాదించుకుంటే నష్టపోయిన దానికంటే ఎంతో ఎక్కువే సంపాదించుకున్నట్టు. అలాంటి వ్యక్తికి తన పరిస్థితి గురించి విచారం కలగకూడదు. క్రీస్తులోనే జ్ఞానం, నీతిన్యాయాలు, విమోచన, ఆధ్యాత్మిక పరమ దీవెనలు అన్నీ కూడా ఉన్నాయి – 1 కోరింథీయులకు 1:30; ఎఫెసీయులకు 1:3. నిజమైన క్రైస్తవుడుగా ఉండాలంటే ఒకడు త్యాగం చెయ్యవలసినవి ఏమిటి? తనకున్నదంతా త్యాగం చెయ్యాలి. నిజ క్రైస్తవుడుగా మారడం ద్వారా ఒక వ్యక్తికి కలిగేదేమిటి? దేవునికున్నవన్నీ అతనివి అవుతాయి – 1 కోరింథీయులకు 3:21; 2 కోరింథీయులకు 6:10; 2 కోరింథీయులకు 8:9.

9. క్రీస్తును సంపాదించుకొని, ధర్మశాస్త్ర మూలమైన నా నీతినిగాక, క్రీస్తునందలి విశ్వాసమువలననైన నీతి, అనగా విశ్వాసమునుబట్టి దేవుడు అనుగ్రహించు నీతిగల వాడనై ఆయనయందు అగపడు నిమిత్తమును,

“సొంత నీతిన్యాయాలు”– వ 6; రోమీయులకు 10:3. చాలామంది మనుషులు ప్రయత్నించేది ఇదే. వారికి తెలిసినదంతా ఇదే. అయితే వారు తీర్పు కోసం దేవుని ఎదుట నిలబడేటప్పుడు అది సరిపోదు. లూకా 18:9-14; యెషయా 64:6 పోల్చి చూడండి. “విశ్వాసం ద్వారానే”– రోమీయులకు 3:21-26, రోమీయులకు 3:28; రోమీయులకు 5:1; రోమీయులకు 10:10; 2 కోరింథీయులకు 5:21; గలతియులకు 2:16.

10. ఏ విధముచేతనైనను మృతులలోనుండి నాకు పునరుత్థానము కలుగవలెనని, ఆయన మరణవిషయములో సమానానుభవముగలవాడనై, ఆయనను ఆయన పునరుత్థానబలమును ఎరుగు నిమిత్తమును,

“ఆయన మరణం విషయంలో ఆయనలాగే”– ఫిలిప్పీయులకు 2:8. క్రీస్తు మరణంలో పూర్తిగా వినయం, విధేయత చూపడం, దేవుని సంకల్పానికి తనను పూర్తిగా అప్పగించుకోవడం అనేవి కనిపిస్తున్నాయి. తన జీవితం ఈ విధంగా మరింతగా మారిపోవాలని పౌలు ఉద్దేశం. 2 కోరింథీయులకు 4:10-12; గలతియులకు 2:20. మనకు మనం చనిపోయినవారుగా ఎంచుకుంటే మనలో దేవుని జీవం మన ప్రవర్తనలో బయటపడుతుంది. “సజీవంగా...బలప్రభావాలను”– పౌలుకు ఈ బల ప్రభావాలు కొంత తెలుసు. చాలామందికి తెలిసి ఉన్నదానికన్న ఎక్కువే తెలుసు (కొలస్సయి 1:29). కానీ అది మరింతగా తనకు అనుభవం కావాలని అతని కోరిక. ఎఫెసీయులకు 1:19-20; ఎఫెసీయులకు 3:20; రోమీయులకు 6:4 పోల్చి చూడండి. “ఆయన బాధల సహవాసాన్ని”– ఫిలిప్పీయులకు 1:29; కొలొస్సయులకు 1:24; రోమీయులకు 8:17. పౌలు క్రీస్తు కోసం చాలామంది మనుషులకన్నా ఎక్కువే బాధలు అనుభవించాడు – 2 కోరింథీయులకు 11:23-29. దీన్ని కూడా మరింత అనుభవ పూర్వకంగా తెలుసుకోవాలను కుంటున్నాడు. ఆయన శరీరం అయిన సంఘంలో క్రీస్తు జీవంలో పాలు పొందాలంటే, ఆయన సహవాసాన్ని మరింత సంపూర్ణంగా అనుభవించాలంటే ఆయన బాధల్లో కూడా పాలుపంచుకోవాలని అతనికి తెలుసు. కొందరు అనుకున్నట్టుగా ఇది ఏ విధంగానైనా తప్పించుకోవలసిన సంగతి అనుకోలేదు పౌలు. కొలొస్సయులకు 1:24 చూడండి. తన జీవితంలో ఒకప్పుడు పౌలు క్రీస్తును బాధల పాలు చేశాడు – అపో. కార్యములు 9:4-5. తన ప్రజలు ఈ భూమిపై ఉన్నంత కాలమూ కొనసాగే క్రీస్తు బాధల్లో పాలు పొందాలని ఇప్పుడు కోరుతున్నాడు. క్రీస్తు సజీవంగా లేవడంలోని బల ప్రభావాల్లో పాలు పంచుకోవడమంటే ఆయన బాధల్లో కూడా పాలు పంచుకోవడమే. ఆయన బాధల్లో పాలు పంచుకోవడమంటే ఇప్పుడు ఆయన ఆదరణలోనూ శాంతిలోనూ (2 కోరింథీయులకు 1:5-7; యోహాను 16:33), ఇకపై కలగబోయే ఆయన వారసత్వంలోనూ (రోమీయులకు 8:17) పాలు పొందడమే. “ఆయననూ...తెలుసుకోవాలనీ”– వ 8. రోజురోజుకూ మరింత సన్నిహితంగా క్రీస్తును తెలుసుకోవాలని పౌలు ఆశ. వ్యక్తిగత అనుభవం ద్వారా ఇలా తెలుసుకోవడం గురించి పౌలు మాట్లాడుతున్నాడు. 2 పేతురు 3:18 పోల్చి చూడండి.

