1. మరియు నేను చెవులార వినునట్లు ఆయన గట్టిగా ఈ మాటలు ప్రకటించెను ఒక్కొకడు తాను హతము చేయు ఆయుధమును చేతపట్టుకొనిపట్టణపు కావలి వారందరును ఇక్కడికి రండి అనెను.

ఈ కావలివారు ఎవరో కాదు. అప్పటి రోజుల్లో, బహుశా ఇప్పటికి కూడా, మానవ రూపంలో కనిపించే దేవదూతలే. వీరే యెహెజ్కేలుకు కనిపించినది. ఆదికాండము 19:1; హెబ్రీయులకు 13:2.

2. అంతలో ఒక్కొకడు తాను హతముచేయు ఆయుధమును చేత పట్టుకొని, ఉత్తర దిక్కుననున్న పై గవిని మార్గముగా ఆరుగురు మనుష్యులు వచ్చుచుండిరి. వారి మధ్య ఒకడు, అవిసె నారబట్ట ధరించుకొని నడుమునకు లేఖకుని సిరాబుడ్డి కట్టుకొని యుండెను; వారు ఆలయమున ప్రవేశించి యిత్తడి బలిపీఠమునొద్ద నిలిచిరి.
ప్రకటన గ్రంథం 1:13

“సామాను పెట్టె”– కలాలు, ఇంకు, కాగితం మొదలైన సరంజామా.

3. ఇశ్రాయేలీయుల దేవుని మహిమ తానున్న కెరూబుపైనుండి దిగి మందిరపు గడప దగ్గరకువచ్చి నిలిచి, అవిసె నారబట్ట ధరించుకొని లేఖకుని సిరాబుడ్డి నడుమునకు కట్టుకొనిన వానిని పిలువగా

అతి పవిత్ర స్థలంలో ప్రాయశ్చిత్త స్థానం పైగా కెరూబుల మధ్యనుంచి దేవుని మహిమ తొలగిపోయింది. విగ్రహ పూజ నిజ దేవునికి అసహ్యం. 2 కోరింథీయులకు 6:14-16 పోల్చిచూడండి.

4. యెహోవా యెరూషలేమను ఆ పట్టణములో ప్రవేశించి చుట్టు తిరిగి, దానిలో జరిగిన హేయకృత్యములనుగూర్చి మూల్గులిడుచు ప్రలాపించుచున్నవారి లలాటముల గురుతు వేయుమని వారి కాజ్ఞాపించి
ప్రకటన గ్రంథం 7:3, ప్రకటన గ్రంథం 9:4, ప్రకటన గ్రంథం 14:1

దుర్మార్గత, అపనమ్మకం ప్రబలంగా ఉన్న ఆ రోజుల్లో కూడా జెరుసలంలో దేవునికి ఆయన వాక్కుకూ నమ్మకంగా ఉన్నవారు కొందరు మిగిలి ఉన్నారు. నగరంలో ఉన్న పాపాల విషయం నొచ్చుకుంటూ ఉండడం ద్వారా దేవునికి అనుకూలంగా తాము ఉన్నామని వీరు చూపారు. పాపాలను విగ్రహపూజను చూచి హృదయ వేదన అనుభవించడం నిజ దేవుని విశ్వాసులకు ఒక లక్షణం. ఏదైతే దేవునికి నొప్పి కలిగిస్తుందో అది వారిక్కూడా నొప్పి కలిగిస్తుంది (యెహెఙ్కేలు 6:9 పోల్చి చూడండి) వారి భద్రతకోసం దేవదూత వారికి గుర్తు వెయ్యాలి. ఇదంతా దర్శనంలో జరిగిందన్నమాట గుర్తుంచుకోండి. నిజంగా మనుషుల నొసళ్ల పైన గుర్తు పెట్టడం జరగలేదు. ప్రకటన గ్రంథం 7:1-4 పోల్చి చూడండి.

5. నేను వినుచుండగా వారికీలాగు సెలవిచ్చెను మీరు పట్టణములో వాని వెంట పోయి నా పరిశుద్ధస్థలము దగ్గర మొదలుపెట్టి, కటాక్షమైనను కనికరమైనను లేకుండ అందరిని హతము చేయుడి.

