1. శపితమైన దాని విషయములో ఇశ్రాయేలీయులు తిరుగుబాటుచేసిరి. ఎట్లనగా యూదాగోత్రములో జెరహు మునిమనుమడును జబ్ది మనుమడును కర్మీ కుమా రుడునైన ఆకాను శపితము చేయబడినదానిలో కొంత తీసికొనెను గనుక యెహోవా ఇశ్రాయేలీయులమీద కోపించెను.

“అపరాధం చేశారు”– ఒకేవ్యక్తి పాపం చేశాడు. అయితే దేవుడు ఆ జాతినంతటికి దోషమున్నట్లు ఎంచాడు. దేవుడు తన ప్రజలనందరినీ ఒకటిగా పరిగణిస్తాడు. ఒక్క వ్యక్తి పాపం అందరిపైనా ప్రభావం చూపుతుంది. అందరూ దాని విషయం బాధ్యులే (వ 11,20,22; లేవీయకాండము 4:13-21 2 సమూయేలు 21:1-2). వారిలో ఏ ఒక్క వ్యక్తీ తనకు తానుగా జీవించడం సాధ్యం కాదు. మన చర్యలు ఎప్పుడూ ఇతరులపై మంచి, లేదా చెడు ప్రభావాన్ని చూపుతాయి (రోమీయులకు 14:7 రోమీయులకు 14:13 1 కోరింథీయులకు 5:1-2 1 కోరింథీయులకు 5:6 1 కోరింథీయులకు 12:26-27). “కోపాగ్ని”– సంఖ్యాకాండము 25:3 కీర్తనల గ్రంథము 90:11 రోమీయులకు 1:18 నోట్స్.

2. యెహోషువ మీరు వెళ్లి దేశమును వేగు చూడుడని చెప్పి బేతేలు తూర్పుదిక్కున బేతావెను దగ్గరనున్న హాయి అను పురమునకు యెరికోనుండి వేగుల వారిని పంపగా వారు వెళ్లి

ఆకాను పాపం ఫలితంగా ఆ జాతి అంతటికీ అవమానకరమైన అపజయం కలిగింది. “హాయీ”– యెరికోకు 25 కిలోమీటర్ల దూరాన యొర్దానులోయ కెదురుగా ఉన్న కొండలపైన ఉన్న ఊరు.

3. హాయి పురమును వేగుచూచి యెహోషువ యొద్దకు తిరిగి వచ్చిజనులందరిని వెళ్లనీయ కుము, రెండు మూడు వేలమంది వెళ్లి హాయిని పట్టుకొన వచ్చును, జనులందరు ప్రయాసపడి అక్కడికి వెళ్లనేల? హాయి వారు కొద్దిగానున్నారు గదా అనిరి.

వీరి ఆత్మవిశ్వాసం కాస్త మోతాదు మించిందా? ఈ విషయం యెహోషువ యెహోవా దగ్గర విచారణ చేశాడా? యెహోషువ 8:1 యెహోషువ 8:3 చూడండి.

4. కాబట్టి జనులలో ఇంచుమించు మూడు వేలమంది అక్కడికి వెళ్లిరిగాని వారు హాయివారి యెదుట నిలువలేక పారిపోయిరి.

5. అప్పుడు హాయివారు వారిలో ముప్పది ఆరుగురు మనుష్యులను హతము చేసిరి. మరియు తమగవినియొద్ద నుండి షేబారీమువరకు వారిని తరిమి మోరాదులో వారిని హతము చేసిరి. కాబట్టి జనుల గుండెలు కరిగి నీరైపోయెను.

6. యెహోషువ తన బట్టలు చింపుకొని, తానును ఇశ్రాయేలీయుల పెద్దలును సాయంకాలమువరకు యెహోవా మందసము నెదుట నేలమీద ముఖములు మోపుకొని తమ తలలమీద ధూళి పోసికొనుచు

బట్టలు చింపుకోవడం, తలలు నేలకు ఆనేలా సాష్టాంగ పడడం, దుమ్మెత్తి పోసుకోవడం – ఇవన్నీ నివ్వెరపాటు, దుఃఖం, నిరుత్సాహాలకు సూచనలు.

