1. ఎవడైనను అధ్యక్షపదవిని ఆశించినయెడల అట్టివాడు దొడ్డపనిని అపేక్షించుచున్నాడను మాట నమ్మదగినది.

“నాయకుడు”– “ఎపిస్కోపాస్” అనే గ్రీకు పదానికి తర్జుమాగా వాడిన ఈ పదాన్ని కొత్త ఒడంబడిక గ్రంథంలో కేవలం అయిదు సార్లు మాత్రమే ఉపయోగించారు (అపో. కార్యములు 20:28; ఫిలిప్పీయులకు 1:1; 1 తిమోతికి 3:2; తీతుకు 1:7; 1 పేతురు 2:25). గ్రీకులో ఇది రెండు పదాల కలయిక. దీని అర్థం “విషయాలు చూచుకొనేవాడు”, లేదా “కావలి కాసేవాడు”. ఈ పదాన్ని ఆయా సంఘాల్లో ఉన్న పెద్దలకోసం వాడారు (అపో. కార్యములు 20:17 తో; 1 తిమోతికి 20:18; ఫిలిప్పీయులకు 1:1 పోల్చి చూడండి). నాయకుడి పని “శ్రేష్ఠమైనది”. ప్రపంచంలో ఉన్న అతి శ్రేష్ఠమైన పనుల్లోకెల్లా ఇది ఒకటి. ఈ పనిని బాగా జరిగించేవారికి గొప్ప బహుమానం కలుగుతుంది – 1 పేతురు 5:1-4. నాయకుని పని చాలా విలువైనది కాబట్టి నాయకునికి ఉండవలసిన యోగ్యతలు కూడా చాలా ఉన్నతమైనవి. ఈ యోగ్యతలను దృష్టిలో పెట్టుకోకుండా ఇతర వాటిని బట్టి సంఘ నాయకులను ఎన్నుకున్న సంఘం దాని జీవితంలోని ఒక ముఖ్య విషయంలో తప్పిపోతున్నది. ఇక్కడ రాసివున్న యోగ్యతలను తీతుకు 1:6-9 లో యోగ్యతలతో పోల్చి చూడండి.

2. అధ్యక్షుడగువాడు నిందారహితుడును, ఏకపత్నీ పురుషుడును, మితానుభవుడును, స్వస్థబుద్ధిగలవాడును, మర్యాదస్థుడును, అతిథిప్రియుడును, బోధింపతగినవాడునై యుండి,

“నిందకు చోటివ్వనివాడు”– సంఘం ఎవరినైనా నాయకునిగా ఎన్నుకోవాలంటే ఆ వ్యక్తి పవిత్రమైన రీతిలో, నిజాయితీగా నీతిగా జీవిస్తున్నవాడై, ఎవరూ కూడా నింద మోపలేనివాడై ఉండాలి. “ఏకపత్నీ పురుషుడు”– ఆ రోజుల్లో ఒకరి కంటే ఎక్కువ భార్యలుండడం సామాన్యమైన విషయం. చాలామంది ఒకరి కంటే ఎక్కువ భార్యలున్నవారు కూడా క్రైస్తవులయి ఉండి ఉంటారు. ఇలాంటివారు నాయకులు కాకూడదు. నాయకుడు సంఘం అంతటికీ మాదిరిగా ఉంటూ దేవుడు తన బిడ్డలు ఏ విధంగా ఉండాలని కోరుకుంటాడో ఆ విధంగా ఉండాలి (1 పేతురు 5:3). పురుషుడికి ఒకే భార్య ఉండాలనేది మొదటనుంచీ మనుషుల విషయంలో దేవుని ఉద్దేశం – ఆదికాండము 3:22-24; మత్తయి 19:3-9. పెండ్లి కానివారు సంఘానికి నాయకులుగా ఉండకూడదని పౌలు అంటున్నాడని కొందరు అనుకుంటారు. కానీ పౌలు పెళ్ళి చేసుకోలేదు (2 కోరింథీయులకు 7:8). అయినా సంఘ నాయకుని పదవికంటే అతనిది ఎక్కువయినదే (1 కోరింథీయులకు 12:28). 1 కోరింథీయులకు 7:1, 1 కోరింథీయులకు 7:8, 1 కోరింథీయులకు 7:26-27, 1 కోరింథీయులకు 7:32-34 రాసిన వ్యక్తే పెండ్లి కానివారు సంఘ నాయకులు కాకూడదని చెపుతాడా? “ఉపదేశించడానికి సమర్థుడు”– దేవుని వాక్కు ఉపదేశించడానికి నాయకులకు దేవుని వాక్కు తెలిసి ఉండాలి. తమకు తెలియని విషయాలను వారు ఎలా ఉపదేశించగలరు? దేవుడిచ్చే ఉపదేశ జ్ఞానం వారిలో కొద్దిగా అయినా ఉండాలి.