11. ఆయన శ్రమలలో పాలివాడనగుట యెట్టిదో యెరుగు నిమిత్తమును, సమస్తమును నష్టపరచుకొని వాటిని పెంటతో సమానముగా ఎంచుకొనుచున్నాను.

“చనిపోయినవారిలో నుంచి సజీవంగా లేవాలని”– మృత దేహాల మధ్యలో నుంచి సజీవంగా లేవాలని అని ఈ గ్రీకు మాటలను తర్జుమా చేయవచ్చు. అంటే కొందరింకా అదే స్థితిలో ఉండగా వారి మధ్య నుంచి కొందరు సజీవంగా లేస్తారనే భావం దీనిలో కనిపిస్తున్నది. అంటే విశ్వాసుల పునర్జీవితం గురించి పౌలు మాట్లాడుతున్నాడు (1 కోరింథీయులకు 15:50-54; 1 థెస్సలొనీకయులకు 4:14-17; ప్రకటన గ్రంథం 20:5). అయితే ఈ పునర్జీవితం మనుషులు తామే సాధించగలిగేదా? తనకు ఇది ఉంటుందో లేదోనని పౌలు సందేహంలో ఉన్నాడా? అలా అనుకోవడానికి కారణం ఏమీ కనిపించడం లేదు – ఫిలిప్పీయులకు 3:21; ఫిలిప్పీయులకు 1:6; రోమీయులకు 5:8-9; రోమీయులకు 8:39; 2 తిమోతికి 4:18. విశ్వాసులు సజీవంగా లేవడం అనేది విశ్వాస జీవితం చివరలో వస్తుందనీ, క్రీస్తును ఎన్నుకోవడం, ఆయనతోనే కొనసాగడం అందుకు అవసరమనీ, ఆయన్ను నమ్మి, చివరి వరకు ఆయన్ను నమ్ముతూ ఉండడం అవసరమనీ పౌలుకు తెలుసు – కొలొస్సయులకు 1:23; హెబ్రీయులకు 3:6, హెబ్రీయులకు 3:14. క్రీస్తును గురించిన జ్ఞానంలో, సహవాసంలో ఎదుగుతూ, ఆయన పోలికలోకి క్రమక్రమంగా మారుతూ ఉండే జీవితంలో ఎప్పుడూ నిలిచి ఉండే విశ్వాసం తప్పకుండా ఉంటుంది. ఇలా విశ్వాసంలో నిలిచి ఉండడం అనేది హీబ్రూ వారికి లేఖలోని ప్రధాన అంశాల్లో ఒకటి.

12. ఇదివరకే నేను గెలిచితినని యైనను, ఇదివరకే సంపూర్ణ సిద్ధి పొందితినని యైనను నేను అనుకొనుటలేదు గాని, నేను దేని నిమిత్తము క్రీస్తు యేసుచేత పట్టబడితినో దానిని పట్టుకొనవలెనని పరుగెత్తు చున్నాను.