7. అయ్యో, ప్రభువా యెహోవా, మమ్మును నశింపజేయునట్లు అమోరీయుల చేతికి మమ్మును అప్పగించుటకు ఈ జనులను ఈ యొర్దాను నీ వెందుకు దాటించితివి? మేము యొర్దాను అవతల నివసించుట మేలు.

నిర్గమకాండము 5:22 నిర్గమకాండము 14:11-12 నిర్గమకాండము 16:3 నిర్గమకాండము 17:3 పోల్చి చూడండి. ఈ మాటల్లో నమ్మకం, విధేయత ధ్వనించడం లేదు. కలవరం, తత్తరపాటు ఉన్నాయి. ఇస్రాయేల్ ఓటమికి కారణా లేమిటో తెలుసుకోవలసినది పోయి యెహోషువ దేవుడు తమను నడిపించిన విధానాన్ని ప్రశ్నిస్తున్నాడు.

8. ప్రభువా కనికరించుము; ఇశ్రాయేలీయులు తమ శత్రువుల యెదుట నిలువలేక వెనుకకు తిరిగి నందుకు నేనేమి చెప్పగలను?

9. కనానీయులును ఈ దేశ నివాసులందరును విని, మమ్మును చుట్టుకొని మా పేరు భూమిమీద ఉండకుండ తుడిచివేసిన యెడల, ఘనమైన నీ నామమునుగూర్చి నీవేమి చేయుదువని ప్రార్థింపగా

“పేరు”– సంఖ్యాకాండము 14:13-16 ద్వితీయోపదేశకాండము 9:28-29. మనం ఎప్పుడూ దేవుని నామానికి నింద వస్తుందేమోనని జాగ్రత్తగా ఉండాలే గాని మనకేమవుతుందో అని చింతించ కూడదు.

10. యెహోవా యెహోషువతో ఇట్లనెనులెమ్ము, నీ వేల యిక్కడ ముఖము నేల మోపికొందువు?

దేవుడు యెహోషువను అతని తలంపుల తీరును బట్టి గద్దిస్తూ ఉన్నాడు. అది ప్రార్థన సమయం కాదు, విధేయత చూపవలసిన సమయం (నిర్గమకాండము 14:15). పాపానికి శిక్ష పడాలి. గుర్తుంచుకోండి – విధేయత చూపడానికి బదులుగా ప్రార్థన చేస్తే చెల్లదు.

11. ఇశ్రాయేలీయులు పాపము చేసియున్నారు. నేను వారితో చేసిన నిబంధనను వారు మీరియున్నారు. శపితమైన దాని కొంత తీసికొని, దొంగిలి బొంకి తమ సామానులో దాని ఉంచుకొని యున్నారు.

పాపం చేసినది ఒకడే – ఆకాను. అయితే దేవుని మాటలు చూడండి – “ఇస్రాయేల్‌ప్రజ పాపం చేశారు”. “ఒడంబడిక”– యెహోషువ 6:17-19. (నిర్గమకాండము 20:15 నిర్గమకాండము 20:17 కూడా చూడండి). “వస్తువులు”– ఆకాను దేవుని దగ్గర దొంగిలించాడన్న మాట. “కపటంగా ప్రవర్తించి”– ఇతర పాపాలను కప్పిపుచ్చు కునేందుకు మోసం అనే పాపం మనుషులు చేస్తారు. ప్రజలు చేస్తున్నదేమిటో దేవునికి తెలుసు అన్న విషయాన్ని కూడా గమనించండి (హెబ్రీయులకు 4:13). ఆకాను మనుషులకు కనపడకుండా అంతా దాచిపెట్టగలిగాడు గాని దేవునికి కనిపించ కుండా దాచలేకపోయాడు. ఇక్కడ రెండు ముఖ్యమైన గుణపాఠాలున్నాయి. పాపాన్ని గుర్తించి దాన్ని విడిచిపెట్టలేకపోతే అది మన హానికి దారి తీస్తుంది. అంటే దానిని బట్టి దేవుడు మనల్ని శిక్షకు వదిలిపెట్టవచ్చు. రెండోది, దేవుడు మనలో పని చేసేందుకు పాపం అడ్డు వస్తుంది.

12. కాబట్టి ఇశ్రాయేలీయులు శాపగ్రస్తులై తమ శత్రువుల యెదుట నిలువలేక తమ శత్రువుల యెదుట వెనుకకు తిరిగిరి. శాపగ్రస్తులైనవారు మీ మధ్యనుండకుండ మీరు వారిని నిర్మూలము చేసితేనే తప్ప నేను మీకు తోడైయుండను.

