1. వారు దాటుచుండగా ఇశ్రాయేలీయుల యెదుట నుండి యెహోవా యొర్దాను నీళ్లను ఎండచేసిన సంగతి యొర్దానుకు పడమటిదిక్కుననున్న అమోరీయుల రాజులందరును సముద్రమునొద్దనున్న కనానీయుల రాజులందరును వినినప్పుడు వారి గుండెలు చెదరిపోయెను. ఇశ్రా యేలీయుల భయముచేత వారి కిక ధైర్యమేమియు లేక పోయెను.

“అమోరివాళ్లు”– ఆదికాండము 15:16. “నీరైపోయాయి”– యెహోషువ 2:11.

2. ఆ సమయమున యెహోవారాతికత్తులు చేయించు కొని మరల ఇశ్రాయేలీయులకు సున్నతి చేయించుమని యెహోషువకు ఆజ్ఞాపింపగా

ఆదికాండము 17:9-14 నోట్. సున్నతి మొట్ట మొదటి సారిగా అబ్రాహాము ఇచ్చిన గుర్తు (రోమీయులకు 4:11). ప్రతి మగ బిడ్డకూ ఎనిమిదో రోజున సున్నతి చేయాలన్న నియమం మోషే ధర్మశాస్త్రంలో రాసి ఉంది (లేవీయకాండము 13:3). అయితే ప్రజలు ఎడారిలో తిరుగులాడే రోజుల్లో దీన్ని ఎవరూ పట్టించుకోలేదు (వ 5,7). దీనికి కారణం ఏమీ రాసి లేదు. క్రొత్త ఒడంబడిక ప్రకారం సున్నతి అంటే శరీర స్వభావాన్ని విసర్జించడం అనేదానిని సూచిస్తుంది (ఫిలిప్పీయులకు 3:3 కొలొస్సయులకు 2:11). అంటే దేవుడంటే లెక్కలేని ఈ లోకంలో మనం నీతిన్యాయాలతో యేసును అనుసరించేందుకు సిద్ధపడ్డామని అర్థం.

3. యెహోషువ రాతికత్తులు చేయించుకొని సున్నతి గిరి అను స్థలము దగ్గర ఇశ్రాయేలీయులకు సున్నతి చేయించెను.

4. యెహోషువ సున్నతి చేయించుటకు హేతువేమనగా, ఐగుప్తులోనుండి బయలు దేరినవారందరిలో యుద్ధసన్నద్ధులైన పురుషులందరు ఐగుప్తు మార్గమున అరణ్యములో చనిపోయిరి.

ఈజిప్ట్‌నుంచి బయటికి వచ్చిన పురుషులకు సున్నతి జరిగినంత మాత్రం చేత దేవుని దీవెనలు వాళ్ళ పై ఉన్నాయను కోకూడదు. మనిషి హృదయం, జీవితం చెడు దారిలో ఉన్నప్పుడు బయటి ఆచారం వల్ల ప్రయోజనం లేదు. వారు సున్నతి పొందిన వారైనప్పటికీ వారిలో అపనమ్మకం, అవిధేయత ఉన్నాయి (సంఖ్యాకాండము 14:21-23 హెబ్రీయులకు 3:19). మన హృదయాలు దేవుని ఎదుట సరైన స్థితిలో లేకపోతే ఏ విధమైన బయటి ఆచారం గానీ కర్మకాండ గానీ మనకు ఉపకరించదు (రోమీయులకు 2:28-29 గలతియులకు 6:15 యెషయా 1:11-17).

5. బయలుదేరిన పురుషులందరు సున్నతి పొందినవారే కాని ఐగుప్తులో నుండి బయలుదేరిన తరువాత అరణ్యమార్గమందు పుట్టిన వారిలో ఎవరును సున్నతి పొందియుండలేదు.

6. యెహోవా మనకు ఏ దేశమును ఇచ్చెదనని వారి పితరులతో ప్రమాణముచేసెనో, పాలు తేనెలు ప్రవహించు ఆ దేశమును తాను వారికి చూపింపనని యెహోవా ప్రమాణము చేసి యుండెను గనుక ఐగుప్తులోనుండి వచ్చిన ఆ యోధులందరు యెహోవా మాట వినకపోయినందున వారు నశించువరకు ఇశ్రాయేలీయులు నలువది సంవత్సరములు అరణ్యములో సంచరించుచు వచ్చిరి.

7. ఆయన వారికి ప్రతిగా పుట్టించిన వారి కుమారులు సున్నతి పొంది యుండలేదు గనుక వారికి సున్నతి చేయించెను; ఏల యనగా మార్గమున వారికి సున్నతి జరుగలేదు.

తన ఒడంబడిక గుర్తును నిర్లక్ష్యం చేసిన సంగతిని దేవుడు పట్టించుకోకుండా ఊరుకోలేడు. విధేయులు కండని వారికి పిలుపును ఇస్తున్నాడు. తన ధర్మశాస్త్రంలోని ఈ విషయాన్ని వారు అలక్ష్యం చేసినప్పటికీ వారు ఎడారిలో తిరుగులాడిన సంవత్సరాలన్నిటిలో వారిపట్ల కృప, కరుణ చూపడం మానలేదు (ద్వితీయోపదేశకాండము 2:7). అయితే వారు తమ వారసత్వంలోకి ప్రవేశించబోయే ముందు మాత్రం విధేయత చూపవలసిందే. ఇప్పటి విశ్వాసులు కూడా కావాలని దేవునిపట్ల అవిధేయత చూపుతూ కొనసాగితే తమ విశ్వాస జీవితంలో విజయం పొందగలమని గానీ క్రీస్తులో తమ వారసత్వాన్ని సంతోషంతో అనుభవించగలమని గానీ భావించకూడదు.