క్రీస్తు బలప్రభావాలు, సహవాసం కొంతమట్టుకు అతనికి తెలుసు గాని అనుభవ పూర్వకంగా తెలుసుకునేందుకు అవకాశం ఉన్నదంతా అతనికి ఇంకా తెలియలేదు. “పరిపూర్ణ స్థితి”– దీన్ని సాధించడం అతని గమ్యం గాని ఇంకా సాధించలేదు. పరిపూర్ణత గురించి నోట్స్ మత్తయి 5:48; 2 కోరింథీయులకు 7:1. ఒక రకమైన పరిపూర్ణ స్థితి తమకు కలిగిందని భావించి ఇతర విశ్వాసులను చిన్నచూపు చూస్తూ ఉన్నవారు ఫిలిప్పీలో కొందరు ఉండే ఉంటారు (పౌలు తాను ఎవరిని ఉద్దేశించి లేఖలు రాస్తున్నాడో వారి ఆధ్యాత్మిక స్థితికి సరిపోయే విధంగా రాశాడు). తనకు పరిపూర్ణత కలిగిందని తాను చెప్పుకోవడం లేదు. ఈ సంగతి వారికి తెలియాలని అతని ఉద్దేశం. గొప్ప రాయబారి పౌలుకే పరిపూర్ణత లేనప్పుడు, మనలో లేదనుకోవడానికి సంశయం ఏముంది? “చేజిక్కించుకోవడానికి”– క్రీస్తు తనను రక్షించి పిలిచినప్పుడు తాను ఎలా ఉండాలని ఆయన కోరాడో పూర్తిగా ఆ విధంగా అయిపోవాలని పౌలు ఆశ. ఒక విశ్వాసి ఈ భూమిపై ఎంత పవిత్రంగా, విధేయంగా, అణుకువగా, ఫలభరితంగా ఉండడం సాధ్యమో అంతగా తాను అయిపోగలగాలని కోరాడు. ప్రస్తుతం ఉన్న తన ఆధ్యాత్మిక స్థితితో సంతృప్తి చెంది ఊరుకోలేదు. గతంలో తాను సాధించినవి అతనికి సంతృప్తి కలిగించలేదు. తన జీవితంలో క్రీస్తు ఇంకా ఎక్కువగా ఉండాలని ఆశిస్తున్నాడు.

13. సహోదరులారా, నేనిదివరకే పట్టుకొని యున్నానని తలంచుకొనను. అయితే ఒకటి చేయుచున్నాను; వెనుక ఉన్నవి మరచి ముందున్న వాటికొరకై వేగిరపడుచు

“ఒకటే”– ఆధ్యాత్మిక జీవితం గురించి అతనిలో చపల చిత్తం, రెండు మనసులు లేవు (యాకోబు 1:8 పోల్చి చూడండి). “మరచి”– అంటే పూర్తిగా జ్ఞాపకంలో ఉండకుండా చేసుకోవడం కాదు ఇది. బుద్ధిపూర్వకంగా ఇలా చేసుకోవడం మనకు సాధ్యం కాదు. పౌలు తన గతం మీద తన ఆలోచనలను ఉంచుకోలేదని దీని అర్థం. గతం తనను వశపరచుకోకూడదని అతని ఉద్దేశం. అతనికి గతం కన్న భవిష్యత్తే ముఖ్యం. గతంలోని తన జయాపజయాలను వెనకే విడిచిపెట్టి ముందుకు సాగిపోవాలను కుంటున్నాడు. తన అపజయాలూ తప్పులూ తనను నిరుత్సాహపరచడానికీ, తన విజయాలు తనను సంతృప్తి చెంది ఏమరుపాటుగా ఉండేలా చెయ్యడానికీ అతడు అనుమతించలేదు. “తీవ్ర ప్రయత్నం”– ఒక పందెం గెలవడానికి తన శక్తియుక్తులన్నీ ఉపయోగించే ఒక వ్యక్తి తీవ్ర ప్రయత్నం వంటిది ఇది.

14. క్రీస్తు యేసునందు దేవుని ఉన్నతమైన పిలుపునకు కలుగు బహుమానమును పొందవలెనని, గురి యొద్దకే పరుగెత్తుచున్నాను.

