1. అబ్రాము భార్యయైన శారయి అతనికి పిల్లలు కనలేదు. ఆమెకు హాగరు అను ఐగుప్తీయురాలైన దాసి యుండెను.
అపో. కార్యములు 7:5

అబ్రాహాముకు వారసుడు పుడతాడని దేవుడతనికి మాట ఇచ్చాడు (ఆదికాండము 15:4). ఇప్పుడు అబ్రాహాము దేవుడే ఆ మాట నెరవేర్చేవరకు ఆగకుండా తన స్వంతగా దేవుని మాట నెరవేర్చడానికి ప్రయత్నించే పొరపాటుకు ఒడిగట్టాడు. దేవుని మాట కోసం కనిపెట్టకుండా తన భార్య మాట వింటున్నాడు. ఇందుకు ఫలితం అబ్రాహాము శారైలకు విచారకరంగా ఉండడమే గాక, పశ్చిమ ఆసియా చరిత్రపైనే తీవ్ర ప్రభావం చూపింది. అబ్రాహాము హాగరులకూ పుట్టినది పన్నెండు అరబ్బు తెగల వంశకర్త ఇష్మాయేల్ (ఆదికాండము 16:11 ఆదికాండము 17:20 ఆదికాండము 25:12-18). ఇష్మాయేల్ సంతానమూ ఇస్సాకు సంతానమూ (ఆదికాండము 21:1-3) ఇప్పటికీ కూడా తరచుగా కలహించుకుంటూనే ఉన్నారు.

2. కాగా శారయి ఇదిగో నేను పిల్లలు కనకుండ యెహోవా చేసి యున్నాడు. నీవు దయచేసి నా దాసితో పొమ్ము; ఒకవేళ ఆమె వలన నాకు సంతానము కలుగవచ్చునని అబ్రాముతో చెప్పెను; అబ్రాము శారయి మాట వినెను.

3. కాబట్టి అబ్రాము కనాను దేశములో పదియేండ్లు కాపురమున్న తరువాత అబ్రాము భార్యయైన శారయి తన దాసియైన హాగరను ఐగుప్తీయు రాలిని తీసికొని తన పెనిమిటియైన అబ్రామునకు భార్యగా ఉండునట్లు అతనికిచ్చెను.

4. అతడు హాగరుతో పోయినప్పుడు అది గర్భవతి ఆయెను. అది తాను గర్భవతి నైతినని తెలిసికొనినప్పుడు దాని యజమానురాలు దాని దృష్టికి నీచమైనదాయెను.

5. అప్పుడు శారయి నా ఉసురు నీకు తగులును; నేనే నా దాసిని నీ కౌగిటికిచ్చిన తరువాత తాను గర్భవతినైతినని తెలిసికొనినప్పుడు నేను దాని దృష్టికి నీచమైనదాననైతిని; నాకును నీకును యెహోవా న్యాయము తీర్చును గాక అని అబ్రాముతో అనెను.
గలతియులకు 4:22

6. అందుకు అబ్రాము ఇదిగో నీ దాసి నీ చేతిలో ఉన్నది; నీ మనస్సు వచ్చినట్లు దాని చేయుమని శారయితో చెప్పెను. శారయి దాని శ్రమ పెట్టినందున ఆమె యొద్దనుండి అది పారిపోగా

7. యెహోవా దూత అరణ్యములో నీటి బుగ్గ యొద్ద, అనగా షూరు మార్గములో బుగ్గ యొద్ద, ఆమెను కనుగొని

దేవదూతలు బైబిల్లో దాదాపు 300 సార్లు కనిపిస్తున్నారు. వీరు సాధారణంగా మనుషులకు కనిపించని ఆత్మరూపులు. కానీ అప్పుడప్పుడు మానవ రూపంలో కనిపించవచ్చు. దేవదూత అని అనువదించిన హీబ్రూ, గ్రీకు పదాలు రెంటికీ అర్థం “వార్తాహరుడు”, “దూత”, లేక “పంపబడినవాడు”. దేవదూతలు తన సేవకోసం దేవుడు సృష్టించిన జీవులు. దేవదూతల గురించి కొన్ని ముఖ్యమైన రిఫరెన్సులు – ఆదికాండము 28:12 యోబు 1:6 యోబు 38:7 కీర్తనల గ్రంథము 78:49 కీర్తనల గ్రంథము 91:1 కీర్తనల గ్రంథము 103:20 దానియేలు 6:22 మత్తయి 1:20 మత్తయి 13:39 మత్తయి 13:41 మత్తయి 16:27 మత్తయి 22:30 మత్తయి 25:41 మత్తయి 26:53 యోహాను 1:51 అపో. కార్యములు 7:53 అపో. కార్యములు 8:26 అపో. కార్యములు 12:7-11 2 కోరింథీయులకు 11:14 కొలొస్సయులకు 2:18 హెబ్రీయులకు 1:6-7 హెబ్రీయులకు 1:14 1 పేతురు 1:12 2 పేతురు 2:4 ప్రకటన గ్రంథం 1:1 ప్రకటన గ్రంథం 22:8-9. దేవదూతలు లెక్క పెట్టలేనంతమంది (ప్రకటన గ్రంథం 5:11). అయితే ఈ వచనంలోని దేవదూత ప్రత్యేకమైనవాడు. ఈయన పేరు “యెహోవా దేవదూత”. ఈయన పాత ఒడంబడికలో అనేక చోట్ల కనిపిస్తాడు. తానే దేవుడైవున్నట్టే మాట్లాడుతాడు (ఆదికాండము 31:11-13 నిర్గమకాండము 3:2-6). దేవునికి ఉన్న గుణాలు ఈయనకు ఉన్నాయి (ఆదికాండము 16:10 ఆదికాండము 48:16). ఈయనే యెహోవా అని గుర్తించడం జరిగింది. (న్యాయాధిపతులు 2:1-3 న్యాయాధిపతులు 6:12 న్యాయాధిపతులు 6:14 న్యాయాధిపతులు 6:16 న్యాయాధిపతులు 6:23). ఈయన పేరు “అద్భుతం” (న్యాయాధిపతులు 13:18. యెషయా 9:6 పోల్చి చూడండి). ఈయన కొన్ని సార్లు మానవ రూపంలో దర్శనమిచ్చాడు (న్యాయాధిపతులు 13:3 న్యాయాధిపతులు 13:6 న్యాయాధిపతులు 13:10 న్యాయాధిపతులు 13:11 న్యాయాధిపతులు 13:13). ఈ కారణాలను బట్టి ఈ దేవదూత మరెవరో కాదనీ చాలా శతాబ్దాల తరువాత కన్య గర్భవాసాన పుట్టక మునుపే మనుషులకు సహాయం చేసేందుకూ దీవించేందుకూ వచ్చిన దేవుని కుమారుడైన యేసుక్రీస్తే అని చెప్పవచ్చు.