3. మద్యపానియు కొట్టువాడునుకాక, సాత్వి కుడును, జగడమాడనివాడును, ధనాపేక్షలేనివాడునై,

“త్రాగుబోతూ”– 1 తిమోతికి 5:23. “ధనాపేక్ష గలవాడు”– 1 తిమోతికి 6:6-10; మత్తయి 6:24; లూకా 16:13-14.

4. సంపూర్ణ మాన్యత కలిగి తన పిల్లలను స్వాధీనపరచుకొనుచు, తన యింటివారిని బాగుగా ఏలువాడునై యుండవలెను.

“తన సంతానం”– ఒక మనిషి పెళ్ళయినవాడైనా అతనికి సంతానం లేకపోతే అతడు సంఘ నాయకుడు కాకూడదని దీని అర్థమా? కాదు. పౌలు ఉద్దేశం ఏమిటంటే వారికి పిల్లలు ఉంటే వారిని అదుపులో పెట్టే శక్తి కూడా వారికి ఉండాలని. వ 2లో పౌలు భార్యల గురించి చెప్పిన మాటతో దీన్ని పోల్చి చూడండి. సంఘ నాయకుడికి సంతానం తప్పక ఉండాలని పౌలు ఉద్దేశం కాకపోతే సంఘ నాయకుడు తప్పక పెండ్లి అయినవాడై ఉండాలని కూడా అతని ఉద్దేశం కాదు.

5. ఎవడైనను తన యింటివారిని ఏలనేరక పోయినయెడల అతడు దేవుని సంఘమును ఏలాగు పాలించును?

ఈ వచనాన్ని బట్టి చూస్తే ప్రస్తుత సంఘాల్లో ఉన్న చాలామంది నాయకులు ఆ పదవికి యోగ్యులు కారు.

6. అతడు గర్వాంధుడై అపవాదికి కలిగిన శిక్షావిధికి లోబడకుండునట్లు క్రొత్తగా చేరినవాడై యుండకూడదు.

“కొత్తగా చేరినవాడు”– అధికారంతో కూడిన పదవులలో ఒక విశ్వాసిని నియమించడం జరిగే ముందు అతడు దేవుని వాక్కుద్వారా ఆధ్యాత్మికంగా అభివృద్ధి పొంది సత్యంలో స్థిరపడి ఉండాలి. ఆధ్యాత్మికంగా ఇంకా ఎదగనివారు సంఘంలో నాయకులైతే వారు గర్వంతో మిడిసిపడే అవకాశం ఉంటుంది. “అపనింద పిశాచం తీర్పు”– దీనినే “అపనింద పిశాచం శిక్ష” అని కూడా అనువదించవచ్చు. దీని అర్థం ఇది కావచ్చు – సైతాను విశ్వాసుల మీద ఎప్పుడూ నేరాలు మోపుతున్నాడు (ప్రకటన గ్రంథం 12:10). సంఘ నాయకునిలో అహంభావం, గర్వం వాడికి కనబడ్డాయీ అంటే దానిమూలంగా వాడు దేవుని ఎదుట అతణ్ణి దూషించే అవకాశం ఉంటుంది. అపనింద పిశాచం గురించి నోట్స్ మత్తయి 4:1

7. మరియు అతడు నిందపాలై అపవాది ఉరిలో పడిపోకుండునట్లు సంఘమునకు వెలుపటివారిచేత మంచి సాక్ష్యము పొందిన వాడైయుండవలెను.

“అపనింద పిశాచం ఉరిలో”– లూకా 22:31-32; కీర్తనల గ్రంథము 91:3; కీర్తనల గ్రంథము 124:7; 2 తిమోతికి 2:26 పోల్చి చూడండి. “బయట ఉన్నవారు”– కొలొస్సయులకు 4:5; 1 థెస్సలొనీకయులకు 4:12; 1 కోరింథీయులకు 10:32; 1 పేతురు 2:12; మత్తయి 5:16. బయటివారిలో మోసగాడూ నీతి నియమాలు లేనివాడూ అని పేరు మోసినవాణ్ణి తీసుకువచ్చి సంఘం తనకు ఒక నాయకునిగా ఎన్నుకుంటే బయటివారు అతణ్ణి సంఘాన్ని కూడా దూషించవచ్చు. అంతేగాక దీనివల్ల బయటివారు క్రీస్తుమీద విశ్వాసం ఉంచి సంఘంలో చేరే అవకాశాలు తగ్గిపోతాయి.