8. కాబట్టి ఆ సమస్త జనము సున్నతి పొందుట తీరిన తరువాత తాము బాగుపడు వరకు పాళెములోని తమ చోట్ల నిలిచిరి.

9. అప్పుడు యెహోవా నేడు నేను ఐగుప్తు అవమానము మీ మీద నుండకుండ దొరలించివేసి యున్నానని యెహో షువతో ననెను. అందుచేత నేటివరకు ఆ చోటికి గిల్గాలను పేరు.

10. ఇశ్రాయేలీయులు గిల్గాలులో దిగి ఆ నెల పదునాలుగవ తేదిని సాయంకాలమున యెరికో మైదానములో పస్కాపండుగను ఆచరించిరి.

నిర్గమకాండము 12:1-51 లేవీయకాండము 23:5 నోట్స్ చూడండి. సున్నతి లేని ఏ వ్యక్తీ పస్కా ఆచరించకూడదని చట్టం (నిర్గమకాండము 12:48). కాబట్టి ఎడారిలో పెరిగి పెద్దయిన వారందరికీ ఆ జ్ఞాపకార్థ ఆచారంలో పాలు పొందడానికి వీల్లేదు. ఇప్పుడు సున్నతి పొందడంమూలంగా వారు చూపిన విధేయత వారిని దేవుని కృపను జ్ఞాపకం చేసుకునేందుకు యోగ్యులుగా చేసింది, ఓ సరికొత్త ఆశీర్వాదాల మార్గం తెచ్చింది. ఎవరైనా సరే దేవుని పట్ల విధేయత చూపడంలో ఆ వ్యక్తి వేసిన మొదటి అడుగు ఈ ఫలితాలనే తేగలదు.

11. పస్కా పోయిన మరునాడు వారు ఈ దేశపు పంటను తినిరి. ఆ దినమందే వారు పొంగకయు వేచబడియునున్న భక్ష్యములను తినిరి.

“పొంగని రొట్టెలు”– నిర్గమకాండము 12:15 లేవీయకాండము 23:6.

12. మరునాడు వారు ఈ దేశపు పంటను తినుచుండగా మన్నా మానిపోయెను; అటుతరువాత ఇశ్రాయేలీయులకు మన్నా దొరకకపోయెను. ఆ సంవత్సరమున వారు కనానుదేశపు పంటను తినిరి.

“మన్నా ఆగిపోయింది”– ఇక మన్నా కురవవలసిన అవసరం లేదు గనుక ఆగిపోయింది. వాగ్దత్త దేశం పంటను ఇస్రాయేల్‌వారు తినడం ఆరంభించగలిగారు.

13. యెహోషువ యెరికో ప్రాంతమున నున్నప్పుడు అతడు కన్నులెత్తి చూడగా, దూసిన కత్తి చేత పట్టుకొనియున్న ఒకడు అతని యెదుట నిలిచియుండెను; యెహోషువ అతని యొద్దకు వెళ్లినీవు మా పక్షముగా నున్నవాడవా, మా విరోధులపక్షముగా నున్నవాడవా? అని అడుగగా

“ఒక వ్యక్తి”– బహుశా యెహోవా దూత కావచ్చు. ఆదికాండము 16:7 నోట్ చూడండి. అతడు పరలోకంనుంచి వచ్చిన వాడని యెహోషువ గుర్తుపట్టలేదు.

14. అతడుకాదు, యెహోవా సేనాధిపతిగా నేను వచ్చి యున్నాననెను. యెహోషువ నేలమట్టుకు సాగిలపడి నమస్కారముచేసి నా యేలినవాడు తన దాసునికి సెల విచ్చునదేమని అడిగెను.
మత్తయి 14:33, మత్తయి 15:25

యెహోవాప్రభువు ఈ పక్షమో, ఆ పక్షమో చేరడానికి రాలేదు. దేవుని సైన్యాలకు సర్వాధిపతిగా వచ్చాడు. సేనలు అంటే ఇస్రాయేల్ జాతి, జరగనున్న పోరాటంలో పాల్గొనేందుకు వచ్చిన దేవదూతల సమూహాలన్న మాట. దేవుడు కేవలం తమ పక్షాన ఉన్నంతమాత్రాన వారు పోరాడితే ఇస్రాయేల్‌వారు జయించి తమ వారసత్వాన్ని స్వాధీనం చేసుకోగలిగినవారు కారు. దేవుణ్ణి తమ నాయకుడుగా సేనాధిపతిగా స్వీకరించి సంపూర్ణ విధేయత చూపినప్పుడే జయించగలిగి ఉంటారు. వారెక్కడికి వెళ్ళాలో, ఏం చెయ్యాలో దేవుడు వారికి వివరిస్తాడు. నేటి విశ్వాసులకు అంతే.

15. అందుకు యెహోవా సేనాధిపతి నీవు నిలిచియున్న యీ స్థలము పరిశుద్ధమైనది, నీ పాద రక్షలను తీసి వేయుమని యెహోషువతో చెప్పగా యెహోషువ ఆలాగు చేసెను.

ఈ సందేశం ఇది: యెహోషువ పరమ పవిత్రుడైన దేవుని సన్నిధానంలో ఉన్నాడు (నిర్గమకాండము 3:5 పోల్చిచూడండి). అందుకు తగినట్లుగానే ప్రవర్తించాలి.