“గురి”– 1 కోరింథీయులకు 9:24-27; అపో. కార్యములు 20:24. ఆ బహుమతి ఏమిటో అతడు చెప్పలేదు. అదేదో ఘనమైనదేననీ విశ్వానికంతటికీ దేవుడైనవాడు చేయగలిగినంత గొప్పదేనని అతనికి తెలుసు. “బహుమతి” గురించి మత్తయి 5:12; మత్తయి 10:41-42; మత్తయి 16:27; 1 కోరింథీయులకు 3:8, 1 కోరింథీయులకు 3:14; హెబ్రీయులకు 10:35; ప్రకటన గ్రంథం 11:18; ప్రకటన గ్రంథం 22:12.

15. కాబట్టి మనలో సంపూర్ణులమైన వారమందరము ఈ తాత్పర్యమే కలిగియుందము. అప్పుడు దేనిగూర్చియైనను మీకు వేరు తాత్పర్యము కలిగియున్నయెడల, అదియు దేవుడు మీకు బయలు పరచును.

“ఎదిగిన”– 1 కోరింథీయులకు 2:6; ఎఫెసీయులకు 4:13-15; కొలొస్సయులకు 1:28; కొలొస్సయులకు 4:12; హెబ్రీయులకు 5:14; హెబ్రీయులకు 6:1. పాపమేమీ లేకుండా ఒక్క తప్పు కూడా చేయకుండా ఉండే పరిపూర్ణ స్థితి తనకున్నదని పౌలు అనలేదు – వ 12. కానీ తానొక పరిపక్వత చెందిన విశ్వాసిననీ, క్రీస్తులో ఆధ్యాత్మికంగా ఎదిగినవాడిననీ అతనికి తెలుసు. వ 12-14లో పరిపూర్ణత గురించి పౌలు వివరించిన సత్యాన్ని విశ్వాసులంతా నమ్మాలి. “దేవుడు...చేస్తాడు”– పై వచనాల్లో పరిపూర్ణత గురించిన తన ఉపదేశం దేవుడే తనకు వెల్లడించినదని అతనికి తెలుసు. దాన్ని అర్థం చేసుకునేలా ఆయన వారి కళ్ళు తెరిపిస్తాడని ప్రార్థిస్తున్నాడు (ఫిలిప్పీయులకు 1:9-10). తన ప్రార్థన దేవుడు వింటున్నాడన్న నమ్మకం కూడా అతనికి ఉంది.

16. అయినను ఇప్పటివరకు మనకు లభించిన దానినిబట్టియే క్రమముగా నడుచుకొందము.

విశ్వాసులు వారికున్న జ్ఞానం మేరకు నడుచుకోవాలి. వారలా చేస్తే దేవుడు వారికి సత్యాన్ని గురించి మరింత గ్రహింపును ఇస్తాడు.

17. సహోదరులారా, మీరు నన్ను పోలి నడుచుకొనుడి; మేము మీకు మాదిరియైయున్న ప్రకారము నడుచుకొను వారిని గురిపెట్టి చూడుడి.

“ఆదర్శం”– అపో. కార్యములు 20:18 నోట్. విశ్వాసులు ఎలా జీవించాలో పౌలు వారికి నేర్పించడమే కాదు, తన జీవితం ద్వారా చూపించాడు కూడా. “గమనించండి”– వ 2; రోమీయులకు 16:17.

18. అనేకులు క్రీస్తు సిలువకు శత్రువులుగా నడుచుకొనుచున్నారు; వీరిని గూర్చి మీతో అనేక పర్యాయములు చెప్పి యిప్పుడును ఏడ్చుచు చెప్పుచున్నాను.

“ఏడుస్తూ”– అపో. కార్యములు 20:31. క్రీస్తును నమ్ముకున్నామని చెప్పుకునే అనేకులు తమ ప్రవర్తన ద్వారా ఆయనకు శత్రువులుగా ఉన్నట్టు బయటపెట్టారు గనుక పౌలు ఏడుస్తున్నాడు. స్థానిక సంఘం ఉన్న చోటెల్లా ఈ విధంగా సిలువకు శత్రువులైనవారు త్వరలో కనిపించినట్టున్నారు – అపో. కార్యములు 20:29-30; రోమీయులకు 16:17; 2 కోరింథీయులకు 11:13-15; గలతియులకు 1:7; గలతియులకు 6:12; కొలొస్సయులకు 2:8, కొలొస్సయులకు 2:16; 2 తిమోతికి 3:1-7; 2 తిమోతికి 4:1-5. వారిలో భక్తి అనిపించేది ఉంది గానీ భక్తి బలప్రభావాలను వారు నిరాకరించారు – 2 తిమోతికి 3:5.