బబులోనువారు నగరాన్ని పట్టుకొని నాశనం చేస్తే ఏమవుతుందో యెహెజ్కేలుకు తెలియజేయడమే దీనిలోని ఉద్దేశం.

6. అందరు నశించునట్లు ఎవరిని విడిచిపెట్టక, పెద్దవారిని చిన్నవారిని కన్యకలను పిల్లలను స్త్రీలను చంపవలెను గాని, ఆ గురుతు ఎవరికుండునో వారిని ముట్టకూడదు. వారు మందిరము ముందరనున్న పెద్దలను హతముచేయ మొదలు పెట్టగా
1 పేతురు 4:17

“నా పవిత్ర స్థానం దగ్గర మొదలు పెట్టండి”– ప్రజలను దేవుని మార్గంలో నడిపించవలసిన బాధ్యత ఉన్నవారితో మొదలు అయింది ఈ శిక్ష. వారు ప్రజలను అలా నడిపించలేదు గనుక దేశం అంతట్లోకీ ఎక్కువ దోషం వారిదే. యెహెఙ్కేలు 8:11-12; 1 పేతురు 4:17 పోల్చిచూడండి.

7. ఆయన మందిరమును అపవిత్రపరచుడి, ఆవరణములను హతమైనవారితో నింపుడి, మొదలుపెట్టుడి అని సెలవిచ్చెను గనుక వారు బయలుదేరి పట్టణములోని వారిని హతము చేయసాగిరి.

“అశుద్ధం చేయండి”– ధర్మశాస్త్రం ప్రకారం మృత దేహాలు అశుద్ధపరిచేవి (యెహెఙ్కేలు 21:1, యెహెఙ్కేలు 21:11; సంఖ్యాకాండము 19:11-16). తన పవిత్రాలయాన్ని అశుద్ధం చేయండని దేవుడే స్వయంగా తన దూతలకు చెప్పాడు. అది విగ్రహాల పూజాస్థలం అయింది. దేవుడు దాన్ని వదిలేస్తున్నాడు.

8. నేను తప్ప మరి ఎవరును శేషింపకుండ వారు హతము చేయుట నేను చూచి సాస్టాంగపడి వేడుకొని అయ్యో, ప్రభువా, యెహోవా, యెరూషలేముమీద నీ క్రోధమును కుమ్మరించి ఇశ్రాయేలీయులలో శేషించినవారినందరిని నశింపజేయుదువా? అని మొఱ్ఱ పెట్టగా

9. ఆయన నాకీలాగు సెలవిచ్చెను ఇశ్రాయేలు వారి యొక్కయు యూదావారియొక్కయు దోషము బహు ఘోరముగా ఉన్నది; వారు యెహోవా దేశమును విసర్జించెననియు ఆయన మమ్మును కానడనియునను కొని, దేశమును హత్యతోను పట్టణమును తిరుగుబాటు తోను నింపియున్నారు.

10. కాబట్టి కటాక్షముంచకయు కనికరము చూపకయు నేను వారి ప్రవర్తన ఫలమును వారనుభవింపజేసెదను.

యెహెఙ్కేలు 7:4, యెహెఙ్కేలు 7:9; యెహెఙ్కేలు 8:18; యెహెఙ్కేలు 11:21; యెహెఙ్కేలు 23:49.

11. అప్పుడు అవిసెనార బట్ట ధరించుకొని లేఖకుని సిరాబుడ్డి నడుమునకు కట్టుకొనిన వాడు వచ్చినీవు నాకాజ్ఞాపించినట్లు నేను చేసితినని మనవి చేసెను.
ప్రకటన గ్రంథం 1:13

ప్రజలపట్ల యెహెజ్కేలుకు ఉన్న ప్రేమ చూడండి. దేవునికి చెందిన ఇతర మనుషులతో పోల్చిచూడండి – నిర్గమకాండము 32:30-32; సంఖ్యాకాండము 14:5-6, సంఖ్యాకాండము 14:10-19; యెహెఙ్కేలు 7:6-7; యిర్మియా 8:21; యిర్మియా 9:1; రోమీయులకు 9:1-3. ఇంతకుముందు కనిపించిన పెద్దలకూ (యెహెఙ్కేలు 8:10-11) యెహెజ్కేలుకూ ఎంత తేడానో చూడండి.