13. నీవు లేచి జనులను పరిశుద్ధపఱచి వారితో ఈలాగు చెప్పుము రేపటికి మిమ్మును మీరు పరిశుద్ధపరచుకొనుడి; ఇశ్రాయేలీయుల దేవుడైన యెహోవా సెలవిచ్చినదేమనగా ఇశ్రాయేలీయులారా, మీ మధ్య శాపగ్రస్తమైన దొకటి కలదు; మీరు దానిని మీ మధ్య నుండకుండ నిర్మూలము చేయువరకు మీ శత్రువుల యెదుట మీరు నిలువలేరు.

పాపాన్ని ఒప్పుకోకుండా విసర్జించకుండా మన జీవితాల్లో, సంఘాల్లో అలానే ఉండిపోనిచ్చామంటే సైతానుతో విజయవంతంగా పోరాడలేము, క్రీస్తులో మన వారసత్వాన్ని సరిగా అనుభవించలేము.

14. ఉదయమున మీ గోత్రముల వరుసనుబట్టి మీరు రప్పింపబడుదురు; అప్పుడు యెహోవా ఏ గోత్రమును సూచించునో అది వంశముల వరుస ప్రకారము దగ్గరకు రావలెను; యెహోవా సూచించు వంశము కుటుంబములప్రకారము దగ్గరకు రావలెను; యెహోవా సూచించు కుటుంబము పురుషుల వరుసప్రకారము దగ్గరకు రావలెను.

“ఎన్నుకొనే”– నిర్ణయానికి రావడానికి వారు చీట్లు వేసి ఉంటారు. న్యాయాధిపతులు 20:9 1 సమూయేలు 14:41-42 1 దినవృత్తాంతములు 24:5 పోల్చిచూడండి.

15. అప్పుడు శపితమైనది యెవనియొద్ద దొరుకునో వానిని వానికి కలిగినవారి నందరిని అగ్నిచేత కాల్చివేయవలెను, ఏలయనగా వాడు యెహోవా నిబంధనను మీరి ఇశ్రాయేలులో దుష్కా ర్యము చేసినవాడు అనెను.

“చెడ్డ పని”– ద్వితీయోపదేశకాండము 22:21 న్యాయాధిపతులు 19:23-24 న్యాయాధిపతులు 20:6 న్యాయాధిపతులు 20:10 2 సమూయేలు 13:12.

16. కాబట్టి యెహోషువ ఉదయమున లేచి ఇశ్రాయేలీయులను వారి గోత్రముల వరుసను బట్టి దగ్గరకు రప్పించి నప్పుడు యూదాగోత్రము పట్టుబడెను.

17. యూదా వంశమును దగ్గరకు రప్పించినప్పుడు జెరహీయుల వంశము పట్టుబడెను. జెరహీయుల వంశమును పురుషుల వరుసను దగ్గరకు రప్పించినప్పుడు జబ్ది పట్టబడెను.

18. అతడును అతని యింటి పురుషుల వరుసను దగ్గరకు రప్పింపబడినప్పుడు యూదా గోత్రములోని జెరహు మునిమనుమడును జబ్ది మనుమడును కర్మీ కుమారుడునైన ఆకాను పట్టుబడెను.

19. అప్పుడు యెహోషువ ఆకానుతో నా కుమారుడా ఇశ్రాయేలు దేవుడైన యెహోవాకు మహిమను చెల్లించి, ఆయన యెదుట ఒప్పుకొని, నీవు చేసినదానిని మరుగు చేయక నాకు తెలుపుమని నిన్ను వేడుకొనుచున్నానని చెప్పగా
యోహాను 9:24, ప్రకటన గ్రంథం 11:13

ఆశాభావం కలగాలంటే ఆకానుకూ ఇస్రాయేల్ అంతటికీ మార్గం ఒకటే. అది పాపాన్ని ఒప్పుకుని, పశ్చాత్తాప పడడమే.

20. ఆకాను యెహోషువతో ఇశ్రాయేలీయుల దేవుడైన యెహోవాకు విరోధముగా నేను పాపము చేసినది నిజము.