8. ఆలాగుననే పరిచారకులు మాన్యులై యుండి, ద్విమనస్కులును, మిగుల మద్యపానాసక్తులును, దుర్లాభము నపేక్షించు వారునై యుండక

“పరిచారకులు”– గ్రీకు భాషలో దీని అర్థం “సేవ చేయడం”. ఆది క్రైస్తవ సంఘాల్లో పెద్దలూ (నాయకులూ), పరిచారకులూ ఇద్దరూ ఉన్నారు – ఫిలిప్పీయులకు 1:1. పెద్దలు (నాయకులు) సంఘాన్ని కాపాడుతూ, దేవుని వాక్కు ఉపదేశించగలిగినవారై ఉండి (వ 2) సంఘ ఆధ్యాత్మిక అవసరాలను తీరుస్తూ ఉండేవారు. పరిచారకులు ఇతర సేవలు చేసేవారు. అపో. కార్యములు 6:1-6 పోల్చి చూడండి. “గౌరవానికి”– గౌరవానికి తగనివారు సంఘంలో ఎలాంటి పదవికైనా తగరు. “అక్రమ లాభం”– 1 తిమోతికి 6:5; యోహాను 12:6 పోల్చి చూడండి. పరిచారకుణ్ణి సంఘ కోశాధికారిగా నియమించడం జరగవచ్చు. అతడు మోసగాడైతే సంఘానికి ఎంతో నష్టం జరుగుతుంది.

9. విశ్వాస మర్మమును పవిత్రమైన మనస్సాక్షితో గైకొనువారై యుండవలెను.

“స్వచ్ఛమైన అంతర్వాణి”– 1 తిమోతికి 1:5, 1 తిమోతికి 1:19. పరిచారకులు ఉపదేశించలేకపోవచ్చు కానీ వారు క్రైస్తవ విశ్వాసంలోని సత్యాలను లోతుగా తెలుసుకొని హృదయపూర్వకంగా నమ్మాలి.

10. మరియు వారు మొదట పరీక్షింపబడవలెను; తరువాత వారు అనింద్యులైతే పరిచారకులుగా ఉండవచ్చును.

“పరీక్షించాలి”– సంఘంలో ఎవరికైనా ఏ బాధ్యతనైనా అప్పగించేముందు ఆ బాధ్యత నిర్వహించడానికి ఆ వ్యక్తికి సరైన అర్హతలున్నాయా? లేదా? అని ఆలోచించాలి. ఆ పనికి తగనివాణ్ణి, ఈ అధ్యాయంలో దేవుడు వెల్లడి చేసిన సంగతులకు అనుగుణంగా గాక వేరే కారణాలను బట్టి ఎవర్నైనా నియమిస్తే సంఘం కష్టాలను ఎదుర్కోవలసి వస్తుంది.

11. అటువలె పరిచర్యచేయు స్త్రీలును మాన్యులై కొండెములు చెప్పనివారును, మితాను భవముగలవారును, అన్ని విషయములలో నమ్మకమైనవారునై యుండవలెను.

పరిచారకులను పెండ్లి చేసుకొన్న స్త్రీలు, లేదా సంఘంలో ఏదో విధమైన సేవ చేసే స్త్రీలు (రోమీయులకు 16:1) కూడా ప్రజలలో మంచి పేరుగలవారై ఉండాలి.

12. పరిచారకులు ఏకపత్నీ పురుషులును, తమ పిల్లలను తమ యింటివారిని బాగుగా ఏలువారునై యుండవలెను.

వ 2,4.

13. పరిచారకులైయుండి ఆ పనిని బాగుగా నెరవేర్చినవారు మంచి పదవిని సంపాదించుకొని క్రీస్తుయేసునందలి విశ్వాసమందు బహు ధైర్యము గలవారగుదురు.

క్రీస్తును నమ్మకంతో సేవించడం, ఆ సేవకు కావలసిన బలాన్ని ఆయననుంచి స్వీకరించడం, ఆయన పనులలో నిమగ్నులమై ఉండడం ద్వారా మరింత నిశ్చయతతో కూడిన బలమైన విశ్వాసం కలుగుతుంది. హెబ్రీయులకు 6:10-11 పోల్చి చూడండి.

14. శీఘ్రముగా నీయొద్దకు వత్తునని నిరీక్షించుచున్నాను;

“దేవుని గృహంలో”– ఎఫెసీయులకు 2:19; హెబ్రీయులకు 3:6. క్రీస్తు తన విశ్వాసులతో కట్టిన సంఘం దేవుని కుటుంబం. ఎఫెసీయులకు 3:14-15; మత్తయి 12:46-50; హెబ్రీయులకు 2:11 పోల్చి చూడండి. అన్ని ఇతర కుటుంబాలలో లాగే దేవుని కుటుంబంలోని సభ్యులు తాము ఏ విధంగా ప్రవర్తించాలో నేర్చుకోవాలి.