8. శారయి దాసివైన హాగరూ, ఎక్కడ నుండి వచ్చితివి, ఎక్కడికి వెళ్ళుచున్నావని అడిగినందుకు అది నా యజమాను రాలైన శారయి యొద్దనుండి పారిపోవుచున్నాననెను.

9. అప్పుడు యెహోవా దూత నీ యజమానురాలి యొద్దకు తిరిగి వెళ్లి ఆమె చేతి క్రింద అణిగి యుండుమని దానితో చెప్పెను.

10. మరియు యెహోవా దూత నీ సంతానమును నిశ్చయముగా విస్తరింపజేసెదను; అది లెక్కింప వీలులేనంతగా విస్తారమవునని దానితో చెప్పెను.

ఇలా మాట్లాడగలిగేది దేవుడు మాత్రమే – ఆదికాండము 17:12 ఆదికాండము 17:19 ఆదికాండము 17:20

11. మరియు యెహోవా దూత ఇదిగో యెహోవా నీ మొరను వినెను. నీవు గర్భవతివై యున్నావు; నీవు కుమారుని కని అతనికి ఇష్మాయేలు అను పేరు పెట్టుదువు;
లూకా 1:31

“ఇష్మాయేల్”– అంటే “దేవుడు వింటాడు” అని అర్థం. “బాధ”– విశ్వానికి ప్రభువైన దేవుడు కేవలం ఒక దాసిపిల్ల పడుతున్న బాధను ఎలా పట్టించుకుంటున్నాడో చూడండి. నిర్గమకాండము 22:26-27 కీర్తనల గ్రంథము 103:13-14 మత్తయి 8:2-3 మత్తయి 9:36 లూకా 22:50-51 పోల్చి చూడండి. దీన్నిబట్టి ఆయన మన గురించి కూడా శ్రద్ధ వహిస్తున్నాడనీ, మనం మొర పెడితే జవాబిస్తాడనీ నిబ్బరంతో ఉండవచ్చు. కీర్తనల గ్రంథము 65:2 పోల్చిచూడండి.

12. అతడు అడవి గాడిద వంటి మనుష్యుడు. అతని చెయ్యి అందరికిని అందరి చేతులు అతనికిని విరోధముగా ఉండును. అతడు తన సహోదరులందరి యెదుట నివసించునని దానితో చెప్పగా

13. అది చూచుచున్న దేవుడవు నీవే అను పేరు తనతో మాటలాడిన యెహోవాకు పెట్టెను ఏలయనగా నన్ను చూచినవాని నేనిక్కడ చూచితిని గదా అని అనుకొనెను.

“నన్ను చూచిన”– యోబు 24:23 యోబు 31:4 యోబు 34:21 కీర్తనల గ్రంథము 139:1-6 సామెతలు 5:21 సామెతలు 15:3 1 దినవృత్తాంతములు 16:9 హెబ్రీయులకు 4:13.

14. అందుచేత ఆ నీటి బుగ్గకు బెయేర్‌ లహాయిరోయి అను పేరు పెట్టబడెను. అది కాదేషుకును బెరెదుకును మధ్య నున్నది.

దీని అర్థం “నన్ను చూస్తున్న సజీవుని బావి”.

15. తరువాత హాగరు అబ్రామునకు కుమారుని కనెను. అబ్రాము హాగరు కనిన తన కుమారునికి ఇష్మాయేలను పేరు పెట్టెను.

16. హాగరు అబ్రామునకు ఇష్మాయేలును కనినప్పుడు అబ్రాము ఎనుబదియారు ఏండ్ల వాడు.