19. నాశనమే వారి అంతము, వారి కడుపే వారి దేవుడు; వారు తాము సిగ్గుపడవలసిన సంగతులయందు అతిశయపడుచున్నారు, భూసంబంధమైనవాటి యందే మనస్సు నుంచుచున్నారు.

“నాశనమే”– మత్తయి 7:13; యోహాను 17:12; రోమీయులకు 9:22; 2 థెస్సలొనీకయులకు 1:9. “కడుపే”– ఈ మాటకు బహుశా శరీర స్వభావం అని, లేదా ఆధ్యాత్మిక జీవితానికి విరుద్ధం అయిన శరీర సంబంధమైన జీవిత విధానమంతా అని అర్థం కావచ్చు. కొందరు ఈ “దేవుణ్ణి” పూజిస్తారు, దానికి లోబడతారు. దానికోసం అబద్ధాలు, మోసం, దొంగతనానికి కూడా ఒడిగడతారు. తాము క్రీస్తును అనుసరించేవారమని చెప్పుకుంటారు గానీ తమ స్వంత కోరికలను అనుసరిస్తూ ఉంటారు – రోమీయులకు 16:18; 1 తిమోతికి 6:5; 2 పేతురు 2:3. తమ కడుపు నిండడమే వారికి కావలసింది, తమ అంతరంగం పవిత్రాత్మతో నిండి ఉండడం కాదు. “సిగ్గు”– వారి భయంకరమైన ఆధ్యాత్మిక అజ్ఞానంలో తాము సిగ్గుపడవలసిన వాటి గురించి గొప్పలు చెప్పుకుంటారు. 1 కోరింథీయులకు 5:1-2, 1 కోరింథీయులకు 5:6; 2 పేతురు 2:18; యూదా 1:16; కీర్తనల గ్రంథము 10:3; కీర్తనల గ్రంథము 52:1 పోల్చి చూడండి. వారికున్న ఘనత అంతా పౌలు ఎరిగినట్టు చెత్తకుప్పతో, మురికితో సమానం. “లౌకిక విషయాలు”– రోమీయులకు 8:5-8. ఆధ్యాత్మిక విషయాల గురించి వారెంతగా మాట్లాడినప్పటికీ కూడా వారి ఆశలు వాటిపై లేవు. గతించిపోతున్న లౌకిక విషయాలమీదే ఉన్నాయి (1 యోహాను 2:16). డబ్బు, ఆస్తి, ప్రతిష్ఠ, పేరు ప్రఖ్యాతులు, శరీరాశలను తృప్తిపరచుకోవడం – వీటిమీదే వారికి అభిలాష, ప్రీతి నాశనానికి విశాల మార్గం ఇదే (మత్తయి 7:13).

20. మన పౌరస్థితి పరలోకమునందున్నది; అక్కడనుండి ప్రభువైన యేసుక్రీస్తు అను రక్షకుని నిమిత్తము కనిపెట్టుకొనియున్నాము.

విశ్వాసులు ఈ లోకంలో ఉన్నారు గానీ ఈ లోకానికి చెందినవారు కారు – యోహాను 17:6, యోహాను 17:11, యోహాను 17:14-15. వారి నగరం, వారి దేశం పరలోకంలోనే ఉన్నాయి – హెబ్రీయులకు 11:10, హెబ్రీయులకు 11:16; హెబ్రీయులకు 13:14; గలతియులకు 4:26. వారు దానికి చెందినవారే. వారి ఆశలు, కోరికలన్నీ దానిమీదే లగ్నమై ఉన్నాయి. దేవుడే వారి రాజు. వారి రక్షకుని రెండో రాకడ కోసం వారు ఎదురు చూస్తుంటారు – అపో. కార్యములు 1:11; 1 థెస్సలొనీకయులకు 4:14-18; హెబ్రీయులకు 9:28.

21. సమస్తమును తనకు లోపరచుకొనజాలిన శక్తినిబట్టి ఆయన మన దీనశరీరమును తన మహిమగల శరీరమునకు సమ రూపము గలదానిగా మార్చును.

“వశం చేసుకోగల”– 1 కోరింథీయులకు 15:24-25; హెబ్రీయులకు 2:8; ఎఫెసీయులకు 1:19. “తన దివ్య శరీరాన్ని”– 1 కోరింథీయులకు 15:42-44, 1 కోరింథీయులకు 15:49; 1 యోహాను 3:2; రోమీయులకు 8:23-25. “మార్చివేస్తాడు”– 1 కోరింథీయులకు 15:50-53.