15. అయినను నేను ఆలస్యము చేసినయెడల దేవుని మందిరములో, అనగా జీవముగల దేవుని సంఘములో, జనులేలాగు ప్రవర్తింపవలెనో అది నీకు తెలియవలెనని యీ సంగతులను నీకు వ్రాయుచున్నాను. ఆ సంఘము సత్యమునకు స్తంభమును ఆధారమునై యున్నది. ¸

“సత్యానికి స్తంభం, బురుజు”– ఇక్కడ పౌలు ఏ స్థానిక సంఘాన్ని గురించీ మాట్లాడడం లేదు. వాటిలో కొన్ని స్తంభాలలాగా బురుజులలాగా ఉన్నది సత్యానికి కాదు. తప్పుడు ఉపదేశానికే. ఇక్కడ పౌలు సంఘాల సంస్థల గురించి మాట్లాడ్డం లేదు. ఇక్కడ పౌలు ఉద్దేశంలో సంఘం అంటే క్రీస్తు శరీరం, దేవుని ఆలయం. దానికి క్రీస్తే శిరస్సు, పునాది, మూలరాయి (ఎఫెసీయులకు 1:22-23; ఎఫెసీయులకు 2:20-22; 1 కోరింథీయులకు 3:11; కొలొస్సయులకు 1:18). క్రీస్తు తనకోసం కట్టుకుంటున్న సంఘమన్నమాట (మత్తయి 16:18). క్రీస్తులో విశ్వాసంద్వారా దేవుని ఆత్మవల్ల ఆధ్యాత్మిక జన్మ పొందినవారే ఈ సంఘంలో ఉన్నారు (యోహాను 1:12-13; యోహాను 3:3-8; 1 కోరింథీయులకు 12:12-13). దేవుని సత్యం అనే పునాది మీద కట్టబడినది ఈ సంఘం ఒకటే, ఇది ఈ లోకంలో దేవుని చేతుల్లో ఆయన సత్యాన్ని (ఆయన వాక్కును) వహించే పునాదిలాగా మారుతుంది. ఈ సంఘానికి క్రీస్తే శిరస్సు, క్రీస్తే పునాది కాబట్టే ఇది సత్యానికి పునాది కాగలదు.

16. నిరాక్షేపముగా దైవభక్తిని గూర్చిన మర్మము గొప్పదైయున్నది;ఆయన సశరీరుడుగా ప్రత్యక్షుడయ్యెను. ఆత్మవిషయమున నీతిపరుడని తీర్పునొందెను దేవదూతలకు కనబడెను రక్షకుడని జనములలో ప్రకటింపబడెను లోకమందు నమ్మబడెను ఆరోహణుడై తేజోమయుడయ్యెను.

“దైవభక్తి”– దేవునికీ “సజీవుడైన దేవుని సంఘానికీ” సంబంధించిన బ్రతుకు తీరు గురించి పౌలు మాట్లాడుతున్నాడు. “రహస్య సత్యం”– రోమీయులకు 16:25-26; ఎఫెసీయులకు 3:2-6; ఎఫెసీయులకు 5:32; కొలొస్సయులకు 1:26-27. కొత్త ఒడంబడిక గ్రంథంలో దీని అర్థమేమంటే దేవుడు విశదపరిస్తే గానీ మనుషులకు తెలియని సత్యం. “శరీరం”– హెబ్రీయులకు 2:14; హెబ్రీయులకు 10:5. “దేవుడు శరీరంతో వెల్లడి”– ఇది కొత్త ఒడంబడిక గ్రంథమంతటితో ఏకీభవిస్తుంది (ఫిలిప్పీయులకు 2:6; లూకా 2:11 నోట్స్‌లో రిఫరెన్సులు చూడండి). “ఆత్మ”– మత్తయి 3:16; మత్తయి 12:28; యోహాను 1:32-34; రోమీయులకు 1:4. క్రీస్తు జీవితంలోనూ పునర్జీవితంలోనూ ఆయన పవిత్రుడనీ మచ్చలేని దేవుని కుమారుడనీ దేవుని ఆత్మ వెల్లడి చేశాడు. “నమ్మడం”– అపో. కార్యములు 4:4; అపో. కార్యములు 5:14; అపో. కార్యములు 9:42; అపో. కార్యములు 11:21; అపో. కార్యములు 14:1; అపో. కార్యములు 17:12; అపో. కార్యములు 18:8; అపో. కార్యములు 19:18; అపో. కార్యములు 21:20. “మహిమతో”– లూకా 24:51; అపో. కార్యములు 1:9; ఎఫెసీయులకు 1:20-21.