ఎందరో తమ లోభం వల్లా ఆస్తి పట్ల మక్కువవల్లా తమ జీవితాలను పాడు చేసుకొని తమ ఆత్మలను నరకాగ్నికి లోను చేసుకొన్నారు (మార్కు 10:22-23 1 తిమోతికి 6:9-10).

21. దోపుడు సొమ్ములో ఒక మంచి షీనారు పైవస్త్రమును రెండువందల తులముల వెండిని ఏబది తులముల యెత్తుగల ఒక బంగారు కమ్మిని నేను చూచి వాటిని ఆశించి తీసికొంటిని; అదిగో నా డేరామధ్య అవి భూమిలో దాచబడియున్నవి, ఆ వెండి దాని క్రింద ఉన్నదని ఉత్తరమిచ్చి తాను చేసినదంతయు ఒప్పుకొనెను.

22. అప్పుడు యెహోషువ దూతలను పంపగా వారు ఆ డేరా యొద్దకు పరుగెత్తి చూచినప్పుడు అది డేరాలో దాచబడి యుండెను, ఆ వెండి దాని క్రిందనుండెను.

23. కాబట్టి వారు డేరా మధ్యనుండి వాటిని తీసికొని యెహోషువ యొద్దకును ఇశ్రాయేలీయులయొద్దకును తెచ్చి యెహోవా సన్నిధిని ఉంచిరి.

24. తరువాత యెహోషువయు ఇశ్రాయేలీయులందరును జెరహు కుమారుడైన ఆకానును ఆ వెండిని ఆ పైవస్త్రమును ఆ బంగారు కమ్మిని, ఆకాను కుమారులను కుమార్తెలను ఎద్దులను గాడిదలను మందను డేరాను వానికి కలిగిన సమస్తమును పట్టుకొని ఆకోరు లోయలోనికి తీసికొనివచ్చిరి.

మన పాపం ఇతరులపై చూపిన ప్రభావానికి దేవుడు మనల్నే బాధ్యులుగా ఎంచుతాడు (యెహోషువ 6:18 లూకా 17:1-2). ఆకోరు అంటే “బాధ”. అయ్యో, పాపం దేవుని ప్రజలను ఎంత బాధిస్తుంది! వారు ఆకాను భార్య బిడ్డలను కూడా చంపేశారు. ఆకాను చేసినది వారికి తెలిసి కూడా వారు నోరెత్తక అపరాధులయ్యారన్న మాట.

25. అప్పుడు యెహోషువ నీవేల మమ్మును బాధపరిచితివి? నేడు యెహోవా నిన్ను బాధపరచుననగా ఇశ్రాయేలీయులందరు వానిని రాళ్లతో చావగొట్టిరి;

“రాళ్ళు రువ్వి”– ఆ కాలంలో దేవుని ఆజ్ఞలను మీరితే శిక్ష రాళ్ళతో కొట్టి చంపడమే (లేవీయకాండము 20:2 లేవీయకాండము 24:23 సంఖ్యాకాండము 15:36).

26. వారిని రాళ్లతో కొట్టిన తరువాత అగ్నిచేత కాల్చి వారిమీద రాళ్లను పెద్ద కుప్పగా వేసిరి. అది నేటివరకు ఉన్నది. అప్పుడు యెహోవా కోపోద్రేకము విడినవాడై మళ్లుకొనెను. అందుచేతను నేటివరకు ఆ చోటికి ఆకోరు లోయ అనిపేరు.

మనం పశ్చాత్తాపపడి మన పాపాలకు ఆయన విధించిన శిక్షను స్వీకరిస్తే దేవుడు తన కోపాన్ని చాలించు కుంటాడు (సంఖ్యాకాండము 25:4 ద్వితీయోపదేశకాండము 13:17 మొ।।). ఆకోరు నుండి ఇస్రాయేల్‌వారు హాయీలోను, ఆ తరువాత అన్ని చోట్లా విజయ పరంపరల్లో సాగారు. ఒకరి అపజయం వల్ల కనాను కోసం జరిపే పోరాటమంతట్లో ఓటమి వచ్చినట్టు కాదు. అలానే మన క్రైస్తవ జీవితంలో ఒకసారి మనం ఓడిపోయినంత మాత్రాన జయించేవారం కాలేమని అనుకోనక్కర్లేదు.